تەكەلى قالاسىندا ورنالاسقان ورتالىق ازيا ۋنيۆەرسيتەتىندە ميكروكالسيت شىعاراتىن كاسىپورىندار ءۇشىن جۇمىسشى ماماندار وقىتاتىن كۋرس اياقتالدى. «ۋاتىپ تارتاتىن جانە سۇرىپتاعىش ماشينالار وپەراتورى» ماماندىعى بويىنشا قىسقامەرزىمدى وقىتۋ 2015 جىلى جەرگىلىكتى جەر قويناۋىن پايدالانۋشىلاردىڭ ۇسىنىسىنان كەيىن كاسىپكەرلەر پالاتاسىنىڭ قالالىق فيليالىنىڭ قولداۋىمەن اشىلعان.

بۇل باعىتتاعى مامانداردى ەشبىر جوعارى نەمەسە ورتا پوليتەحنيكالىق وقۋ ورنىندا وقىتپايدى. مامانداردىڭ تاپشىلىعى تەكەلىدە التى بىردەي ءمارمار  كەن ورنى جانە 10 وڭدەۋشى كاسىپورىننىڭ بار بولۋىمەن بايلانىستى. كاسىپورىنداردا قۇرعاق قۇرىلىس قوسپالارىنىڭ نەگىزگى تولتىرعىشى بولىپ تابىلاتىن ميكروكالسيتتى وندىرەدى.

«تەكەلى ءوڭىرى ەلىمىزدە شىعارىلاتىن ميكروكالسيتتىڭ 60%-نان استامىن شىعارادى. جىل سايىن ماماندار قاجەتتىلىگى 10-15 ادامدى قۇرايدى. سوندىقتان ءۇش جىل بۇرىن ورتالىق ازيا ۋنيۆەرسيتەتىندە ءدۋالدى وقىتۋ جۇيەسى اياسىندا ارنايى كۋرس اشتىق. قاتىسۋشىلار ءۇشىن 30% تەوريالىق ساباقتار وتكىزىلسە، ساباقتىڭ قالعان 70% كاسىپورىنداردا وتكىزەدى. باستى ناتيجەسى وقىپ شىققان ازاماتتاردىڭ بارلىعى جۇمىسپەن قامتىلادى»، - دەپ اتاپ ءوتتى كاسىپكەرلەر پالاتاسىنىڭ تەكەلى قالالىق فيليالىنىڭ ديرەكتورى تۇرىسبەك ءجۇمادىلوۆ.

كۋرستىڭ ۇزاقتىعى 192 ساعات، وعان كوبىنشە كوللەدج تۇلەكتەرى مەن ءوزىن-وزى قامتىعان ازاماتتار قاتىسىپ كەلەدى. تەوريالىق ساباقتاردى وڭدەۋشى كاسىپورىنداردا 10 جىلدان استام تاجىريبەسى بار تۇرىسبەك ءجۇمادىلوۆ جۇرگىزسە، تاجىريبەلىك ساباقتاردى كاسىپورىندارداعى جەتەكشى ماماندار مەن شەبەرلەر وتكىزەدى.

2015 جىلدان بەرى «ۋاتىپ تارتاتىن جانە سۇرىپتاعىش ماشينالار وپەراتورى» ماماندىعى بويىنشا قىسقامەرزىمدى وقىتۋدى 65 ادام ءتامامداعان، سونىڭ ىشىندە بيىل وقۋدى 13 ادام اياقتاعان.