مەملەكەت باسشىسىنىڭ «ءاربىر وتباسى ءۇشىن باسپانا الۋدىڭ جاڭا مۇمكىندىكتەرىن بەرۋ» الەۋمەتتىك باستاماسىن ىسكە اسىرۋ ءۇشىن كرەديتور مەن قارىز الۋشىنىڭ مۇددەلەرى اراسىنداعى مۇددەلەر تەڭگەرىمىنىڭ ساقتالۋىن قامتاماسىز ەتەتىن قۇقىقتىق ورتانى قۇرۋ قاجەت. بۇل تۋرالى بۇگىن قازاقستان ۇلتتىق بانكىنىڭ ءتوراعاسى دانيار اقىشيەۆ ق ر پارلامەنتى سەناتىنىڭ پلەنارلىق وتىرىسىندا بايانداما جاساعان كەزدە ايتىپ بەردى، دەپ حابارلايدى Qamshy.kz اقپارات اگەنتتىگى ق ر ۇلتتىق بانك باسپا ءسوز قىزمەتىنە سىلتەمە جاساپ.
ول باعدارلامانىڭ بولاشاقتا ورنىقتىلىعىنىڭ ماڭىزدى تالابى بانك پەن بورىشكەردىڭ نارىقتىق قاعيداتتاردى ساقتاۋى، ونىڭ ىشىندە پروبلەمالىق بەرەشەكتى
سوتقا دەيىن رەتتەۋ جانە كەپىل كرەديتورلارىنىڭ باسىمدىعى ماسەلەلەرىندە ساقتاۋ بولىپ
تابىلاتىنىن اتاپ ءوتتى.
«كەپىل ينستيتۋتى جان-جاقتى بولۋى كەرەك. كەپىل ۇستاۋشىنىڭ ءوز تالاپتارىن قاناعاتتاندىرۋ ءۇشىن كەپىل مۇلكىن كەدەرگىسىز ءارى دەرەۋ ساتۋ مۇمكىندىگى بولۋعا ءتيىس. مۇنداي تۇزەتۋلەرسىز 7-20-25 باعدارلاماسىن ءساتتى ىسكە اسىرۋ مۇمكىن ەمەس»، - دەپ قورىتىندىلادى قازاقستان ۇلتتىق بانكىنىڭ باسشىسى.
د. اقىشيەۆتىڭ ايتۋىنشا، زاڭنامالىق تۇزەتۋلەر قابىلدانعان جاعدايدا، بانكتەر
حالىققا جاقىن ارادا كرەديتتەر بەرە باستايدى.
ءسوزىن قورىتىندىلاي كەلە د. اقىشيەۆ سەنات دەپۋتاتتارىنا وسى زاڭ جوباسىن قاراۋ شەڭبەرىندە جۇرگىزگەن جۇمىسى ءۇشىن العىس ءبىلدىردى.
ول قاراستىرىلىپ وتىرعان زاڭ جوباسىنىڭ قارجى نارىعىنداعى احۋالدى ايتارلىقتاي جاقسارتۋعا، ءبىزدىڭ ازاماتتاردىڭ قۇقىقتارىن قورعاۋعا جانە ەكونوميكالىق ءوسۋدى قامتاماسىز ەتۋ ءۇشىن ۇزاقمەرزىمدى قورلاندىرۋدى قامتاماسىز ەتۋگە مۇمكىندىك بەرەتىنىن اتاپ ءوتتى.
پىكىر قالدىرۋ