ورال قالاسىنداعى جەتى باعىتتا جۇرەتىن قوعامدىق كولىكتەردە جول اقىسىن ۇيالى تەلەفون ارقىلى وتەۋگە بولادى، دەپ حابارلايدى قالالىق اكىمدىكتىڭ باسپا ءسوز قىزمەتى. جوبا «Smart city» تۇجىرىمداماسى اياسىندا جۇزەگە اسىرىلۋدا.

وسىلايشا، قالالىق اكىمدىك جەرگىلىكتى تاسىمالداۋشىلارمەن بىرگە №5، №7، №10، №33، №35، №39 جانە №43 باعىتتارىندا قوعامدىق كولىكتەگى جول اقىسى ءۇشىن «اقىلدى» تولەم جۇيەسىن ەنگىزدى. ول ءۇشىن 2505 قىسقا نومىرىنە كولىك كودى بار SMS جولداڭىز نەمەسە «SMSBUS جولاۋشى» ءموبيلدى قوسىمشاسىن پايدالانىڭىز.

ەگەر كولىككە ەكىنشى رەت وتىرساڭىز، جول اقىسى مەملەكەتتىك كولىك نومىرىمەن تولەنەدى. ءموبيلدى قوسىمشا ارقىلى ءسىز قىزمەتتەردىڭ ساپاسىن، كولىكتىڭ كۇيىن باعالاي الاسىز، كەرى بايلانىس پەن شاعىمداردى جىبەرە الاسىز. بارلىق باعالاۋ مەن قالدىرىلعان پىكىرلەر قارالىپ تالدانادى جانە ءتيىستى شارالار قابىلدانادى.

وسى ادىستەردىڭ كەز-كەلگەنى بويىنشا تولەم جاساعاننان كەيىن، جولاۋشى QR كودى رەتىندە كورسەتىلگەن ەلەكتروندىق تۇبىرتەك الادى. جولاۋشى قوعامدىق كولىكتەن تۇسكەنشە ونى ساقتايدى. قاجەت بولعان جاعدايدا، تولەماقى تولەمىن تەكسەرۋ ءۇشىن پايدالانۋشى اۆتوماتتى تۇردە سكانەرلەۋ ءۇشىن باسقارۋ قىزمەتكەرلەرىنە QR كودىن ۇسىنۋى كەرەك. SMS جىبەرۋ Beeline، Activ، Kcell ابونەنتتەرى ءۇشىن تەگىن.

باسقا جولاۋشىعا جول اقىسىن تولەۋ ءۇشىن ترانسپورتتىڭ كودىن جىبەرىپ، ودان كەيىن بوس ورىن قالدىرىپ كەلەسى جولاۋشىنىڭ تەلەفون ءنومىرىن ەنگىزەدى. سونىمەن قاتار، جولاۋشىلار كەز كەلگەن بانكتىڭ VISA جانە Master Card تولەم كارتوچكالارى ارقىلى كوميسسياسىز جول ءجۇرۋ اقىسىن تولەي الادى.

بۇل ورال قالاسىنداعى «Smart city» كونسەپسياسى اياسىنداعى ىسكە اسىرىلىپ جاتقان جالعىز باستاما ەمەس. وسىلايشا، دامۋ 4 باعىت بويىنشا ءجۇرىپ جاتىر: ىڭعايلى قالا، مەملەكەتتىك قىزمەتتەردى سيفرلاندىرۋ، ءقاۋىپسىز قالا جانە حالىقپەن كەرى بايلانىس.

تۇتاستاي العاندا، «Smart city» تۇجىرىمداماسى قالا ينفراقۇرىلىمىن اقپاراتتىق-كوممۋنيكاسيالىق تەحنولوگيالاردى پايدالانا وتىرىپ دامىتۋعا، قالا تۇرعىندارىنىڭ قاۋىپسىزدىگىن نىعايتۋعا، ءومىر ءسۇرۋ ساپاسىن جاقسارتۋعا جانە وزىق تەحنولوگيالىق شەشىمدەردىڭ كومەگىمەن قالانىڭ قورشاعان ورتانىڭ تيىمدىلىگىن ارتتىرۋعا باعىتتالعان. «سيفرلىق قازاقستان» مەملەكەتتىك باعدارلاماسى اياسىندا بۇل باعىت ماڭىزدى جانە باسىمدىقتاردىڭ ءبىرى بولىپ سانالادى.

قاراپايىم سوزبەن ايتاتىن بولساق، بۇل تۇجىرىمداما ەكى ماڭىزدى تاپسىرمانى ورىندايدى. ءبىرىنشىسى – بارلىق ماڭىزدى دەرەكتەردى باسقارۋ وكىلدەرىنە بەرۋ. ەكىنشىسى – اكىمشىلىك پەن ازاماتتار اراسىنداعى كەرى بايلانىس ورناتۋ، قورشاعان ورتانى جاقسارتۋ.