نۇرسۇلتان نازاربايەۆ ورتالىق ازيا ەلدەرىنىڭ باسشىلارىمەن بىرگە «استانا» حالىقارالىق قارجى ورتالىعىن تانىستىرۋ راسىمىنە قاتىستى، دەپ حابرالايدى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاساپ.
مەملەكەت باسشىسى قىرعىز رەسپۋبليكاسىنىڭ پرەزيدەنتى سوورونباي جەەنبەكوۆپەن، تاجىكستان رەسپۋبليكاسىنىڭ پرەزيدەنتى ەمومالي راحمونمەن، وزبەكستان رەسپۋبليكاسىنىڭ پرەزيدەنتى شاۆكات ميرزيويەۆپەن بىرگە «استانا» حالىقارالىق قارجى ورتالىعىنىڭ اشىلۋىنا ارنالعان سيفرلاندىرۋ كورمەسىن ارالاپ كوردى.
قازاقستان پرەزيدەنتى يننوۆاسيالىق قارجى تەحنولوگيالارىن دامىتۋدى كوزدەيتىن ءتيىمدى ورتانى قالىپتاستىرۋ «استانا» حالىقارالىق قارجى ورتالىعى قىزمەتىنىڭ بىردەن-بىر ماڭىزدى باعىتى ەكەنىن ايتتى.
– «استانا» حالىقارالىق قارجى ورتالىعىنىڭ جۇمىسىنا قاتىسۋشىلار ءۇشىن قازاقستاننىڭ عانا ەمەس، بۇكىل الەمنىڭ كاپيتالى قولجەتىمدى بولادى. قارجى ورتالىعىندا پوستكەڭەستىك كەڭىستىكتە بالاماسى جوق، بۇرىن-سوڭدى بولماعان جاعدايلار جاسالدى. كەشە عانا ءبىز سالتاناتتى جاعدايدا زاماناۋي جوعارى تەحنولوگيالى ينفراقۇرىلىمى بار «استانا» حالىقارالىق قارجى ورتالىعى بيرجاسىنىڭ جۇمىسىن باستادىق. بۇگىندە ونىڭ قىزمەتىنە امەريكالىق ناسداك بيرجاسى جانە شانحاي قور بيرجاسى قاتىسىپ وتىر، – دەدى نۇرسۇلتان نازاربايەۆ.
تانىستىرىلىم بارىسىندا قازاقستاندا يننوۆاسيالىق قارجى تەحنولوگيالارىن دامىتۋ مەن ىلگەرىلەتۋ ءۇشىن قولايلى ەكوجۇيەنى قالىپتاستىرۋعا باعىتتالعان ءبىرقاتار جوبالار كورسەتىلدى. سونىڭ ىشىندە، e-Justice (احقو سيفرلىق سوت تورەلىگى جۇيەسى)، سيفرلىق كريپتوبيرجا، كريپتوۆاليۋتالار ءۇشىن دەپوزيتاريي، قارجىلىق سۋپەرماركەت، كيبەرقاۋىپسىزدىك ورتالىعى، يسلام قارجى تەحنولوگيالارى، حالىقارالىق ستارتاپ باعدارلامالارى مەن باسقا دا جوبالار بار.
«استانا» حالىقارالىق قارجى ورتالىعىنىڭ باسقارۋشىسى قايرات كەلىمبەتوۆ ورتالىق ازيا ەلدەرىنىڭ باسشىلارىنا قارجى ورتالىعى قىزمەتىنىڭ نەگىزگى قاعيداتتارى جانە ءوڭىردىڭ قارجى جۇيەلەرى ءۇشىن جول اشاتىن مۇمكىندىكتەر جونىندە اڭگىمەلەپ، جىبەك جولىنىڭ بويىندا ورنالاسقان ەلدەردىڭ كاسىپكەرلەرىن قارجى ورتالىعىنىڭ قىزمەتىنە بەلسەندى اتسالىسۋعا شاقىردى.
سونداي-اق، تانىستىرىلىم راسىمىندە «استانا» حالىقارالىق قارجى ورتالىعى سوتىنىڭ ءتوراعاسى لورد گارري كەننەت ۆۋلف جانە قارجى ورتالىعىنىڭ باسقارۋشى ديرەكتورى، ۇزدىكسىز كاسىبي دامۋ بيۋروسىنىڭ كۋراتورى ەرنۇر رىسماعامبەتوۆ ءسوز سويلەدى.
