قازاقستاننىڭ حالىق ءارتيسى روزا رىمبايەۆا دەمالىس كۇندەرى استانادا وتەتىن «دۋماندى سارىارقا» كونسەرتتىك باعدارلاماسىنا قاتىسادى، دەپ حابارلايدى استانا اكىمدىگىنىڭ رەسمي سايتى. 

قازاقستاندىق ەسترادا جۇلدىزى ەلوردانىڭ 20 جىلدىعىن مەرەكەلەۋ اياسىندا 1 شىلدەدە ۇركەر كەنتىندە (يلينكا) ونەر كورسەتەدى. كونسەرت №69 مەكتەپ-گيمنازياسىنىڭ اۋماعىندا وتەدى. ەلوردا اكىمدىگىنىڭ مۇرىندىق بولۋىمەن وتەتىن شارا ساعات 19:00-دە باستالادى.

قالا تۇرعىندارى مەن قوناقتارى روزا رىمبايەۆادان باسقا دوسىمجان تاڭاتاروۆتىڭ، دوستىڭ، اعايىندى جۇگىنىسوۆتەردىڭ، «ارت دومبىرا» تريوسىنىڭ، «ءداۋىر» دۋەتىنىڭ، اسەم وماروۆا مەن باسقا دا ارتىستەردىڭ ونەرىن تەگىن تاماشالاي الادى.

ەكى جىلدان بەرى جازدا مادەني-بۇقارالىق ءىس-شارالار تەك قالادا عانا ەمەس، سونىمەن قاتار ونىڭ شەت اۋماقتارىندا دا ۇيىمداستىرىلىپ كەلەدى. جەكسەنبى كۇندەرى پريگورودنىي، ينتەرناسيونالنىي، ميچۋرينو، كۇيگەنجار، ءوندىرىس، جەلەزنودوروجنىي، ۇركەر، كوكتال، پرومىشلەننىي جانە كازگورودوك كەنتتەرىنىڭ تۇرعىندارى ءۇشىن مەرەكەلىك شارالار وتكىزىلەدى.

دەمالىس كۇنگى «دۋماندى سارىارقا» كونسەرتتەرى تۇرعىن الاپتارى تۇرعىندارىنىڭ اراسىندا كەڭىنەن بەلگىلى. شارا اياسىندا تانىمال قازاقستاندىق ارتىستەر، قانات ءالجاپپاروۆ پەن قايرات ادىلگەرەي سىندى ازىلكەشتەر ونەر كورسەتەدى. بۇدان باسقا، بي جانە مۋزىكالىق ۇجىمدار، كوشە تەاترلارىنىڭ ارتىستەرى، انيماتورلار، ينتەراكتيۆتى ويىندار وتكىزەتىن بويشاڭ قۋىرشاقتار دا بەلسەنە قاتىسادى.

بيىل دەمالىس كۇنگى «دۋماندىسارىارقا» كونسەرتتەرى 1 ماۋسىمنان 2 قىركۇيەككە دەيىن ۇيىمداستىرىلادى. بارلىق شارالار اشىق الاڭداردا تەگىن وتەدى.