مەملەكەت باسشىسى نۇرسۇلتان نازاربايەۆ ءۇندىستان پرەمەر-مينيسترى نارەندرا موديمەن كەزدەستى، دەپ حابارلايدى Qamshy.kz اقپارات اگەنتتىگى.
قازاقستان پرەزيدەنتى ەكى ەل اراسىنداعى قارىم-قاتىناستاردىڭ دايەكتى دامىپ كەلە جاتقانىنا توقتالىپ، ءۇندىستان پرەمەر-مينيسترىن ەلدەرىنىڭ شانحاي ىنتىماقتاستىق ۇيىمىنىڭ قۇرامىنا تولىق قۇقىلى مۇشە بولۋىمەن قۇتتىقتادى. نۇرسۇلتان نازاربايەۆ قازاقستاننىڭ وسى ماسەلەگە بايلانىستى ءۇندىستاندى اۋەل باستان تولىق قولداعانىن ايتتى.
– بىلتىر ءوزىڭىز بىزگە قولداۋ كورسەتىپ، استانادا وتكەن حالىقارالىق «ەكسپو-2017» مامانداندىرىلعان كورمەسىنە كەلگەنىڭىز ءۇشىن سىزگە ريزاشىلىعىمدى بىلدىرەمىن. سول ارقىلى وسى شاراعا حالىقارالىق دەڭگەيدە نازار اۋدارىلۋىنا سەپتىگىڭىزدى تيگىزدىڭىز، – دەدى قازاقستان پرەزيدەنتى.
مەملەكەت باسشىسى قول جەتكىزىلگەن ۋاعدالاستىقتاردى جۇزەگە اسىرۋدىڭ ناتيجەسىندە بىلتىردىڭ وزىندە قازاقستان مەن ءۇندىستان اراسىنداعى تاۋار اينالىمى 53 پايىزعا ارتىپ، 1 ميلليارد دوللارعا جەتكەنىن اتاپ ءوتتى.
– قازىرگى ۋاقىتتا ەلدەرىمىز اراسىندا عارىش، فارماسيەۆتيكا سالاسىنداعى، اسكەري-تەحنيكالىق سەكتورداعى جانە باسقا دا سالالارداعى ىنتىماقتاستىق بەلسەندى دامىپ كەلەدى. بىزگە وسى باعىتتاعى جۇمىستاردى جالعاستىرۋ كەرەك، – دەدى قازاقستان پرەزيدەنتى.
ءۇندىستان پرەمەر-مينيسترى ءۇندىستان وكىلىنىڭ بىرىككەن ۇلتتار ۇيىمى حالىقارالىق سوتىنىڭ قۇرامىنا سايلانۋىنا قولداۋ كورسەتكەنى ءۇشىن نۇرسۇلتان نازاربايەۆقا العىس ايتىپ، ەكى ەل اراسىنداعى كوپ جاقتى ىنتىماقتاستىق تابىستى دامىپ، نىعايىپ كەلە جاتقانىنا توقتالدى.
– ءسىزدى قازاقستاننىڭ ەلورداسى – استانا قالاسىنىڭ 20 جىلدىعىمەن قۇتتىقتايمىن جانە «استانا» حالىقارالىق قارجى ورتالىعىنىڭ اشىلۋىنا بايلانىستى ىزگى نيەتىمدى بىلدىرەمىن، – دەدى ءۇندىستان پرەمەر-مينيسترى.
كەزدەسۋ سوڭىندا نارەندرا مودي قازاقستاننىڭ ءۇندىستان ءۇشىن ورتالىق ازياداعى ەڭ ءىرى ساۋدا سەرىكتەستەرىنىڭ ءبىرى سانالاتىنىنا توقتالىپ، ءۇندىستان تاراپىنىڭ «سيفرلىق قازاقستان» باعدارلاماسى اياسىنداعى جوبالاردى جۇزەگە اسىرۋعا مۇددەلىلىك تانىتىپ وتىرعانىن جەتكىزدى. سونىمەن قاتار ءۇندىستان پرەمەر-مينيسترى قازاقستان تاراپىنىڭ حالىقارالىق كۇن اليانسىنا قوسىلۋىنا ءوتىنىش ءبىلدىردى.
