نۇرسۇلتان نازاربايەۆ قىتايعا جاساعان ساپارىنىڭ ءۇشىنشى كۇنىندە شىۇ-نىڭ سامميتىنەن سوڭ جۋرناليستەرمەن بريفينگ وتكىزدى، دەپ حابارلايدى Qamshy.kz اقپارات اگەنتتىگىنىڭ ءتىلشىسى. 

بريفينگ بارىسىندا ەكى ەل اراسىنداعى بايلانىس پەن سامميتتە قوزعالعان ماسەلەلەر تالقىلاندى.

شىۇ سامميتىندە ەلباسى ۇيىمعا مۇشە ەلدەر ءوزارا ساۋدا-ساتتىقتى ۇلتتىق ۆاليۋتامەن جۇزەگە اسىرۋ كەرەك دەگەن بولاتىن. مەملەكەت باسشىسى بريفينگتە وسى ۇسىنىس اياسىندا جۇرگىزىلەتىن جۇمىستار تۋرالى باياندادى.

- بۇل بۇرىننان كوتەرىلىپ جۇرگەن ماسەلە. جۇڭگو مەن رەسەي اراسىنداعى ساۋدا-ساتتىق بىلتىر 80 ميلليارد اقش دوللارىن قۇرادى. وزدەرىڭىز بىلەتىندەي امەريكا دوللارى وتە قىرسىق ۆاليۋتا. ولار قاشاندا ويىنا نە كەلسە سونى ىستەيدى. سول سەبەپتى، وزىمىزگە سەنىمدى بولۋ ءۇشىن جۇڭگو مەن قازاقستان اراسىنداعى ساۋدانى ءبىز تەڭگەمەن، يۋانمەن جۇرگىزسەك ءتيىمدى بولار ەدى. ولار بىزدەن تەڭگەمەن ساتىپ السا، ءبىز ولاردان يۋانمەن ساتىپ الامىز. ول ءۇشىن وسى ۆوليۋتالاردىڭ بازاسىن قۇرۋىمىز كەرەك. بانكتەردە وسىنداي قاراجات بولۋ كەرەك. دەپوزيتتەرىمىز بولۋ كەرەك. اتالعان باستامانىڭ پايداسى مول. بىزدە ءتىپتى رەسەيمەن دە وسىنداي تاسىلگە كوشەمىز دەگەن وي بار. بۇل ماسەلەگە بايلانىستى ۇلكەن جۇمىستار جۇرگىزىلىپ جاتىر. ارينە تولىعىمەن وسى تاسىلگە كوشپەيمىز. سەبەبى باتىس ەلدەرىنەن تاۋار يمپورتتايتىن بولساق دوللار بىزگە قاجەت بولادى. ەكى ءتاسىلدىڭ دە ءبىز ءۇشىن پايداسى كوپ. ارينە بارلىعى بىردەن جۇزەگە اسپايدى. دەگەنمەن شىۇ-عا مۇشە ەلدەردىڭ بارلىعى بۇل تاسىلمەن تولىق كەلىسىپ وتىر. ەندىگى جۇمىس قارجىگەرلەردىڭ مويىنىندا. ولار وسى ماسەلە بويىنشا ناقتى شارۋالار اتقارىپ، بىزگە ۇسىنىستارىن ازىرلەۋى ءتيىس، - دەدى نۇرسۇلتان نازاربايەۆ ءوز سوزىندە.