بۇعان دەيىن Qamshy.kz اقپارات اگەنتتىگىندە «ۆوستوچنيك-3» باۋباقشا قوعامداستىعىنىڭ باسشىسى شۋشاننيكوۆ گ.پ-نىڭ ءتىل تۋرالى زاڭدى بۇزىپ، تۇرعىندار قۇقىعىنىڭ تاپتالىپ جاتقانىن جازدىق. بۇگىن شۋشاننيكوۆتىڭ وزىمەن تىلدەسۋ ماقساتىندا حابارلاستىق. مۇنداعى ماقساتىمىز ونىڭ جەكە باسىنا ءتيىسۋ ەمەس، تەك «قۇقىعىم تاپتالدى»، «قازاق ءتىلى اياققا تاپتالىپ جاتىر» دەپ اشىنعان وقىرماننىڭ ماسەلەسىن كوتەرۋ. Qamshy.kz اقپارات اگەنتتىگى ءتىل، ۇلتقا قاتىستى ماسەلەدە ءۇنسىز قالا المايدى. سوندىقتان وسى ماسەلەنى كوتەرىپ ءتيىستى مەكەمەلەرگە حابارلاسىپ جاتىرمىز.

شۋشاننيكوۆتىڭ بىزگە بەرگەن جاۋابى تومەندەگىدەي.  

- بىلتىر قاراشانىڭ باسىندا سىزدەردىڭ سايتتارىڭىزدا  «ۆوستوچنيك-3» باۋباقشا قوعامداستىعىنا قاراستى ساياجايدا قازاق ءتىلىنىڭ ءحالى مۇشكىل دەگەن ىسپەتتەس ماقالا جارىق كورگەننەن كەيىن وسكەمەندە ءبىراز شۋ بولدى.

«ۆوستوچنيك-3» باۋباقشا قوعامداستىعى ءوزىن ءوزى قارجىلاندىرادى. قۇجاتتاردى قازاق تىلىنە اۋدارۋ قاجەت پە، الدە جوق پا ونى قوعامداستىقتى قارجىلاندىراتىندار شەشەدى، ياعني باۋباقشا قوعامداستىعى مۇشەلەرى شەشەدى.

بيىلعى جىلى  وتكەن جينالىستا وسى سۇراقتى ارنايى تالقىلاۋعا قويدىم. جينالىستا باۋباقشا قوعامداستىعى اقپاراتتى قازاق تىلىنە اۋدارۋعا قارجى بولمەيدى دەپ شەشىلدى. مەن زەينەتكەرمىن، ءوز قالتامنان اۋدارماعا اقشا شىعارمايمىن.

- ءبىراق قازاقستان رەسپۋبليكاسىنىڭ اۋماعىندا تۇراتىن بارلىق ادام قازاقستاننىڭ زاڭىنا مويىنسىنۋعا مىندەتتى عوي...

بۇل تۇستا ماسەلە كەز كەلگەن اقپاراتتى قازاقشاعا اۋدارۋعا قاجەتتى اقشاعا قاتىستى بولىپ تۇر. وزىڭىزگە بەلگىلى، ا4 فورماتىنداعى ءبىر بەت اۋدارما 2500-3500 تەڭگە تۇرادى. اقشانى قايدان الامىز؟ اكىمگە دە ءدال وسى سۇراقتى قويدىم.

- وندا اۋدارما جۇمىسىمەن تەگىن اينالىساتىن اۋدارماشى تاۋىپ بەرەيىك؟

- قۇداي ءۇشىن... اكىمدىك تە، قازاقستاننىڭ حالىقتار اسسامبلەياسى دا ۇسىندى، ءبىراق ءىس ناقتى اقشاعا تىرەلگەندە ەشكىم ونى تەگىن جاساعىسى كەلمەيتىن بولىپ شىعادى.

ەگەر تەگىن اۋدارما جاسايمىن دەسەڭىزدەر، مارحابات. بىزدە «جينالىس وسى كۇنى بولادى» دەگەن سەكىلدى عانا اقپارات. بۇل - ءبىر

ەكىنشىدەن، «ورىس ءتىلىن تۇسىنبەيمىز. اسىرەسە ەگدە جاستاعى ادامدار» دەگەن سارىنداعى شاعىمعا قاتىستى ايتايىن. ولاردىڭ بارلىعى كسرو كەزىندە ورىس ءتىلىن وقىپ، وسكەندەر. سوندىقتان اڭگىمە نە تۋرالى بولىپ جاتقانىن جاقسى تۇسىنەدى.

- تۇسىنەسىز بە، مۇندا ماسەلە ولاردىڭ قازاق ءتىلىن تۇسىنەتىنىندە نەمەسە تۇسىنبەيتىنىن دە ەمەس. ق ر ءتىل تۋرالى زاڭى بار. وعان سايكەس، ولار قازاق تىلىندە اقپاراتتى تالاپ ەتۋىنە تولىق قۇقىعى بار.  

- بۇل تەك قوعامداستىقتىڭ عانا ەمەس، اكىمدىك، ءتىپتى ۇقك-گە قاتىستى ماسەلە. ەگەر مەن ق ر زاڭىن بۇزعان بولسام ءقازىر سىزبەن بىلاي سويلەسىپ وتىرماس ەدىم.

- ءسىز رەسەي ازاماتى دەگەن اقپارات راس پا؟

- ءيا، راس. سونىمەن...

- جوق، ءسىزدى ەشتەڭەگە ايىپتاپ تۇرعانىمىز جوق. اقپاراتتى راس، وتىرىگىن انىقتاۋ ءۇشىن سۇراپ وتىرمىز.

- بۇل سۇراق اعىمداعى جىلى اقپاندا نەمەسە ناۋرىزدا وسكەمەن قالاسى اكىمىمەن كەزدەسۋدە تالقىلاندى. كەزدەسۋدە كوشى-قون، ۇقك وكىلدەرى بولدى. سول كەزدە اكىمنىڭ ءوزى ق ر ۇقك وكىلىنەن «وعان بولا ما؟» دەپ سۇراپ ەدى، ول ويلانباستان «ءيا» دەپ جاۋاپ بەردى.

مەنىڭ ىقتيار حاتىم بولعاندىقتان قازاقستان ازاماتىنا بەرىلەتىن بارلىق قۇقىق پەن مىندەتتەر ماعان دا جۇكتەلەدى.

- قازاقستاندا تۇرىپ، جۇمىس ىستەپ جاتقاندىقتان قازاقستاننىڭ ازاماتتىعىن العىڭىز كەلە مە؟

مەن قازاقستان ازاماتى بولعانمىن. بالام بەلگىلى ءبىر سەبەپتەرگە بايلانىستى ءقازىر تومسكىدە. ول ماعان پاتەر ۇسىندى.

ىقتيار حاتىم بولعاندىقتان قازاقستان ازاماتتارىنا بەرىلەتىن بارلىق قۇقىق مەندە دە بار. ەڭ باستىسى قازاقستان رەسپۋبليكاسىنىڭ زاڭىن بۇزباۋ.

ايەلىم ساياجايدى باسقارۋعا سەنىم حات بەردى. باۋباقشا قوعامداستىعى مۇشەسىنە تيەسىلى بارلىق قۇقىقتى پايدالانا الامىن.

- ءوزىڭىزدى قازاقستاننىڭ پاتريوتىمىن دەپ ەسەپتەيسىز بە؟

نەگە پاتريوتىمەن دەمەسكە؟ مەن ەشكىمگە ەشقاشان «بۇل جامان ەل، مۇندا جامان ادامدار تۇرادى» دەپ ايتقان ەمەسپىن. مەن وسى جەردە تۋدىم، ءوستىم، جۇمىس ىستەدىم. ءومىر بويى وسى جەردە ءومىر ءسۇرىپ كەلەمىن.

«ۆوستوچنيك-3» باۋباقشا قوعامداستىعىنا قاراستى ساياجاي تۇرعىندارى قازاق تىلىندە اقپارات الۋ قۇقىعىنان ايىرىلىپ وتىر. ەگەر بۇل ولقىلىقتى شەشىپ، تەگىن اۋدارما جۇمىستارىن جاساپ بەرىپ قازاق ءتىلىنىڭ كوسەگەسىن كوگەرتۋ ءۇشىن ءوز ۇلەسىڭىزدى قوسقىڭىز كەلسە رەداكسيامىزعا حابارلاسىڭىزدار.