باعدات ءمۋسيننىڭ ويىنشا «بولاشاق» باعدارلاماسى بويىنشا شەتەلدە وقىپ جاتقان ستۋدەنتتەرگە شەتەلدە قالۋعا رۇقسات بەرۋ كەرەك، دەپ جازدى Qamshy.kz اقپارات اگەنتتىگى.

«شەتەلدە قالعىسى كەلەتىن بولاشاقتىقتار ءبىزدىڭ ەلشىلىكپەن بايلانىستا بولۋ كەرەك، ياعني قايدا جۇمىس ىستەيتىنىن ايتۋى ءتيىس. جوعارى تەحنولوگيالىق كومپانيادا جۇمىس ىستەسە ونى ەلگە قايتىپ اكەلىپ 5 جىلعا قازاقستانعا بايلاۋدىڭ قاجەت قانشا؟»، - دەيدى باعدات مۋسين.

12 قازاندا وتكەن قازاقستاندىق تەحنولوگيالىق فورۋمدا باعدات مۋسين «بولاشاق» باعدارلاماسىنىڭ ماقساتى - ينتەللەكتۋالدىق دەڭگەيى جوعارى ۇرپاق قۇرۋ ەكەنىن اتاپ ءوتتى.

«امەريكالىق ۇزدىك جوو-دا وقىپ كەلگەننەن كەيىن ەلدە جۇمىسقا ورنالاسادى. وندا ولاردىڭ قاناتىن قايىرىپ، قاتىپ قالعان شەڭبەردەن شىعارمايدى. ودان جاقسى ناتيجەگە جەتە المايمىز. شەتەلدە جۇمىس ىستەپ كورۋ ءۇشىن مۇمكىندىك بەرۋىمىز كەرەك. ول جەردەن قانداي دا بولسىن يدەيامەن كەلەدى نەمەسە بىزگە كومەكتەسەتىن جانە قازاقستاندىقتارعا ۇلگى بولاتىن ەنشىلەس ۇيىم قۇرادى»، - دەدى مۋسين.

ول شەتەلدە جەتىستىككە جەتۋگە تالپىنىپ جۇرگەن قازاقتاردى بىلەتىنىن اتاپ ءوتتى.

«ءبىز كاسىپكەرلەردى قولداۋ تۋرالى ايتقاندا بىردەن قازاقستانداعى ستارتاپەرلاردى ەسكە تۇسىرەمىز. ال شەتەلدىك نارىقتا جۇمىس ىستەپ جۇرگەندەردى ويعا دا المايمىز. مەنىڭ ايتپاعىم، شەتەلدە ەڭبەك ەتىپ جۇرگەندەرگە كومەكتەسەتىن جانە شەتەلدە استانا حالىقارالىق قارجى ورتالىعى تۇرىندەگى قولداۋ بار ەكەنىن، وندا تىركەلگەن ءوز كومپانياڭ بولۋى مۇمكىن ەكەنىن تۇسىندىرەتىن شەتەل مەن ءتۇرلى ەكوجۇيەدە ديدجيتال-ەلشىلىك قۇرۋ. ونىڭ دەلاۆەرادان ەشقانداي ايىرماشىلىعى بولماۋى كەرەك»، - دەيدى مۋسين.