قازاقستاننىڭ ۇلتتىق بانكى تەڭگە باعامى تومەندەيدى جانە ينفلياسيا دەڭگەيى وسەدى دەگەن قاۋەسەتكە قاتىستى مالىمدەمە جاسادى، - دەپ حابارلايدى Tengrinews.kz.

قارجى رەتتەۋشىسىنىڭ مالىمەتىنشە، الەۋمەتتىك جەلىلەردە جانە مەسسەندجەرلەردە تەڭگە باعامىنىڭ قۇلدىرايتىنى جانە ينفلياسيا دەڭگەيىنىڭ ءوسۋى تۋرالى جالعان اقپارات تاراپ جاتىر. "قازاقستاننىڭ ۇلتتىق بانكى بۇل مالىمەتتەردىڭ شىندىققا جاناسپايتىنىن حابارلايدى. قازىرگى ۋاقىتتا اسەرى بار ءارى انىق قاتەر جوق"، - دەپ مالىمدەدى ۇلتتىق بانكتەگىلەر.

سوڭعى ۋاقىتتاردا بايقالىپ جاتقان تەڭگەنىڭ ازداپ اۋىتقۋىنا ءبىرىنشى كەزەكتە شەتەلدىك ۆاليۋتاعا دەگەن ەڭبەك دەمالىستارىنا بايلانىستى ماۋسىمدىق سۇرانىستىڭ ءوسۋى سەبەپ ەكەنى ايتىلادى. تاعى ءبىر فاكتورى اقش فەدەرالدىق رەزەرۆ جۇيەسىندەگى مولشەرلەمەنىڭ ءوسۋى ەكەن. ونىڭ ناتيجەسىندە اقش دوللارىنىڭ الەمدىك نارىقتا نىعايۋى مەن دامۋشى نارىقتاردان كاپيتالىنىڭ ازداعان تومەندەۋى بايقالادى.  

"مۇناي الەمدىك نارىعى تاراپىنان تەڭگە ايىرباس باعامىنا جاعىمدى اسەرىن تيگىزىپ وتىرعانى بايقالادى. مۇنايدىڭ ورتاشا باعاسى باررەلىنە 70 دوللارعا جۋىقتايدى. وسىنىڭ ەسەبىنەن ەلدىڭ تولەم بالانسى جاقسارادى"، - دەلىنگەن حابارلامادا.

ۇب مالىمەتىنشە، جىلدىق ينفلياسيا ارناۋلى ءدالىز ىشىندە تومەندەپ جاتىر. مامىردا ونىڭ دەڭگەيى 6 پايىزعا تەڭ بولعان. سونىمەن قاتار، جىل باسىنان بەرى ينفلياسيانىڭ بارلىق قۇرامسى بويىنشا تومەندەۋى بايقالعان.  

ۇلتتىق بانك جالعان مالىمەت تاراتۋشىلاردى تابۋ ءۇشىن قۇقىق قورعاۋ ورگاندارىنا جۇگىندى.