پرەمەر-مينيستر باقىت ساعىنتايەۆ بيۋدجەت قاراجاتىن يگەرمەگەن باسشىلاردى  سىننىڭ استىنا الدى، دەپ حابارلايدى Qamshy.kz اقپارات اگەنتتىگى. 

ۇكىمەت وتىرىسىنداعى قارجى ءمينيسترى باقىت سۇلتانوۆتىڭ بايانداماسىنا سايكەس رەسپۋبليكالىق نىسانداردىڭ قۇرىلىسىنا 275،5 ميلليارد تەڭگە بولىنگەن. جىل باسىنان بەرى قاراجاتتىڭ تەك 15 پايىزى، ياعني 42،2 ميلليارد تەڭگە عانا يگەرىلگەن.

«باقىت ءتۇرلىحانوۆتىڭ ەسەبىنە سايكەس، بارلىق ماسەلە قۇرىلىستا بولىپ تۇر. بەس اي ىشىندە تەك 42 ميلليارد تەڭگەنى يگەرگەنبىز. ۋاقىت ءوتىپ بارادى، ماۋسىمنىڭ اياقتالۋ مەرزىمى جاقىنداپ كەلەدى. قازان ايىندا كۇن سۋىتادى، قۇرىلىس ماسەلەلەرىن شەشۋ قيىنداي تۇسەدى. دەمەك بىزگە ول ءواراجاتتى ۇستاپ وتىرماي، ۇكىمەتكە قايتارىپ بەرۋ كەرەك. بىزگە باسقا مينيسترلەردەن قاراجاتتى ماقساتتى تۇردە جۇمساۋعا ۇسىنىستار ءتۇسىپ جاتىر»، - دەدى ساعىنتايەۆ ۇكىمەت ساعاتىندا.

سونىمەن قاتار، ساعىنتايەۆ ۆيزيت-ورتالىعىنىڭ قۇرىلىسىنا بايلانىستى مادەنيەت مينيسترلىگىن سىنعا الدى.  وسىعان دەيىن تۋريستەرگە قاجەتتى ينفراسترۋكتۋرانىڭ بارلىعى، كافە، شەبەرحانا، كونفەرەنس-زال قاراستىرىلعان ورتالىقتاردىڭ قۇرىلىسىن قازاقستان بويىنشا جۇرگىزۋ جوسپارلانعان بولاتىن.

«مادەنيەت مينيسترلىگى ۆيزيت ورتالىقتىڭ قۇرىلىسىن باستاعانشا، تۋريستىك ماۋسىم ءوتىپ كەتەدى. بايقاۋ ءالى وتكەن جوق. جوبالىق-سمەتالىق قۇجاتتار دايىن ەمەس. وندا نەگە اقشاي سۇرايسىزدار؟ اۋىل شارۋاشىلىعى، قارجى مينيسترلىگىندە دە ءدال وسىنداي ماسەلە. دەمەك بولىنگەن قارجىنىڭ ءبارىن الىپ باسقا سالاعا ءبولىپ بەرۋ كەرەك. ءبارىبىر ەشقانداي ناتيجە جوق»، - دەپ ىزالاندى مينيسترلەر كابينەتىنىڭ ءتوراعاسى.

پرەمەر مينيستر، سونىمەن قاتار، حالىقارالىق بانكتەرمەن كەلىسىم جۇرگىزۋدىڭ ۇزاققا سوزىلىپ كەتكەنىنە اشۋلاندى.

«جەڭىس ماحمۇد ۇلى (ينۆەستيسيا جانە دامۋ ءمينيسترى)، مۇندا دۇنيەجۇزىلىك بانكپەن نەسيە بويىنشا كەلىسىم مەملەكەتتىك ورگانداردىڭ كەلىسسوزدەرىندە قارالىپ جاتىر دەپ جازىلعان. يسلام بانكىمەن دە وسىنداي جاعداي. مۇنىڭ ءبارى قاشان اياقتالادى؟ ءسىزدىڭ ارىپتەستەرىڭىز وسى زالدا وتىر. بارلىق كەلىسسوزدەردى جۇرگىزىپ بولعانشا قىس تۇسەتىن بولدى»، - دەپ تۇيىندەدى پرەمەر مينيستر ءسوزىن.

ەستەرىڭىزگە سالساق، استانادا بۇگىن الەۋمەتتىك-ەكونوميكالىق دامۋ جانە بەس اي ىشىندە ۇكىمەت قارجىسىن يگەرۋ قورىتىندىسى بويىنشا ۇكىمەت ءوتىرىسى ءوتتى.