الماتىدا 12 ماۋسىم كۇنى ونداعان ادام قوناقۇيدە باسپا ءسوز ءماسليحاتىن وتكىزىپ، "جۇڭگو ۇكىمەتىنىڭ وزدەرىنە زەينەتاقىسىن تولەۋدى توقتاتقانىنا" تاعى دا نارازىلىق ءبىلدىردى دەپ حابارلايدى ازاتتىق.

جيىندى ۇيىمداستىرعان "اتا جۇرت" ۇيىمى وكىلدەرىنىڭ ايتۋىنشا، قىتايدان زەينەتاقىسىن الا الماي جۇرگەن جۇزدەن استام ادام بار. كوبى قازاقستاننىڭ ءار وڭىرىندە تۇراتىندىقتان بۇگىنگى جيىنعا كەلە الماعان.

جينالعاندار وزدەرىنىڭ قىتايدا زەينەتكەرلىككە شىعىپ، قازاقستانعا قونىس اۋدارعان سوڭ زەينەتاقىلارىن الىپ جۇرگەنىن، ال بىلتىردان باستاپ زەينەتاقىلارىن تولەۋ توقتاتىلعانىن ايتادى. ولاردىڭ ايتۋىنشا، جۇڭگو زاڭى بويىنشا، قىتايدا زەينەتكە شىققان ادامعا ول شەتەل ازاماتتىعىن السا دا زەينەتاقىسى تولەنە بەرەدى.

نارازىلار قىتايدىڭ وزدەرىنە زەينەتاقى تولەۋدى نە سەبەپتى توقتاتقانىن ەشكىم تۇسىندىرمەگەنىن ايتادى.

ماحات ناديا ەسىمدى زەينەتكەردىڭ ايتۋىنشا، بىلتىرعى جىلدىڭ باسىندا جۇڭگو ۇكىمەتى وزىنە ىقتيار حاتتىڭ كۇشىن جويىپ، قايتادان كەلۋىن تالاپ ەتكەنىن ايتتى.

— بالالارىم قازاقستان ازاماتتارى. سونى ايتىپ، قىتايعا بارا المايمىن دەپ ەدىم، ولار زەينەتاقىمدى توقتاتىپ تاستادى، - دەدى ماحات ناديا.

سەرىكجان ءبىلاش ەسىمدى بەلسەندى جينالعاندار جۇڭگو ۇكىمەتىنەن "زاڭدى زەينەتاقىسىن" تولەۋدى تالاپ ەتەتىنىن، ەگەر وزدەرىنە رەسمي جاۋاپ بەرمەسە، حالىقارالىق سوتقا جۇگىنۋگە ءماجبۇر بولاتىندارىن مالىمدەدى.

زەينەتكەرلەر جيىننان سوڭ قىتايدىڭ الماتىداعى كونسۋلدىعىنا تالاپ-ارىزدارى جازىلعان حات تاپسىرماققا باردى. كونسۋلدىق وكىلدەرى ءقازىر ولاردى قابىلداي المايتىنىن ايتىپ، تۇستەن كەيىن كەلۋدى سۇرادى.

اقپاننىڭ 5ء-ى كۇنى ونداعان ادام الماتىداعى جۇڭگو كونسۋلدىعىنا جۇڭگو ۇكىمەتىنەن زاڭدى زەينەتاقىسىن تولەۋدى تالاپ ەتىپ، حات تاپسىرعان. بۇگىن جينالعان توپ ول حاتتارىنا ءالى جاۋاپ الا الماعانىن ايتادى.