قازاق ءتىلى تاعى قورلاندى. تاعى قازاقستاندا، ءوز ەلىمىزدە، ءوز جەرىمىزدە. مەملەكەتتىك ءتىلدى اياق استى ەتكەن وزگە ۇلتى وكىلى ەمەس، ءوز قازاعىمىز. الەۋمەتتىك جەلىدە «جانىم باكلاجانىم» دەگەن لاقاپ اتپەن تانىمال بلوگەر ايدىن توقسانبايەۆا فەيسبۋكتەگى پاراقشاسىندا ەلىمىزدەگى مەملەكەتتىك تىلگە دەگەن قۇرمەتتىڭ جويىلعاندىعىنىڭ ءبىر كورىنىسىن جازىپتى. مەيرامحانا قىزمەتكەرلەرى ايدىن حانىمعا قازاق تىلىندە قىزمەت كورسەتۋ بىلاي تۇرسىن، دورەكىلىك تانىتىپ ءتىلدى دە، ايەلدىڭ ءوزىن دە كەمسىتۋگە دەيىن بارعان. ءىستىڭ ءمان-جايىن ءبىلۋ ءۇشىن بلوگەردىڭ وزىنە حابارلاستىق. ءتىل ماسەلەسى ۋشىققاندا Qamshy.kz اقپارات اگەنتتىگى ءۇنسىز قالمايدى. مەملەكەتتىك ءتىلدىڭ قورلانىپ جاتقانىن بايقاساڭىزدار، رەداكسيامىز سىزدەردى تىڭداپ، ماسەلەنى شەشۋدە اتسالىسۋعا دايىن.
ال ايدىن توقسانبايەۆا كۇنى كەشە باسىنان وتكەن وقيعاسىن بىلاي باياندادى.
«بالاممەن اباي جانە التىنسارين كوشەلەرىنىڭ قيىلىسىنداعى «موسكۆا» ساۋدا ورتالىعىنىڭ ىشىندەگى Coppola مەيرامحاناسىنا بارىپ تاماقتانباق بولدىم. كىرگەننەن اكىمشىلىگى ماعان «زدراۆستۆۋيتە!» دەپ ورىس تىلىندە امانداستى. ويىمدا ەشتەڭە جوق مەن تىنىش قانا كۇلدىم دە، ءوتىپ كەتە بەردىم. داياشى قىز دا ورىس تىلىندە سويلەدى، ەشقانداي ويسىز مەن دە ورىس تىلىندە جاۋاپ قاتتىم. بالامدى ۇيىقتاتىپ، جايعاسىپ وتىرا بەردىم. بىردە الگى داياشى قىزدان قايناعان سۋ سۇراعان ەدىم، مەنى تۇسىنبەگەن بولدى. «چتو؟» دەپ ورىسشا سۇرايدى مەنەن. قانىمنىڭ قايناعانى-اي! وندا دا ۇندەمەدىم. تەك تاماق-شايىمدى ءىشىپ بولعان سوڭ اكىمشىلىككە باردىم دا «سىزدەردە ءبارى جاقسى، ۇنادى، تەك قازاق تىلىندە سويلەۋ، جاۋاپ بەرۋ دەگەن جوق ەكەن. بولاشاقتا سونى ەسكەرسەڭىزدەر ەكەن، تاعى قايتالانسا، زاڭعا جۇگىنەمىن» دەپ تىكەسىنەن ايتتىم. الگى مەنەدجەر مەنى ءتۇسىنىپ كەشىرىم سۇراي ما دەگەن ويدا بولعان، جوق، وزىمە تاپ بەردى. «رازۆە ەست تاكوي زاكون؟ مى سۆوبودنايا سترانا، رازگوۆاريۆاەم نا دۆۋح يازىكاح» دەپ مەنىمەن ۇرسىسۋعا دايىن تۇر. اڭ-تاڭ بولدىم، ءدال وسىنداي رەاكسيانى كۇتپەدىم.
قاتتى اشۋلاندىم، تۇتىنۋشى رەتىندە مەنىڭ قۇقىعىم بۇزىلىپ تۇر. ءسويتىپ زاڭدى جاقسى تۇسىنەتىن دوسىم ماۋلەن العازىعا حابارلاسىپ، مەيرامحاناعا قايتا باردىق. زاڭ تۇرعىسىنان دا، ادامي قارىم-قاتىناس تۇرعىسىنان دا مەيرامحانا اكىمشىلىگىنىڭ ىستەگەنى دۇرىس ەمەس ەكەنىن زاڭدى كوزىنە شۇقىپ تۇرىپ كورسەتتىك. ونىڭ دا كوزى جەتكەن بولار. ىشتەي كەلىسكەنىن بايقادىق. ءسويتىپ ءوز ءتىلىمىزدىڭ قۇقىعىن قورعاپ قالۋ ءۇشىن اكىمشىلىككە مىناداي ەكى ۇسىنىس تاستادىق: «ەندىگى دورەكىلىك قايتالانبايتىنىن ايتىپ، ءوز تىلىمىزدە سۇراسا ءتىلىمىزدى، سويلەگەن حالقىمىزدى، سىيلاپ ءوز تىلىمىزدە جاۋاپ قايتارامىز، اس ءمازىرىن دە ءوز تىلىمىزدە ەنگىزىلەدى دەپ ايتىپ كەشىرىم سۇراۋ كەرەك نەمەسە زاڭ بويىنشا ءىستى سوتقا دەيىن جەتكىزەمىز». ءبىراق الگى جىگىت ۆيدەونى ءوشىرۋىمىزدى سۇرادى. ۆيدەو قوسۋلى تۇرسا، ەشتەڭە دە ايتپايتىنىن جەتكىزدى.
بۇل جەردە توبەلەسىپ، ەشكىمنىڭ باسى جارىلمادى. ءبىراق بەكىتىلگەن زاڭدى بۇزىپ تۇرعانىڭ جوققا شىعاردى. باسقا ۇلت وكىلدەرى دە تەك قازاق تىلىندە سويلەيتىن مەيرامxاناعا بارىپ ورىس تىلىندە سويلەمەگەنى ءۇشىن ءدال مەن سەكىلدى قۇقىعىن تالاپ ەتە الادى، سەبەبى بۇل جەكە تۇلعا اتىنان ەمەس، ميەرامحانا اتىنان سويلەپ تۇرعان جاندار.
ءبىز ويلانباستان 102-گە xابارلاسىپ، ارىز جازدىق. ەڭ باستىسى ءىس باستالدى، ارعىسىن كورەمىز»، - دەدى ايدىن حانىم Qamshy.kz اقپارات اگەنتتىگىنىڭ تىلشىسىنە.
قازاقتىڭ نامىسى مەن ءتىلىنىڭ قورلانىپ جاتاتىن جاعدايلار ەكى-ۇشپەن شەكتەلمەيدى. جوعارىداعى وقيعا العاشقىسى ەمەس، الايدا سوڭعىسى دا بولماۋى مۇمكىن.
وسىعان وراي «ءارقايسىمىز تالاپ ەتەتىن بولساق، ءوزىمىز دە، ەلىمىز دە داميدى. جۇرگەن جەرىڭىزدە ءسىز دە ءوز قۇقىعىڭىزدى قورعاڭىز» - دەپ ءسوزىن قورىتىندىلادى بلوگەر.
