بالا كەزىم. شامامەن 11-12 جاستامىن عوي دەيمىن. ءتۇن ورتاسى اۋىپ كەتكەن شاق. اۋىلدان 7 شاقىرىم قاشىقتىقتا ورنالاسقان قىستاۋداعى ەسكى ءۇيىمىزدىڭ ءبىر بولمەسىندە وتباسى مۇشەلەرى تۇگەل قاز-قاتار ءتىزىلىپ جاتىرمىز. ادامداردىڭ ءبارى وياۋ. تاقىرىپتان تاقىرىپ تۋىنداپ، قىزۋ اڭگىمەنىڭ تيەگىن اعىتقان ءسات. كەنەت...

بولمەنىڭ ءىشى ادام بەتىندەگى كىشكەنتاي مەڭ دە كورىنەتىندەي جاپ-جارىق بولىپ كەتتى! "ءماسساعان، بۇل نە؟"، – دەپ ورنىمنان ۇشىپ تۇرەگەلدىم. ۇيدەگىلەر "نە بولدى؟"، "نەگە اتىپ تۇردىڭ؟" دەسىپ، ابدىراپ قالدى. Cول كەزدە الگى جارىق 2-3 سەكۋندتاي تۇرىپ، عايىپ بولدى. "جاڭاعى نە جارىق؟"، – دەدىم قاسىمدا جاتقاندارعا. سويتسەم، ول مەنەن باسقا ەشكىمگە كورىنبەپتى. اڭگىمە تىڭداپ وياۋ جاتقانىمدى ايتسام دا سەنبەي، ءبارى مەنى تۇسىمنەن شوشىپ ويانعان ەتىپ قويدى...

تاڭەرتەڭ مالدى ورىسكە ايدار الدىندا شاي ءىشىپ وتىرىپ، ادەتتەگىدەي اكەمنىڭ كەڭەستىك سارى راديوسىن پىسىر-پىسىر ەتكىزىپ، اۋە تولقىنىنان "قازاق راديوسىنىڭ" جەلىسىن تاۋىپ الىپ تىڭدادىق. مىنە، قىزىق! تاڭعى جاڭالىقتاردان كەشە ءقادىر ءتۇنى بولعانىن، سول ءتۇنى بالەن ادامنىڭ مەشىتتەردە دۇعا وقىپ، تىلەك تىلەگەندەرىن حابارلاپ جاتىر. دەمەك، مەن قاسيەتتى ءقادىر ءتۇنىنىڭ ساۋلەسىن كورگەنمىن! ول كەزدە دۇعا-تىلەككە ءتىل سىندىرماق تۇگىل، ءقادىر ءتۇنىنىڭ نە ەكەنىن دە بىلمەيتىن كەزىم ەدى عوي.

ەس ءبىلىپ، ەتەك جيىپ، استانادا گازەت پاراقتاپ وتىراتىن دەڭگەيگە جەتكەندە، شىمكەنت جاقتا تۇندە قوناقتان كەلە جاتىپ، اداسىپ كەتكەن ءبىر كەلىنشەكتىڭ الدىنان جارىق ساۋلە پايدا بولىپ، جولىن ايقىن ەتىپ كورسەتكەنىن وقىپ قالدىم. بۇگىن دە فەيسبۋك الەۋمەتتىك جەلىسىندە قۇرالاي ءىزباساروۆا دەگەن كىسى سوعان ۇقساس ءبىر جايتتى ءبولىستى.

"مەنىڭ ناعاشى اتام سارەسىگە دەيىن مالدىڭ ءجايىن قارايىن دەپ دالادا جۇرگەندە، دالا كۇندىزگىدەي جاپ-جارىق بوپ كەتكەنىن كورىپ، بۇرىن كورمەگەن قۇبىلىس بولعاندىقتان، اعاشتى قۇشاقتاپ الىپ "استاپىراللا" دەي بەرىپتى. تاپ سول ءتۇنى ماساحانا قۇرىپ، دالادا جاتقان شەشەم كەنەت ويانىپ كەتكەن دە "جاڭا عانا جاتىپ ەدىك قوي، مۇنىسى نەسى؟ اللا-اي، بالا-شاعام امان بولسا ەكەن" دەپ يمانىن ءۇيىرىپتى. بۇل تەك بىرنەشە سەكۋندقا عانا سوزىلعان وقيعا ەكەن. ەرتەسىنە ءقادىر تۇنىندەگى اسپاننىڭ اشىلعانىن كورگەندەرىن ۇلكەن اتاسى ءتۇسىندىرىپ بەرىپتى. كۇشتى تىلەك تىلەمەگەندەرىنە وكىنەتىنىن انامىز بىزگە ايتىپ وتىرادى" دەپ جازعان قۇرالاي حانىم. ال مەنىڭ ءالى كۇنگە دەيىن كوز الدىمنان كەتپەگەن بالا كەزىمدەگى الگى تىلسىمدى قاعاز بەتىنە بۇگىن ءبىر-اق تۇسىرۋىمە وسى جازبا تۇرتكى بولدى. ءبىر عاجابى، ول جارىقتىڭ ناعاشى اتاسى مەن شەشەسىنە قاتار كورىنگەنىن ايتىپ وتىر. سوندا ءبىزدىڭ ۇيدە بەلگىسىز ساۋلەنى قالايشا مەنەن باسقا ەشكىم كورمەي قالدى ەكەن؟..

نەگىزىندە تەك بۇگىن عانا تاڭعى 7-گە دەيىن وتباسىما، دوستارىما ارناپ كوپتەگەن دۇعا-تىلەكتەر وقۋمەن بولدىم.

ەركەعالي بولات ۇلى