مۇعالىمدەرگە نەسيە الدىرىپ، جالاقىلارىن جەكە پايداسىنا جاراتقان مەكتەپ ديرەكتورىنىڭ باسى داۋعا قالدى. كەلىنشەك قول استىنداعى قىزمەتكەرلەرىنەن قارىزعا اقشا الىپ، ونى قايتارۋدى سۇراعاندارعا جۇمىستان شىعارامىن دەپ سەس كورسەتكەن، دەپ جازادى Qamshy.kz اقپارات اگەنتتىگى ەۋرازيا ارناسىنا سىلتەمە جاساپ.
قاراعاندى وبلىسىنداعى اققوي اۋىلىنداعى جيىرما ۇستاز وسىلاي دەپ، ءبىزدىڭ ارناعا جانايقايلارىن جەتكىزدى. ءبىلىم ورداسىنا جينالعان پەداگوگتار ءبىر ءپاتۋاعا كەلمەي، ديرەكتورلاردىڭ جاقتاستارىمەن جۇدىرىقتاسۋعا دەيىن باردى. وقيعا ورنىندا ءبىزدىڭ تىلشىلەرىمىز دە بولىپ قايتقان ەدى!
وقۋشىلاردى جازعى دەمالىسقا جىبەرە سالا، بىر-بىرىمەن جاعا جىرتىسقان مەكتەپ قىزمەتكەرلەرى بۇل. ءبىر تاراپ - قارىزعا بەلشەسىنەن باتىرىپ قانا قويماي، وزىنە دوق كورسەتكەن ديرەكتورىنا قارسى داۋ شىعارسا، ەندى بىرەۋلەرى مەكتەپ باسشىسىنا شاڭ جۋىتپاي الەك.
«ءاي، بىر-بىرىڭە ايتاقتاپ نە بولدى؟ بىر-بىرىڭە ايتاقتاپ سالىپ؟!))
شەت اۋدانىنا قاراستى اققوي اۋىلىنداعى ۇستازداردان ۇيقى كەتكەلى قاشان؟! ديرەكتور جانار جامانادينانىڭ جاماندىعىن كورىپ، جاستىققا باستارى تيمەگەن جاس ماماندار باسشىسىنىڭ بار بىلىعىن جايىپ سالدى.
«سەنى جۇمىسقا الۋ ءۇشىن ۆاحتەردىڭ ورنىنا، ماعان بەس ايلىق جالاقىڭدى بەرىپ وتىراسىڭ دەدى. مەن ونى المايمىن. سوسىن بەس ايلىقتى ول كىسىگە اپارىپ ءجۇردىم. كارتوچكاما تۇسەدى اقشا، 27 مىڭدى ول كىسىگە اپارامىن» - دەيدى اققوي اۋىلىنداعى جالپى ءبىلىم بەرۋ مەكتەبىنىڭ قىزمەتكەرى جاننا زۇلپىحارايەۆا.
مەكتەپ ىشىنەن اشىلعان شاعىن بالاباقشا قىزمەتكەرلەرىنىڭ ءوزى ديرەكتوردان ابدەن زارەزاپ بولعان. بالالارعا ارنالعان اس-سۋدى جەتكىزۋشى مەردىگەر كومپانياعا اقشا تولەۋدەن باس تارتقان باسشى قاراجاتتى تولەۋگە بوبەكجاي ماماندارىن مىندەتتەگەن.
«ارينە بىزگە قىسىم كورسەتەدى! «مەن سەندەرگە وسى بالاباقشانى اشىپ بەردىم، مەن قىسقارتام، مەن جابام، مەن شىعارام» دەپ بىزگە قىسپاق كورسەتىپ، ايقايلايدى» - دەيدى اققوي اۋىلىنداعى بالاباقشا قىزمەتكەرى بازارحان نۇرجان.
شىندىق ىزدەپ شىرىلداپ جۇرگەندەردىڭ ءبىرى – داۋلەتكەرەي كابەي. ول وسى مەكتەپتە 15 جىلدان بەرى ۇزدىكسىز جۇمىس ىستەپ كەلە جاتقان ايەلىنىڭ قۇقىعىن قورعاپ كەلگەن.
«ءبىر جارىم جىل بولدى، وسى جاڭا ديرەكتور كەلگەلى ايەلىم قىسىپ كورىپ ءجۇر. باسىندا بىلمەدىك ول كىسىنىڭ الاياق ەكەنىن. 60 مىڭ تەڭگە قارىزعا اقشا الىپ، قايتارمادى. انە بەرەم، مىنە بەرەم دەپ ءجۇردى، قارىزدى سۇراسا «جۇمىستان شىعارامىن، ايلىعىڭدى قىسقارتامىن»، دەپ قورقىتقان» - دەيدى اققوي اۋىلىنىڭ تۇرعىنى داۋلەتكەرەي كابەي.
مەكتەپ قىزمەتكەرلەرى ديرەكتوردىڭ بىلىعىن ايتىپ اۋداندىق ءبىلىم بولىمىنە تالاي بارسا دا، ارىزدارى اياقاستى بولادى ەكەن. شەت اۋدانىنداعى «شەفتەرى» ەش دالەلدەرىڭىز جوق دەپ، شاعىمدارىن كەرى قايتارۋدان ششارشامايتىن كورىنەدى.
«جيىرما بەس ءمۇعالىمنىڭ جيىرماسى ادىلەتتىلىك تابا الماي، وسىنداي قادامعا بارۋعا تۋرا كەلىپ تۇر. بۇل قادامنىڭ ارتىندا ۇلكەن سالماق بارىن ءبىز دە تۇسىنەمىز، ءبىزدىڭ باسىمىزعا قانداي نارسە كەلەتىنىن. ادىلەتتىلىك تابا المادىق، ءبىز جۇگىرىپ ءبىراز جەرگە ارىزداندىق. بارلىعى كەلىپ اۋدان كولەمىنە كەلىپ تىرەلەدى، ال اۋدانداعىلار «دالەلدەرىڭىز جوق»، دەپ جابۋلى قازان كۇيىندە قالادى» - دەيدى اققوي اۋىلىنداعى جالپى ءبىلىم بەرۋ مەكتەبىنىڭ ءمۇعالىمى زاعيراش ەستاي قىزى.
مەكتەپتەگى ماماندارمەن بىرنەشە مينۋتتىق سۇحباتتار ۇزىلە بەردى. ديرەكتور جانار جامانادينانىڭ جاماندالعانىنا جانى شىداس بەرمەگەن جاقتاستارى كوشەگە شىعىپ تا جانجال شىعاردى.
«ەلگە قىسىم كورسەتىپ جاتىر! نە قىسىم، ۇرىپ جاتىر ما، سوعىپ جاتىر ما؟ اقشا الىپ جاتىر؟ كىمنەن اقشا الىپ جاتىر؟».
ديرەكتورعا شىن جانى اشىعان جان با، الدە باسى بالەگە قالعان باسشىنىڭ تۋىسى ما كىم ءبىلسىن، جانجالعا اۋىلداعى كەيۋانالاردىڭ ءبىرى دە كيلىكتى.
«مەن شىندىقتى ايتامىن، مۇعالىمدەر وزدەرى كەلىپ ءبولىنىپ الدى بۇلار».
ال جانجالعا سەبەپكەر بولعان جانار جامانادينانىڭ اۋرۋحانادا جاتقانىن بىلدىك. دەرەۋ تەلەفون ءنومىرىن تاۋىپ، ديرەكتوردى سوزگە تارتتىق. ءبىلىم ورداسىنا باسشىلىق ەتكەنىنە كوپ بولا قويماعان كەلىنشەك، قول استىنداعى قىزمەتكەرلەرىنىڭ كەسىرىنەن دەنساۋلىعى كۇرت ناشارلاپ، اۋرۋحانا توسەگىنە تاڭىلعانىن جايىپ سالدى.
«مەنىڭ تاراپىما كەلىپ تۇسكەن ارىز-شاعىمدار بويىنشا، بۇل بارلىعى جالعان مالىمەتتەر. بۇل مالىمەتتەر زاڭ اياسىندا شەشىلۋى كەرەك. بۇل اۋىل تۇرعىندارىنا مەكتەپ مۇعالىمدەرى تاراپىنان ءتۇسىپ جاتقان ارىزداردى توقتاتۋ كەرەك دەپ ەسەپتەيمىن. 1،5 جىلدىڭ ىشىندە بۇل دەنساۋلىعىما اسەر ەتىپ، قازىرگى تاڭدا اۋرۋحانادا جاتىرمىن. دەنساۋلىعىما قاتتى اسەر ەتتى وسى جاعدايلاردىڭ بارلىعى. ءوزىمنىڭ مەكتەبىمنىڭ مۇعالىمدەرى عوي دەپ بارىنە كوز جۇما قاراعان ەدىم. ەندى اۋرۋحانادان شىققان بويدا، زاڭ ورىندارىنا جۇگىنەمىن دەپ شەشىم قابىلداپ وتىرمىن» - دەيدى اققوي اۋىلىنداعى جالپى ءبىلىم بەرۋ مەكتەبىنىڭ ديرەكتورى جانار جامانادينا.
ال شەت اۋدانىنىڭ ءبىلىم ءبولىمىنىڭ باسشىسىنىڭ سوزىنشە، ءىستىڭ اق-قاراسى انىقتالۋ ۇستىندە. مۇعالىمدەردىڭ شاعىمى تولىق تەكسەرىلىپ، بىرەر كۇندە شەشىم شىعارىلادى.
«اۋەلگى تۇسكەن وتىنىشتەر بويىنشا بىرنەشە رەت بارىپ كەزدەسۋ وتكىزىلىپ، بىرنەشە رەت بارىپ تەكسەرىس جۇمىستارى جۇرگىزىلدى. زاڭ ورىندارىنا بۇل قاعازدار جىبەرىلگەن. ناقتى زاڭ ورگاندارى بىر-ەكى كۇندە جاۋاپتارىن بەرۋى كەرەك» - دەيدى شەت اۋدانى ءبىلىم ءبولىمىنىڭ باسشىسى ەلدوس سماعۇلوۆ.
قوس تاراپتىڭ قايسىسى دۇرىس، قايسىسى بۇرىس ەكەنىن ەندى زاڭ ورگاندارى انىقتايتىن بولادى. ازىرگە، مەكتەپ مۇعالىمدەرى مەن ديرەكتور اراسىنداعى داۋعا قاتىستى اۋىل تۇرعىندارىنىڭ ءدۇدامال بولجامدارى مەن قاڭقۋ سوزدەرى ەلدىمەكەندە جەلدەي ەسىپ ءجۇر.
پىكىر قالدىرۋ