اقتوبەدە سالتاناتتى تۇردە تۇڭعىش McDonald’s مەيرامحاناسى اشىلدى.

- مەملەكەت باسشىسىنىڭ تاپسىرماسىمەن اقتوبە اگلومەراسياسىن دامىتۋ جۇمىستارى بەلسەندى جۇرگىزىلىپ جاتىر. اقتوبە ودان دا كوپ ينۆەستيسيا تارتاتىن زاماناۋي سان قىرلى دامۋ ورتالىعىنا اينالۋدا. ۇلكەن قالانىڭ دامۋى مەن قۇرىلۋى شاعىن جانە ورتا بيزنەستىڭ وسۋىمەن، جاڭا بيزنەس جوبالاردىڭ قۇرىلۋىمەن قاتار جۇرەدى. بۇگىندە شوب سالاسىندا 135 مىڭنان اسا اقتوبەلىك ەڭبەك ەتەدى، ولار 370 ملرد تەڭگەدەن استام سوماعا ءونىم شىعارعان. جاڭا مەيرامحانا اقتوبەلىكتەردىڭ تانىمال دەمالىس ورىندارىنىڭ بىرىنە اينالاتىنىنا سەنىمدىمىن،-دەدى اقتوبە وبلىسىنىڭ اكىمى بەردىبەك ساپاربايەۆ مەيرامحانانىڭ اشىلۋ راسىمىندە.

اقتوبە - قازاقستانداعى الەمگە تانىمال برەندتىڭ مەيرامحانالارى جۇمىس جاساپ جاتقان استانا، الماتى مەن قوستاناي قالالارىنان كەيىنگى ءتورتىنشى قالا.

- بۇگىن قازاقستانداعى 13ء-شى جانە اقتوبەدە ءبىرىنشى McDonald’sء-تى اشىپ وتىرمىز، مەيرامحانا قالا تۇرعىندارى مەن قوناقتارىن تارتاتىن ورتالىققا اينالادى دەپ ۇمىتتەنەمىز. McDonald’s الەۋمەتتىك جاعىنان جاۋاپتى كومپانيا رەتىندە قازاقستاندا بەلسەندى ءومىر سالتىن ەنگىزۋدى، ءبىلىم بەرۋ، مادەنيەت پەن سپورتتىق باعدارلامالاردى بەلسەندى تۇردە قولدايدى. ءبىز 25،5 ملن تەڭگەگە قايىرىمدىلىق كومەك كورسەتتىك. قازاقستانداعى McDonald’s ساۋدا بەلگىسى قازاقستان رەسپۋبليكاسىنىڭ ۇلتتىق پاراوليمپيادا كوميتەتىنىڭ دەمەۋشىسى بولىپ تابىلادى، - دەدى McDonald’s فرانشيزاسىنىڭ قازاقستانداعى قوجايىنى قايرات بورانبايەۆ.

جالپى الاڭى 470 شارشى مەتر بولاتىن مەيرامحانانىڭ ىشىندە 96 جانە جازعى الاڭىندا 64 وتىراتىن ورىن بار. مەيرامحانا كولىك جۇرگىزۋشىلەرىنە قولايلى بولۋ ءۇشىن ىشكى پەريمەترلەر بويىنشا McDrive جۇيەسىمەن جابدىقتالعان. سونىڭ ارقاسىندا كولىكتەن شىقپاي-اق تاپسىرىس بەرىپ، تولەم جاساپ، الۋعا بولادى. كولىك جىبەرۋ مۇمكىندىگى ورتاشا العاندا ساعاتىنا 100 ماشيناعا دەيىن جەتەدى.

مەيرامحانادا كىشكەنتاي كەلۋشىلەرگە ەرەكشە كوڭىل بولىنگەن. بالالار ءۇشىن لابيرينت، ينتەراكتيۆتى ەدەنى، كسيلوۆونى، ۇستەل ويىندارى مەن باسقا دا ويىن-ساۋىقتارى بار ارنايى ويىن بولمەسى جابدىقتالعان.