ەلباسى قىتايمەن ىنتىماقتاستىقتىڭ كەلەشەگىنە زور سەنىممەن قارايدى. بۇل تۋرالى نۇرسۇلتان نازاربايەۆ قىتايدا ب ا ق وكىلدەرىمەن وتكەن بريفينگ بارىسىندا ايتتى.

– وتكەن كەلىسسوزدەردىڭ ناتيجەسىندە جۇڭگو تاراپى ءبىزدىڭ دەلەگاسياعا ۇلكەن سەنىممەن قارايتىنىن ايتتى. مەن وسىمەن قىتايدىڭ ءتورتىنشى توراعاسىمەن جۇمىس ىستەپ وتىرمىن. العاشقى توراعامەن ءبىز شيەلەنىسىپ تۇرعان شەكارا ماسەلەسىن تالقىلادىق. ەكىنشىسىمەن ەكونوميكالىق ماسەلەنى ءسوز ەتتىك. ال شي جين پيڭمەن ءوزارا سەنىمدى نىعايتۋ ماسەلەسىنە ءمان بەردىك. مەملەكەتتەر اراسىندا شەشىلمەگەن ماسەلە قالعان جوق. وسى ۋاقىتقا دەيىن 51 جوبامەن كەلىستىك. يندۋستريالىق يننوۆاسيالىق جوبانى جۇزەگە اسىرىپ جاتىرمىز. 1200 كاسىپ سالدىق. ءبىزدىڭ مىندەت شيكى رەسۋرستاردان تاۋەلسىز التەرناتيۆتىك ەكونوميكا قۇرۋ. بۇىگندە مۇناي-گازدىڭ باعاسى 30 دوللارعا دەيىن تومەندەدى. مەتالل باعاسى دا ءتۇستى، سول سەبەپتى بىزگە قيىن. بىزدەگى رەسۋرستارعا سەنىپ قالۋعا بولمايدى، الەمدەگى ەكونوميكانىڭ تۋربۋلەنتتىلىگى بارىمىزگە بەلگىلى. بۇگىن مۇنايدىڭ باعاسى جاقسى بولسا، ەرتەڭ ءدال سونداي جاقسى بولاتىنىنا ەشكىم كەپىلدىك بەرە المايدى. سول سەبەپتى العا قاراي قالاي جىلجۋعا بولادى، تابىسقا جەتۋ ءۇشىن نە ىستەۋ كەرەك، ەكونوميكا قانداي جاعدايدا وسەدى – وسى سۇراقتاردىڭ جاۋابىن ىزدەستىرگەن ءجون»، - دەدى ەلباسى سينداودا وتكەن بريفينگ بارىسىندا.

بۇعان قوسا ەلباسى قحر-مەن ىنتىماقتاستىقتىڭ اۆتوموبيل ءوندىرىسىن دامىتۋعا سەپتىگىن تيگىزەتىنىن مالىمدەدى.

–ەگەر ەكونوميكا جىل سايىن كوتەرىلمەسە، ءبىزدىڭ جاڭا زاۋىتتار مەن كاسىپورىندارىن سالاتىن مۇمكىندىگىمىز بولمايدى، وندايدا ادامداردىڭ قاجەتتىلىگىن قامتاماسىز ەتە المايمىز. سول سەبەپتى 51 جوبانىڭ تورتەۋى ىسكە قوسىلدى، التىسى بيىل قوسىلادى. 18ء-ىن الداعى جىلى قوسامىز. بۇل نىساندار ۇساق بولىپ كورىنگەنىمەن، ماڭىزى زور. ماسەلەن، سەمەنت زاۋىتى نەمەسە قوستانايداعى اۆتوموبيل زاۋىتى. ساپار اياسىندا الليۋر زاۋىتىنا قىتايلىق كاپيتال 49 پايىزبەن كىرىپ، 1،1 ملرد دوللار ينۆەستيسيا قۇيادى دەپ كەلىسىلدى. اۆتوموبيل ءوندىرىسى 100 مىڭ داناعا جەتەدى. وسىمەن بىتپەيدى. مەن بارلىق بولشەكتەر ەلىمىزدە شىعارىلۋى تيىستىگىن ايتتىم. دەمەك، مۇنىڭ بارلىعى دا ءبىزدىڭ كاسىپورىنداردا جاسالادى، - دەدى ەلباسى.