23 ماۋسىمدا وتەتىن ميتينگىگە شىقپايمىن جانە وزگەلەرگە دە شىقپاۋعا كەڭەس بەرەمىن. نەگە ەكەنىن ءتۇسىندىرىپ وتەيىن.

1.ءابليازوۆ مەن ءۇشىن اۆتوريتەتتى تۇلعا ەمەس، ءتىپتى ول ءۇشىن ءبىر جەرگە اياق اتتاپ باسۋعا تۇرمايدى. قالا بەردى، ول وپپوزيسيا ليدەرى دە، مونوپوليالىق وكىل دە ەمەس.

ءوزىن يمام حومەيني رەتىندە كورسەتكىسى كەلگەن بولار، ءبىراق ونىسىنان دا تۇك شىقپايدى. ول – بۇگىنگى بيلىك جۇيەسىنىڭ ناتيجەسى، ول – قىلمىسكەر. بىرەۋدى سىناماس بۇرىن ءوزى قانشاما زاڭدى سۇراقتارعا جاۋاپ بەرۋى ءتيىس.

2. پوپۋليزمگە عانا جەتەلەيتىن ءابليازوۆتىڭ ناسيحاتىن مۇلدەم ۇناتپايمىن. تەگىن ءبىلىم، تارتىپ الىپ، ءبولىپ بەرۋ، تەگىن تاراتۋ، تەگىن سالۋ – مۇنىڭ ءبارى نەوبولشيەۆيزم. ونسىز دا ىدىراۋعا شاق قالعان قوعامدى جىك-جىككە بولەتىن امال عانا.

بولشيەۆيكتىك ۇرانداردىڭ سوڭى نەگە اكەپ سوققانى تاريحتان بەلگىلى: اتىس، سوعىس جانە اشتىق.

3. 23 ماۋسىمداعى ميتينگ – ارانداتۋ. بۇل كۇن – پوليسيا مەن مەملەكەتتىك قىزمەتكەرلەردىڭ كاسىبي مەرەكەسى. مۇنىڭ ءتۇبى جانجالعا اكەپ سوعاتىنىن ءتۇسىنۋ ءۇشىن ارتىق ويلانۋدىڭ قاجەتى جوق.

ءابليازوۆتىڭ ءدال وسى كۇندى تاڭداۋىنىڭ استارىنان مىنانى اڭعارۋعا بولادى: ول حالىق پەن پوليسيانى قاعىستىرىپ قويىپ، قان توگىلگەنىن قالايدى. ونىڭ لوگيكاسى وتە قاراپايىم: نەعۇرلىم كوپ ادام زارداپ شەكسە، سوعۇرلىم جاقسى. مەنىڭشە، پاريجدە وتىرىپ الىپ حالىقتى بيلىككە ايداپ سالۋعا ءابليازوۆتىڭ مورالدىق قۇقىعى جوق. ارينە، ونىڭ شاقىرعان اكسيالارىنا قاتىسىپ، ايتقانىنان شىقپايتىندار زارداپ شەكسە، جاۋاپ بەرەتىن دە، مورالدىق، قارجىلىق شىعىندارىن وتەيتىن دە ءوزى ەمەس. ونى قولداماڭىزدار دەمەيمىن، الايدا ءوزىم ونىڭ قۇرالىنا اينالعىم كەلمەيدى.

جاعدايدى قيىنداتىپ، ءابليازوۆتى ناسيحاتتاپ وتىرعان – بيلىكتىڭ ءوزى، بۇعان انىق كوزىم جەتتى. ونىڭ پاراقشالارىن بۇعاتتاپ اۋرەلەنگەنشە، پىكىرسايىستار مەن اشىق كەڭىستىككە مۇمكىندىك بەرىپ، تەلەارنالار قۇرۋ كەرەك. ميتينگىلەرگە تىيىم سالعاننان ساياسي الاڭدى كەڭەيتىپ، ميتينگىلەر جايلى زاڭدى جەڭىلدەتۋ الدەقايدا ءتيىمدى. ءار قالادا حالىق ءوز پىكىرىن ەركىن بىلدىرە الاتىن، نارازىلىعىن جەتكىزە الاتىن گايد-پارك بولۋى ءتيىس.  ەلدىڭ دامۋىن كوزدەيتىن ونداعان پارتيا قۇرىلسىن. ولار بىر-بىرىنە باسەكەلەس بولا وتىرىپ، ەلدىڭ دامۋى مەن كوركەيۋىنە سەپتىگىن تيگىزەتىن بولادى.

ايدوس سارىمنىڭ Facebook پاراقشاسىنان