جۋىردا ورال قالاسىندا تەحنيكالىق جانە كاسىپتىك ءبىلىم بەرۋ ۇيىمدارىنىڭ ستۋدەنتتەرى اراسىندا وبلىستىق «سيفرلى وقۋ ورنى» يننوۆاسيالىق جوبالار جارىسى ۇيىمداستىرىلدى. «رۋحاني جاڭعىرۋ» باعدارلاماسىن تىرەك ەتكەن بايقاۋعا بقو-نىڭ 14 كوللەدجىنەن 27 ۇمىتكەر قاتىسىپ، ءوز جوبالارىن ۇسىندى. بايقاۋ ناتيجەسىندە ەكى سەكسيا بويىنشا ورال قالاسىنداعى ج.دوسمۇحامەدوۆ اتىنداعى پەداگوگيكالىق كوللەدج ستۋدەنتتەرىنىڭ جوبالارى ۇزدىك شىقتى.

وبلىستىق ءبىلىم باسقارماسىنىڭ مەكتەپكە دەيىنگى، جالپى ورتا، تەحنيكالىق جانە كاسىپتىك ءبىلىم بەرۋ ۇيىمدارىنىڭ وبلىستىق وقۋ-ادىستەمەلىك كابينەتىنىڭ ۇيىمداستىرۋىمەن وتكەن بايقاۋ ستۋدەنتتەردىڭ يننوۆاسياعا دەگەن قىزىعۋشىلىعىن ارتتىرىپ، سيفرلىق ساۋاتتىلىقتارىن دامىتۋدى كوزدەدى. وبلىستىق وقۋ-ادىستەمەلىك كابينەتىنىڭ ءبولىم باسشىسى رايگۇل قۋانشالييەۆانىڭ ايتۋىنشا، اتالمىش بايقاۋ العاش رەت وتكىزىلىپ وتىر.

– ەلباسىمىز بيىلعى جولداۋىنىڭ «ادامي كاپيتال – جاڭعىرۋ نەگىزى» باعىتىندا «جۇمىس بەرۋشىلەردى تارتۋ ارقىلى جانە حالىقارالىق تالاپتار مەن سيفرلىق  داعدىلاردى ەسكەرە وتىرىپ، تەحنيكالىق جانە كاسىپتىك ءبىلىم بەرۋ ۇيىمدارىنداعى باعدارلامالاردى جاڭارتۋ كەرەكپىز» دەپ اتاپ وتكەن بولاتىن. بايقاۋ وسى تاپسىرماعا وراي وتكىزىلدى، – دەدى ر.تىلەكقابىل قىزى.

ورال گاز، مۇناي جانە سالالىق تەحنولوگيالار كوللەدجىندە وتكەن بايقاۋ «مالىمەتتەر بازاسىن ازىرلەۋدەگى ۇزدىك جوبا»، «ەلەكتروندى-سيفرلىق رەسۋرس ازىرلەۋ سالاسىنداعى ۇزدىك جوبا»، « ءموبيلدى  قوسىمشالاردى ازىرلەۋ سالاسىنداعى ۇزدىك جوبا»، «ۇزدىك انيماسيالىق جوبا»، «دامىتۋ ويىندارىنىڭ ۇزدىك جوباسى (الەۋمەتتىك جەلىلەر ءۇشىن)» سەكىلدى بەس باعىتتى قامتىدى. ءادىلقازىلاردىڭ شەشىمىمەن ءبىرىنشى سەكسيادا ج.دوسمۇحامەدوۆ اتىنداعى   پەداگوگيكالىق كوللەدجىنىڭ ستۋدەنتى انداس قاجىموۆتىڭ «دامىتۋ ويىندارىنىڭ ۇزدىك جوباسى» باعىتى بويىنشا «لاتىنقاز» ويىنى  تاقىرىبىنداعى جوباسى ۇزدىك دەپ تانىلدى. ەكىنشى سەكسيادا دا اتالمىش كوللەدجدىڭ ستۋدەنتى اسىلحان ءاجىمۇرات ءبىرىنشى ورىن الدى. اسىلحان ەلەكتروندى-سيفرلىق رەسۋرس ازىرلەۋ سالاسىنداعى ۇزدىك جوبا ( ەلەكتروندى وقۋلىقتار، ەلەكتروندى وقۋ قۇرالدارى) باعىتى بويىنشا «لاتىن ءالىپبيى» ەلەكتروندىق وقۋ قۇرالى تاقىرىبىندا جوباسى مەن ەرەكشەلەندى. Adobe Flash باعدارلاماسىمەن جاسالعان جوبانى باستاۋىش سىنىپتان باستاپ جوعارى سىنىپ وقۋشىلارىنا دەيىن پايدالانا الادى. بالالاردىڭ لاتىن ءالىپبيىن ەسكە ساقتاۋى ءۇشىن قاجەتتىلىگىمەن قۇندى جوبا قولدانۋشىسىن ارنايى انيماسيالارمەن قىزىقتىرادى. مۇندا 32 لاتىن ءقارپى جانە ءوز پەرنەتاقتاسى بار. جوبادا 16 تاپسىرما بەرىلگەن. وسىنىڭ ءبارىن جان-جاقتى ويلاستىرىپ، باعدارلاماعا ەنگىزگەن اسىلحان بۇعان دەيىن دە تالاي مارتە وبلىستىق بايقاۋلاردا توپ جارعان بولاتىن.