استانا قالاسى اكىمدىگىنىڭ مادەنيەت جانە سپورت باسقارماسى  ل. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ ك.اقىشيەۆ اتىنداعى ارحەولوگيا عىلىمي-زەرتتەۋ ينستيتۋتىمەن بىرلەسىپ مەملەكەت قورعاۋىنداعى كۇيگەنجار قورعانىندا قازبا جۇمىستارىن جۇرگىزىپ جاتىر، دەپ حابارلايدى Qamshy.kz اقپارات اگەنتتىگى استانا قالاسى اكىمدىگىنىڭ رەسمي سايتىنا سىلتەمە جاساپ.

ينستيتۋت ارحەولوگتارى ەكى اپتا بويى تىنىمسىز ەڭبەك ەتىپ، زەرتتەۋ جۇمىستارى بارىسىندا قورعاننىڭ جوعارعى قاباتىنداعى باستاپقى جەتى ءقابىر اشىلىپ، زەرتتەلگەن. ارحەولوگتار توبىنىڭ جەتەكشىسى، تاريح عىلىمدارىنىڭ كانديتاتى، ك. اقىشيەۆ اتىنداعى ارحەولوگيا عىلىمي-زەرتتەۋ ينستيتۋتىنىڭ ديرەكتورى مارال حابدۋلينانىڭ ايتۋىنشا، جەرلەۋ ءراسىمى بويىنشا زيراتتار جوبامەن 15-16 عع. جاتقىزىلعان.

"ايتا كەتەيىك، ولار مۇسىلمان داستۇرىمەن جەرلەنگەن. جالپى قورىمنان ازىرگە جەتى ءقابىر قازىلدى. وسى جەتەۋدىڭ ىشىندەگى ەكى مولادان اشەكەيلەر تابىلىپ وتىر، بىرەۋىن ءبىز ايەل ادامنىڭ ءقابىرى دەپ وتىرمىز، ونىڭ ىشىندە قولا سىرعا مەن كۇمىس ءجىپ بولدى. ال ەكىنشىسىن بويجەتكەن قىز بالانىڭ ءقابىرى دەپ توپشىلادىق، سەبەبى تابىلعان نەكە جۇزىگى جەرلەنگەن ءمايىتتىڭ وڭ ساۋساعىندا بولدى"، — دەدى ارحەولوگيالىق توپتىڭ جەتەكشىسى مارال حابدۋلينا.

قورعان قاراعاندىعا باراتىن جولدا كۇيگەنجار شاتقالىندا ورنالاسقان. قازىرگى كەزدە ساقتار قورعانىنىڭ شەتىندە قازاق زيراتى بار. تاسپەن جابىلعان قورعاننىڭ بيىكتىگى 4 م، ديامەترى — 60م. ونىڭ گرانيت تاستارى نۇرا وزەنىنىڭ جاعاسىنان الىنعانى بەلگىلى.

"قورىمعا قاراپ وتىرساڭىزدار جەر قاتپارىنان دا بايقالادى. توپىراق قاباتى سارى، قوڭىر ءتۇستى. ءبىز وسى قورىمنىڭ ناقتى قاي عاسىرعا جاتاتىنىن انىقتاۋ ءۇشىن ءتورت باس سۇيەكتىڭ ازۋ ءتىسى مەن الدىڭعى تىستەرىن الىپ يتالياعا، ال انتروپولوگيالىق سىناما جۇرگىزۋ ءۇشىن سۇيەكتەردى الماتىعا جىبەرەمىز. وندا ادامنىڭ شىعۋ تەگىن، دامۋىن، دەنە قۇرىلىسىن، ناسىلدىك ەرەكشەلىكتەرىن انىقتايدى"، — دەيدى مارال حابدۋلينا.