شەتەلدە شاكىرتتەرىنە سەكسۋالدىق ءزابىر كورسەتكەنى ءۇشىن جۇمىستان قۋىلعان  ۇستاز استاناداعى ەليتالى مەكتەپتەردىڭ بىرىندە ساباق بەرىپ كەلگەن.  ءقاۋىپتى پەداگوگتى ەلوردالىق ءبىلىم ورداسىنىڭ جۇمىسقا قالاي قابىلداعانى بەلگىسىز. تەك جاقىندا ستۋدەنتتەردى ساياحاتقا الىپ بارعان شەتەلدىك ءمۇعالىمنىڭ  قۇيتۇرقى ارەكەتى اشكەرە بولدى. بۇل تۋرالى ەۋرازيا ءبىرىنشى ارناسى حابارلايدى.

استاناداعى حالىقارالىق مەكتەپتە ساباق بەرىپ كەلگەن اتى شۋلى ۇستازدىڭ ەكى ءتۇرلى ەسىمى بار ەكەن. ستيۆەن دجەكسوننىڭ ءاتى-جونى بۇرىن ستيۆەن مەيەرس بولعان. دەمەك، قازاقستانعا كەلەر الدىندا قۇجاتىن اۋىستىرىپ العانعا ۇقسايدى. 

مۇنداي اقپارات ينتەرنەتتە بار.  ودان سەكسۋالدىق ءزابىر كورگەن شەتەلدىك ستۋدەنتتەر مەن مۇعالىمدەر ارنايى سايت اشىپ، ءقاۋىپتى پەداگوگتىڭ قايدا جۇمىس ىستەگەنىن، كىم ەكەنىن بارلىعىن جاريالاعان. بۇعان دەيىن انگليا، امەريكانىڭ بىرنەشە شتاتىندا، افريكا ەلدەرىندە، قىتايدا ساباق بەرەمىن دەپ،  ءمۇعالىمنىڭ ماسكاسىن كيگەن شەتەلدىك ۇستاز قارا تىزىمدە تۇرعان. 

حالىقارالىق مەكتەپ باسشىلىعى:  «وسى وقيعانى تەرگەۋ كەزىندە شەتەلدىك ءمۇعالىمنىڭ بۇرىن بالالارمەن قارىم-قاتىناسىنا قاتىستى كەلەڭسىز اقپاراتتار انىقتالدى. كريمينالدىق تەكسەرۋ شارالارى حاتتاماعا سايكەس جۇرگىزىلدى. ونىڭ سوتتالعانى، باسقا دا جازبالار انىقتالعان جوق».

ءقاۋىپتى ءمۇعالىمنىڭ ەلورداداعى حالىقارالىق مەكتەپكە قالاي جۇمىسقا قابىلدانعانى بەلگىسىز. تەك جاقىندا الماتىعا ساياحاتتاپ بارعان كەزىندە ونىڭ قۇيتۇرقى ارەكەتى اشكەرە بولدى. حالىقارالىق مەكتەپتەگى ماسەلەنى ءبىلىم ءمينيسترى دە جاقسى بىلەدى. ءبىراق ەرلان ساعادييەۆ اسىعار ەمەس، ستۋدەنتتەرگە سەكسۋالدىق ءزابىر كورسەتكەن ۇستازعا قاتىستى ءمان-جايدى ءالى قاراستىرىپ جاتىر.   

«مەن ونى بىلمەيمىن. زاپروستى جىبەرىپ،  حات كەلسە مىندەتتى تۇردە سىزگە جاريالايمىن. ونى قاراستىرۋ كەرەك، ىشىندە نە بولعانىن»، - دەيدى ق ر ءبىلىم جانە عىلىم ءمينيسترى ەرلان ساعادييەۆ. 

ءناپسىقۇمار شەتەلدىك ۇستازدى  جۇمىسقا قابىلداعان حالىقارالىق مەكتەپتىڭ 31 مەملەكەتتە فيليالى بار ەكەن. قازاقستاننىڭ وزىندە استانا، الماتى جانە اتىراۋ قالاسىندا بولىمدەرى جۇمىس ىستەيدى. قىزمەتتەن قۋىلعان پەداگوگ ەلدەن كەتىپ قالعان. بۇدان باسقا ءبىلىم مينيسترلىگى دە، اتى دارداي مەكتەپ تە ەشقانداي مالىمەت تاراتپادى.