شىلدەنىڭ 21 مەن 28 ارالىعىندا وتكەن مادريد حالىقارالىق كينوفەستيۆالىنە قاتىسقان «ەل فريمان» كوركەم ءفيلمى «ۇزدىك رەجيسسەر-دەبيۋتانت» اتالىمىندا جەڭىسكە جەتتى. سونىمەن قاتار، اتالعان كارتينا «كوركەم فيلمدەگى ۇزدىك وپەراتورلىق جۇمىس» نوميناسياسى بويىنشا دا ب ا ق سىنادى. ءفيلمدى ق ر مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» كينوستۋدياسى تۇسىرگەن.

ايتا كەتەلىك، كارتينانىڭ رەجيسسەرى ەلجاس راقىمبەكوۆ ءار ءتۇرلى ەلدەن قاتىسىپ وتىرعان 14 باسەكەلەستى، ونىڭ ىشىندە «#TAKEMEANYWHERE» فيلمىمەن اتالمىش نوميناسيادان ءۇمىتتى بولعان تانىمال گولليۆۋدتىق اكتەر شايا لابافتى دا وزىپ شىققان.  راقىمبەكوۆتىڭ دەبيۋتتىك كارتيناسى (شىعارماشىلىق لاقاپ اتى – ميحار ساجلە) لوس-اندجەلەستە امەريكالىق بيلىك وكىلدەرىنەن جاسىرىنىپ جۇرگەن يمميگرانتتىڭ باسىنان كەشكەندەرىن باياندايدى.

فەستيۆالدىڭ لاۋرەاتى ەلجاس راقىمبەكوۆ: - بىرىنشىدەن العىسىمدى تۋعان-تۋىستارىما، جاقىندارىما جانە بىزگە سوڭىنا دەيىن سەنىم ارتىپ، قولداۋ بىلدىرگەندەرگە ايتامىن. سونداي-اق، ءفيلمدى جاساۋعا اتسالىسقاندارعا دا راحمەت دەيمىن. بۇل تەك باستاماسى عانا، - دەپ تولعانىسپەن ويىن جەتكىزدى.

Film Fest International حالىقارالىق توبىنا جاتاتىن مادريد كينوفەستيۆالى فورماتى بويىنشا لوندون، امستەردام، نيسسە، بەرلين جانە ميلانداعى فەستيۆالدەرگە ۇقساس. كينەماتوگرافيانىڭ بارلىق بەلگىلى جانرلارىنا ەسىگى اشىق بۇل فەستيۆالدە جاس بۋىن رەجيسسەرلەرگە، زاماناۋي تەندەنسيالار مەن كينو سالاسىنىڭ دامۋىنا ىقپال جاسايتىن ترەندتەرگە اسا كوڭىل بولىنەدى.