تەلەگرام مەسسەندجەرىنىڭ نەگىزىن قالاۋشى پاۆەل دۋروۆ قازاقستان جۋرناليستەر وداعى سىيلىعىنىڭ لاۋرەاتى اتاندى، دەپ حابارلايدى Qamshy.kz اقپارات اگەنتتىگى.
دۋروۆتىڭ سەنزۋرا مەن مەملەكەتتىڭ ادامداردىڭ ەركىن حات الماسۋىنا ارالاسۋ ۇردىسىنە قارسى پوزيسياسى وداق تاراپىنان قولداۋعا يە بولعان.
"ينتەرنەت-جوبا" نوميناسياسى بويىنشا "ۆكونتاكتە" الەۋمەتتىك جەلىسى مەن "تەلەگرام"-نىڭ نەگىزىن قالاۋشى پاۆەل دۋروۆ ماراپاتتالدى"، - دەپ جازىلعان قازاقستان جۋرناليستەر وداعىنىڭ سايتىندا.
پاۆەل ۆالەريەۆيچ دۋروۆ - ورىس كاسىپكەرى، پروگرامميست، ميللياردەر، "ۆكونتاكتە" الەۋمەتتىك جەلىسىن جاساۋشىلاردىڭ ءبىرى. وسى جەلى ارقىلى تمد ەلدەرىندە تانىمالدىلىققا يە. 2014 جىلى "ۆكونتاكتە" جەلىسىنىڭ باس ديرەكتور لاۋىزىمىنان ءتۇسىپ، "تەلەگرام" مەسسەندجەرىن جاساۋدى قولعا الادى. اتالمىش جەلىنىڭ شيفرلاۋ كىلتتەرىن فەدارالدىق قاۋىپسىزدىك قىزمەتىنە بەرۋدەن باس تارتقان سوڭ روسكومنادزور مەكەمەسى رەسەيدە Telegram-دى بۇعاتتاۋ قۇقىعىنا يە بولعان. پاۆەل دۋروۆ ءفسب-نىڭ بۇل تالابى رەسەي كونستيتۋسياسىنىڭ "ءار ازاماتتىڭ جازعان حاتتارىن قۇپيا ۇستاۋىنا قۇقىعى بار" دەگەن ەرەجەسىنە قايشى كەلەتىنىن ايتادى.
پىكىر قالدىرۋ