ەلباسى  سوت تارتىبىمەن قارالۋعا جاتاتىن داۋ-دامايلاردى ازايتۋ ماسەلەسىنە نازار اۋدارىپ، سوتتان تىس رەتتەۋدىڭ بالامالى تەتىكتەرىن، سونىڭ ىشىندە بىتىمگەرشىلىك جانە مەدياسيا پروسەدۋرالارىن ەنگىزۋ قاجەتتىگىن ايتقان بولاتىن. وسى ورايدا بقو-نىڭ ءبىرقاتار اۋداندارىندا مەدياسيا ورتالىقتارى اشىلۋدا. جۋىردا اق جايىق ءوڭىرى تاعى ءبىر تاتۋلاسۋ ورتالىعىمەن تولىقتى.  زەلەنوۆ اۋدانىنىڭ ورتالىعى  پەرەمەتنىي اۋىلىندا مەدياسيا ورتالىعى اشىلدى. ورتالىقتىڭ اشىلۋ سالتاناتىندا ءسوز سويلەگەن زەلەنوۆ اۋدانىنىڭ  اكىمى اسحات شاحاروۆ اتالمىش نىساننىڭ ماڭىزدىلىعىنا توقتالدى.

 —استانانىڭ 20 جىلدىعى مەرەكەسىنە وراي  تاتۋلاسۋ ورتالىعىن اشىپ وتىرمىز. «سابىر ءتۇبى – سارى التىن» دەيدى حالىق دانالىعى. ادام قاي ۋاقىتتا دا بارلىق ءىستى اقىل-ويعا جۇگىنىپ، بايىپپەن شەشۋى كەرەك. ەندىگى ۋاقىتتا كوپتەگەن ماسەلەلەر وسى ورتالىقتا شەشىلەتىن بولادى. سول سەبەپتى قوعام بولىپ، ءار ىستە بىرلىك، بايسالدىلىق تانىتۋىمىز كەرەك. ورتالىقتا ەلگە ءسوزى وتەتىن ارداگەرلەر دە بارشاعا اقىل-كەڭەسىن بەرەتىن بولادى، — دەدى اۋدان باسشىسى اسحات بەرلەش ۇلى. ودان سوڭ شاراعا قاتىسۋشىلار بولمەلەردى ارالاپ، ورتالىق جۇمىسىمەن تانىستى. شارا اياسىندا اۋدان اكىمى ا.شاحاروۆ پەن اۋداندىق سوتتىڭ سۋدياسى روزا سارييەۆا، اۋداندىق ىشكى ىستەر ءبولىمنىڭ باسشىسى سارى الىشەر ساعىندىق ۇلى مەن اۋداندىق كاسىپوداق ۇيىمىنىڭ ءتوراعاسى اسىلبەك يششانوۆ، اۋداندىق ارداگەرلەر كەڭەسىنىڭ ءتوراعاسى عالىمجان مەڭدالييەۆ پەن مەدياتور امانجول جۇمانيازوۆ مەموراندۋمعا قول قويدى. ايتا كەتۋ كەرەك، اتالمىش ورتالىقتا مەدياتور، ادۆوكات، اقپاراتتىق كابينەت جۇمىس جاسايدى. وسى ورايدا ايتا كەتسەك، قازاقستان رەسپۋبليكاسى جوعارعى سوتىمەن جۇزەگە اسىرىلىپ جاتقان «سوت تورەلىگىنىڭ جەتى ءتۇيىنى» جوباسىنىڭ ءبىرى «تاتۋلاسۋ ورتالىعى» جوباسى ەدى. جوبانىڭ ماقساتى – حالىق اراسىندا داۋدى سوتتان تىس شەشۋ، قوعامداعى قايشىلىقتاردى، داۋلاردى ازايتۋ ينستيتۋتتارىن ناسيحاتتاۋ جانە دامىتۋ الاڭدارىن قۇرۋ بولىپ تابىلادى. ەندىگى ۋاقىتتا جاڭادان اشىلعان  ورتالىقتا داۋلاسۋشىلاردى كەلىستىرۋ، مۇمكىن بولسا تاتۋلاستىرۋ، ءىستى سوتقا قاراتپاي تىڭدىرۋ جۇمىستارى جۇرگىزىلەتىن بولادى