13 جەلتوقسان كۇنى الماتىدا قاسقايىپ تۇرعان «قازاقستان» ءقوناقۇيىنىڭ «Grand Palace» زالىندا «تۇركىتىلدەس جۋرناليستەر قورى» قوعامدىق قورىنىڭ 16 جەلتوقسان – قازاقستان رەسپۋبليكاسى تاۋەلسىزدىك كۇنى مەن 15 قاراشا – قارجىگەرلەر كۇنىنە وراي بۇقارالىق اقپارات قۇرالدارى اراسىندا وتكىزگەن «ەركىن ءسوز» شىعارماشىلىق بايقاۋى جەڭىمپازدارىن ماراپاتتاۋ كەشى ءوتتى. جۇزدەن اسىپ جىعىلاتىن ءجۋرناليستتىڭ باسىن قوسىپ، ەكونوميكالىق تاقىرىپتا ماتەريال جازاتىن ارىپتەستەر رۋحىن، ءال-قۋاتىن كوتەرۋدى نيەت ەتكەن ءنازيا جويامەرگەنقىزىنا العىس ءبىلدىرىپ جاتقانداردىڭ قاراسى زالدا كوپ بولدى. سەرتيفيكات، اق كونۆەرت، قىزىل گۇل جانە ءار ءتۇرلى سىيلىق/سەرتيفيكات الىپ، ماز-مەيرام بولعان جۋرناليستەر دە از بولمادى.
«عىلىمي جاڭالىقتى نەگە جاتىرقايمىز؟» دەگەن ماتەريالىمەن بايقاۋدىڭ باس جۇلدەسى مەن 500 000 تەڭگەسىن قانجىعاسىنا بايلاعان دينا يمامبايمەن "قامشى" ءتىلشىسى كىشىگىرىم سۇحبات قۇرعان بولاتىن. "قامشى" وقىرماندارىن الدا كەلە جاتقان تاۋەلسىزدىك كۇنىمەن قۇتتىقتاپ وتكەن دينا يمامباي قۋانا-قۋانا قۇپياسىمەن ءبولىستى.
– دينا حانىم، الەۋمەتتانۋشىسىز با؟ ءجۋرناليستسىز بە؟
–جۋرناليست ەمەسپىن. الەۋمەتتانۋ عىلىمىنىڭ ماگيسترىمىن. قوعامداعى ءتۇرلى ماسەلەلەردى زەرتتەيتىن الەۋمەتتانۋدى عىلىمي جۋرناليستيكا دەر ەدىم. سول سەبەپتى ءوز سفەرامدا ءجۇرمىن دەپ ايتا الامىن. «انا ءتىلى» گازەتىندە ءبولىم رەداكتورى بولىپ قىزمەت اتقاردىم. بۇگىنگى تاڭدا «اقيقات» جۋرنالىنىڭ ءبولىم رەداكتورىمىن.
–جۋرناليستيكاعا بەت بۇرعانىڭىزعا قانشا جىل؟
–2-3 جىلدىڭ كولەمى.
–«ەركىن سوزدە» ءبىرىنشى رەت ب ا ق سىنادىڭىز با؟ بۇل بايقاۋ نەسىمەن ەرەكشە؟
–ءيا، ءبىرىنشى رەت قاتىسىپ، ءبىرىنشى اتاندىم. جالپى، بايقاۋلارعا وسىعان دەيىن قاتىسقان ەمەسپىن. «ەركىن ءسوزدىڭ» نەگىزگى تاقىرىبى – ەكونوميكا، قارجى ماسەلەلەرى عوي. بۇل ءبىزدىڭ تۇرمىس-تىرشىلىگىمىز، ءال-اۋقاتىمىز، كۇنكورىس كۇنىمىز، بىلايشا ايتقاندا. وسىنداي بايقاۋدى وتكىزگەن ۇيىمداستىرۋشىلارعا العىس ايتقىم كەلەدى.
–بايقاۋ بولاتىندىعىن قايدان ەستىپ ءبىلدىڭىز؟
–جۋرناليستەردىڭ ۆاتساپتاعى چاتىنان.
–500 000 تەڭگەلىك ماقالانىڭ اتاۋى قانداي؟ وقىرمان ونىمەن قالاي تانىسا الادى؟
–«عىلىمي جاڭالىقتى نەگە جاتىرقايمىز؟» دەپ اتالادى. بۇل ماقالا «انا تىلىندە» 2018 جىلدىڭ 18 قاڭتارىندا جاريالانعان بولاتىن. «قامشىنىڭ» وقىرماندارى ءۇشىن سايتتارىڭىزدا جاريالاۋعا دايىنمىن.
♦عىلىمي جاڭالىقتى نەگە جاتىرقايمىز؟
جالپى، بۇل مەنىڭ ماگيسترلىك ديسسەرتاسيامنىڭ تاقىرىبىمنىڭ مازمۇنىنا، يدەياسىنا سايكەس كەلەدى. ءارى قاراي دامىتىپ، ماقالاعا اينالدىرعانىم. كەز كەلگەن دۇنيەنى زەرتتەپ، زەردەلەمەسەم، قولىما قالام المايتىن جانمىن. بۇل ماقالانى ويلانىپ، تولعانىپ، ساراپشىلاردان پىكىر الىپ، 2-3 اي جازدىم. ءبىر ايتا كەتەرلىگى، عالىمداردىڭ يدەياسىن وندىرىسكە ەنگىزۋ ءبىزدىڭ ەلدە تىم باياۋ جۇرگىزىلەدى.
–ارنايى «ەركىن ءسوز» ءۇشىن جازدىڭىز با؟
–جوق، قىس كەزىندە ماقالام گازەت بەتىندە شىعىپ قويعان بولاتىن. بايقاۋ تۋرالى ەستىگەندە جاي عانا جىبەرە سالدىم.
–500 000 تەڭگەنى قالاي جۇمساماقشىسىز؟
–اسا ءبىر ۇلكەن سوما ەمەس جوسپار قۇراتىنداي، جالپى، وتباسىما جۇمسايمىن. نەگىزى جەڭىسكە جەتەمىن دەگەن وي بولمادى. بىرىنشىدەن، بايقاۋدىڭ ءادىلقازىسى ادەتتە تەلەجۇرگىزۋشىلەر بولادى. مەن ولاردان دەڭگەي كۇتپەيمىن. ەكىنشىدەن، "جۋرفاك" بىتىرگەندەر مەنەن مىقتى جازادى دەپ كۇتتىم. سويتسەم، مەن جەڭدىم.
