قوعامدا ءورشىپ تۇرعان وتە ءقاۋىپتى ماسەلە – پەدوفيليا دەرتى. بۇگىندە ەلىمىزدە پەدوفيليا ەپيدەمياسى ءجۇرىپ جاتقان سەكىلدى. ءبۇلدىرشىننىڭ ءومىرى وپات بولعانى جايلى جاڭالىقتار كۇن ساناپ كوبەيۋدە، ال قوعام جاعاسىن ۇستاپ، تاڭعالۋدان، ءارى كەتسە جەلىدە وتىرىپ قىلمىسكەرلەردى قارعاپ-سىلەۋدەن ءارى اسا الماي وتىر. ال قۇزىرلى ورگانداردان پەدوفيلدەرگە ءولىم جازاسىن سۇراپ جاتقانداردىڭ قاراسى بۇگىندە كوپ بولسا دا، باياعى جارتاس ءبىر جارتاس... ەش وزگەرىس جوق، ال پەدوفيلدەردىڭ قۇربانى بولىپ جاتقان بۇلدىرشىندەر مەن ولاردىڭ ەت جاقىن تۋىستارى تەك سان سوعىپ قالۋدا. بۇل ماسەلەنىڭ كۇرمەۋى شەشىلە مە، الدە وسىلاي جالعاسا بەرمەك پە؟

بىرنەشە كۇن بۇرىن الماتى وبلىسىندا 6 جاستاعى قىزدىڭ زورلىققا ۇشىراعانى جايىندا اقپارات شىققان بولاتىن. ونى ادۆوكات ايمان وماروۆا، ەڭ الدىمەن، ءوزىنىڭ فەيسبۋك پاراقشاسىندا جاريالاعان. كەيىننەن Qamshy.kz اقپارات اگەنتتىگىنىڭ تىلشىسىنە بەرگەن سۇحباتىندا ءىستىڭ ءمان-جايىن تولىق ايتىپ بەردى.

ونىڭ ايتۋىنشا، 6 جاستاعى ءبۇلدىرشىن 2 تامىز كۇنى 15-16 جاس شاماسىنداعى كامەلەتكە تولماعان ءجاسوسپىرىم زورلاپ كەتكەن.

«وقيعا بولعاننان كەيىن قىزدىڭ اتا-اناسى دەرەۋ قاراساي اۋدانىنىڭ تەرگەۋ بولىمىنە بارعان. الايدا ول جەردەگىلەر ەكسپەرتيزا جاساۋعا قۇجاتتى ۋاقىتىلى بەرمەي، سوزىپ ءجۇرىپ العان. سونىمەن قاتار، بۇل ىسكە قاتىستى تەرگەۋ جۇمىستارىن باستاۋعا دا قۇزىرلى ورگاندار اسىقپاي، تەك فەيسبۋككە جازىپ، قوعامنىڭ تالقىسىنا تۇسە باستاعاننان كەيىن عانا ولار قوزعالا باستادى. تەك سودان كەيىن عانا وسى ءىستى قولعا الدى.

جابىرلەنۋشىگە ساراپتامانى دەر كەزىندە جاساماسا قيىن. بىرنەشە كۇن ءوتىپ كەتكەننەن كەيىن دەنەدەگى كوگەرگەن، قىزارعان جەرلەر بىلىنبەي قالادى. كەيىننەن قىلمىستىق ىسپەن اينالىسىپ جۇرگەندەر ەشنارسە بولعان جوق دەپ ايتادى»، - دەيدى زاڭگەر.

بەلگىلى بولعانداي، قۇزىرلى ورگاندار بۇل ءىستى قولعا الىپ، تەرگەۋ جۇمىستارى باستالعاننان كەيىن جابىرلەنۋشىنىڭ ۇيىنە قاراساي اۋدانىنىڭ ءبىلىم باسقارماسىنىڭ ماماندارى، قىلمىسكەردىڭ تۋىستارى كەلىپ، زورلىق كورسەتكەن بالاعا كەشىرىم بەرۋدى تالاپ ەتكەن.

«كۇندىز كىشكەنتاي قىز اكەسىمەن قالادا ءبىر شارۋالارىمەن جۇرگەن كەزىندە، ساعات 15:00 شاماسىندا ولاردىڭ ۇيىنە ءبىر توپ ادام كەلىپ، كەلىسىمگە كەلۋدى قالاعان. اناسى ولاردى كىرگىزبەي قۋىپ جىبەرگەن. كەيىننەن تۇنگى 22:00 شاماسىندا ون شاقتى ادام ولاردىڭ ۇيىنە تاعى دا كەلىپ، زورلىق كورسەتكەن بالانى كەشىرىم بەرۋدى تالاپ ەتكەن. زورلىققا ۇشىراعان قىزدىڭ اتا-اناسىنىڭ قارسىلىعىنا قاراماستان كەشىرىمدى تالاپ ەتۋشىلەر ءۇيدى تورۋىلداۋىن توقتاتپاي، ەرتەسىنە ساعات 9:00-دە تاعى دا كەلىپ، دىتتەگەن ماقساتتارىنا قول جەتكىزە الماعاننان سوڭ، سول كۇنى ساعات 15:00 شاماسىندا مەكتەپ ديرەكتورى قىزدىڭ اتا-اناسىنا كەلىپ: «ول بالا قينالىپ جاتىر، اسىلىپ ولەمىن دەپ ايتىپ جاتىر» دەگەن سوزدەر ايتىپ، «كەشىرىم بەرىڭىزدەر، كەشىرىم بەرمەسەڭىزدەر ءبىزدى جۇمىستان شىعارادى» دەپ قىزدىڭ اتا-اناسىن كوندىرمەك بولعان. قانشا تىرىسسا دا، قىزدىڭ اتا-اناسى ولاردىڭ ايتقانىمەن كەلىسپەي، جىلارمان بولىپ ماعان كەلدى، كومەك سۇرادى»، - دەيدى ادۆوكات ايمان وماروۆا.

بۇگىندە قوعامدا زورلاۋ فاكتىلەرى كوبەيىپ، ازعىندىق ىس-ارەكەتتەر بەلەڭ الۋدا. ال ءجابىر كورگەن جازىقسىز ادامدار ءوزىنىڭ قۇقىعىن تاپتالعانىن العا تارتىپ، زاڭ ارقىلى ادىلدىككە قول جەتكىزۋ وڭاي ەمەس. زاڭگەردىڭ ايتۋىنشا، زورلىقتىڭ قۇربانى بولعان ادامدار ساراپتاما جاساتۋ ءۇشىن بەرىلەتىن قاعازىن ۋاقىتىلى الا المايدى. ەكسپەرتيزا دەر كەزىندە جاسالماعاننان كەيىن كوپتەگەن قىلمىستاردىڭ بەتى اشىلماي، جابۋلى كۇيىندە قالىپ قالىپ جاتىر.

قوعامدا ادام قۇقىعى تاپتالىپ، ءبىرشاما تاعدىرلار تالكىگە ءتۇسىپ جاتسا دا، قىلمىسكەرلەر بولماشى جازامەن قۇتىلىپ كەتىپ جاتىر، سونىڭ سالدارىنان دا ازعىندىق ىس-ارەكەتتەردىڭ ازاياتىن ءتۇرى جوق، تەك كۇن ساناپ كوبەيۋدە.

«بۇگىندە زورلىققا ۇشىراپ جاتقان قىزداردى قوعامدا وزدەرىن ايىپتايدى. قىسقا كيەدى، اشىق-شاشىق كيىنىپ، شاشىلىپ جۇرەدى دەيدى. ال 6 جاستاعى قىزدىڭ جاعدايى شە؟ وعان نە ايتادى سوندا؟» - دەيدى ادۆوكات.

ءجابىر كورگەن بالانى قورعاۋىنا العان ادۆوكات ايمان وماروۆا بۇگىندە بۇل ماسەلەنىڭ كەڭىنەن ەتەك جايىپ كەتكەندىگىن ايتىپ، قانداي دا ءبىر شارا قولدانۋ قاجەت دەيدى.