مەملەكەت باسشىسىنىڭ 5 الەۋمەتتىك باستاماسى بويىنشا قولعا الىنعان «7-20-25» باعدارلاماسى قازاقستاندىقتاردىڭ ءال-اۋقاتىن جاقسارتۋعا باعىتتالعانى بەلگىلى، دەپ جازادى 24.kz.

جاڭا باعدارلاما وڭىرلەردە جەمىستى جۇزەگە اسا باستادى.

گۇلنۇر ساركەنوۆا شاعىن كاسىپكەرلەر ساناتىندا. شاھارداعى كوپ بازاردىڭ بىرىندە كيىم-كەشەك ساتۋمەن اينالىسادى. كۇيەۋى ۆاحتالىق ادىسپەن اقساي قالاسىندا جۇمىس ىستەيدى. وتاسقاندارىنا التى جىل بولسا دا، وسى كەزگە شەيىن پاتەر جالداپ كەلىپتى. ەندى باسىبايلى باسپاناعا يە بولماقشى. جاس جانۇيا جاڭا باعدارلاما تۋرالى ەستىگەن بويدا ەكى بولمەلى پاتەرگە ءوتىنىش بەرگەن ەكەن. 20% باستاپقى جارنانى جيناۋعا اتا-اناسى جاردەمدەسىپتى. 

گۇلنۇر ساركەنوۆا، قالا تۇرعىنى:

- 65-70 مىڭعا شىعىپ تۇر، اي سايىن تولەپ تۇرامىز. بىزگە ول ءتيىمدى دەپ ويلايمىز، سەبەبى مەن دە، جولداسىم دا جۇمىس ىستەيمىز. وسى باعدارلامامەن پاتەرگە يە بولىپ جاتىرمىز، ەلباسىمىزعا كوپ راقمەت، وتە قۋانىشتىمىز. كەشە 30 جاسقا تولىپ جاتقان جولداسىما سىيلىق بولدى.

جاڭا باعدارلامانىڭ ءتيىمدى تۇستارى كوپ. سول سەبەپتى، وعان سۇرانىس تا جوعارى. جەڭىلدەتىلگەن نەسيە الۋعا باسىندا باسپاناسى جوق كەز كەلگەن تۇرعىن ءوتىنىش بەرە الادى. «باستىسى، تۇراقتى تابىسىنىڭ بولۋى»، – دەيدى ماماندار.

قوزىباق قۇلباراقوۆ، ق ر ۇلتتىق بانكى وبلىستىق فيليالىنىڭ ديرەكتورى:

-ەلباسىنىڭ باستاماسىمەن ۇلتتىق بانكىنىڭ بەكىتىلگەن «7-20-25» باعدارلاماسىنا ورال قالاسىندا العاشقى نەسيەلەر بەرىلىپ جاتىر. ەڭ ءبىرىنشى بولىپ «بانكسەنتركرەديتتىڭ» اق كليەنتى نەسيە الدى. ءقازىر ۇلتتىق بانكتىڭ فيليالى وسى باعدارلاماعا بايلانىستى اقپاراتتىق ءتۇسىندىرۋ جۇمىستارىن جۇرگىزىپ جاتىر.

سەرگەي پوتيچەنكو، قۇرىلىس كومپانياسىنىڭ باسشىسى:

- باسپاناعا سۇرانىستىڭ ارتۋى قۇرىلىس سالاسىنىڭ دامۋىنا اسەر ەتەدى. قۇرىلىس يندۋسترياسى داميدى. ءبىز وعان دايىنبىز. قۇرىلىس قارقىنىن ارتتىرۋ ءۇشىن ءوڭىر قۇرىلىسشىلارىنىڭ الەۋەتى جەتكىلىكتى.

وڭىردە «7-20-25» مەحانيزمى بويىنشا يپوتەكا بەرۋمەن 6 بانك اينالىسادى. وزگە دە وبلىستار سەكىلدى نەسيەگە الىناتىن پاتەردىڭ قۇنى 15 ميلليون تەڭگەدەن اسپاۋى ءتيىس. باعدارلاماعا قاتىسۋشىلار ءۇشىن تەك ءبىرىنشى كەزەڭدە 2 مىڭداي پاتەر سالۋ جوسپارلانعان.