الەمنىڭ بارشا مۇسىلمانى ماۋسىمنىڭ 11-ىنەن 12-سىنە قاراعان ءتۇنى ۇيىقتاماي، جاراتۋشىعا سىيىنۋمەن وتكىزەدى. ءقادىر ءتۇنى نەمەسە لايلاتۋل-كادر جىل سايىن قاسيەتتى رامازان ايىندا بولادى.

قادىر ءتۇنى — قاسيەتتى ءتۇن. ورازا (رامازان) ايىنىڭ سوڭعى ون كۇنىنىڭ بىرىندە بولادى. بۇل ءتۇن تۋرالى قۇران كارىمنىڭ “قادىر سۇرەسىندە” ايتىلعان. بەس اياتتان تۇراتىن سۇرەدە قۇراننىڭ ءقادىر تۇنىندە تۇسىرىلگەندىگى، ونىڭ مىڭ ايدان قايىرلى ەكەندىگى، بۇل تۇندە جابىرەيىل پەرىشتە اللا امىرىمەن جەر بەتىنە ءتۇسىپ، ادامدارعا قىزمەت ەتەتىندىگى جانە تاڭعا دەيىن تىنىشتىق بولاتىندىعى ايتىلادى.

ءقادىر ءتۇنى پەرىشتەلەر مۇسىلماندارعا دۇعا وقىپ، تىلەۋلەس بولادى. جاسالعان عيباداتتىڭ مىڭ ايعا، ياعني سەكسەن ءۇش جىلعا تەڭ بولاتىندىعىنا بايلانىستى مۇسىلماندار ءقادىر ءتۇنىن قۇلشىلىقپەن وتكىزۋگە تىرىسادى.

ادەتتە، ليايلياتۋل-كادر ءتۇنى قازا ەتىلگەن نامازدار وقىلىپ، قاسيەتتى قۇران كىتابى وقىلادى، وتكەن كۇن مەن ايلاردىڭ قاتەلىكتەرى سارالانادى، وكپە-رەنىش كەشىرىلىپ، كەلەشەككە جوسپار قۇرىلادى. قاسيەتتى ءقادىر ءتۇنى وقىلعان ناماز مىڭ اي نەمەسە 83 جىل وقىعان نامازبەن تەڭ.

مەشىت يمامدارىنىڭ كەڭەسىنە سۇيەنسەك، بۇل كۇنى ءتۇس كەزىندە ەپتەپ كوز شىرىمىن الىپ، اۋىزاشار كەزىندە تويىپ تاماق ىشپەگەن ءجون. قاسيەتتى ءتۇنى دۇعالاردىڭ قىسقا ءتىزىمىن ازىرلەگەن ءجون. 

بۇدان بولەك، بىرنەشە شەكتەۋلەردى ساقتاۋ قاجەت. ىشىمدىك ىشۋدەن باس تارتىپ، ءقادىر ءتۇنىن ويىن-ساۋىق ورىندارىندا ەمەس، ۇيدە نەمەسە مەشىتتە وتكىزگەن ابزال. وسەك ايتىپ، عايبات سويلەۋگە، ۇرىسۋعا بولمايدى. كوڭىل كوتەرەتىن فيلمدەر مەن باعدارلامالار كورمەي، تىنىشتىقتا وتىرىپ، ماڭىزدى جايتتاردى ويلانۋ كەرەك.