اقتوبە وبلىسىنىڭ اكىمى Sinopec Group كورپوراسياسىن كەلىسىمشارتتىق مىندەتتەرىن ورىنداۋعا شاقىردى.

اقتوبە وبلىسىنىڭ اكىمى بەردىبەك ساپاربايەۆ قىتايلىق Sinopec Group مۇناي-حيميا كورپوراسياسىنىڭ ورتالىق ازياداعى وكىلدىگىنىڭ باس ديرەكتورى فان سياننانمەن كەزدەستى.

كەزدەسۋ كەزىندە «ساعىز پەترولەۋم كومپاني» ج ش س، «قازاقويل اقتوبە» ج ش س جانە «سينوپەك قازاقستان» حقمك» ج ش س كومپانيالارىنداعى ۇجىمدىق كەلىسىمشارت جاعدايلارى مەن وندىرىستىك باعدارلامالاردىڭ ورىندالۋ ماسەلەلەرى تالقىلاندى. ولاردىڭ ءبارى دە اقتوبە وبلىسىنىڭ اۋماعىندا جۇمىس جاسايدى جانە Sinopec Group قۇرامىنا كىرەدى.

بەردىبەك ساپاربايەۆ:

- ءبىزدىڭ وبلىس جىلدى ەكونوميكاسىنىڭ ءوسىمىن بەس پايىزبەن اياقتاۋعا نيەتتى. جىلدىڭ قورىتىندىسىندا مۇناي ءوندىرۋ بويىنشا جىلدىق جوسپاردى قامتاماسىز ەتۋلەرىڭىزدى سۇرايمىن. ينۆەستيسيا بويىنشا سۇراقتار بار – «ساعىز پەترولەۋم» مەن «سينوپەك قازاقستان» حقمك» قازىرگى تاڭدا جوسپاردى 1 ملرد تەڭگەگە ورىنداماعان. بۇل سومانى جىل سوڭىنا دەيىن قامتاماسىز ەتۋ كەرەك، سونىمەن قاتار، ەڭبەكاقى بويىنشا ءوسىمدى دە قامتاماسىز ەتۋ قاجەت. مۇندا «قازاقويل» بويىنشا ماسەلە جوق، ءبىراق قالعان ەكى كومپانياداعى ەڭبەكاقى ءوسىمى ينفلياسيا دەڭگەيىنەن تومەن بولماۋى ءتيىس،- دەپ اتاپ ءوتتى.

وبلىس اكىمى سونداي-اق، كاسىپورىنداردىڭ 2019 جىلعا ارنالعان نەگىزگى وندىرىستىك مىندەتتەرىن اتادى. ولاردىڭ ىشىندە وندىرىستىك كورسەتكىشتەر مەن ينۆەستيسيانى ارتتىرۋ، ساتىپ الۋدىڭ جەرگىلىكتى مازمۇنداعى ۇلەسىن ارتتىرۋ، جەر قويناۋىن پايدالانۋداعى كەلىسىمشارت بويىنشا الەۋمەتتىك مىندەتتەردى تولىق كولەمدە ورىنداۋ جانە ت.ب. بار.

- باستىسى - كەلىسىمشارتتىق مىندەتتەردى ورىنداۋ. بيىلعى جىلدىڭ قورىتىندىسى بويىنشا قۇزىرلى مينيسترلىكتەرمەن بىرگە بارلىق جەر قويناۋىن پايدالانۋشىلاردىڭ كەلىسىمشارتتىق مىندەتتەرى بويىنشا اتقارۋشىلىق ءتارتىبى قارالادى. ءسىزدىڭ كاسىپورىندارىڭىزعا قاتىستى ەلەۋلى شاعىمدار بولۋى مۇمكىن،-دەدى ءوڭىر باسشىسى.

بەردىبەك ساپاربايەۆ سونداي-اق، ىلەسپە گازدى جاعۋدى جانە اتىلۋىن تومەندەتۋدى تالاپ ەتتى. سول ءۇشىن بايعانين اۋدانىندا ارنايى گاز وڭدەۋ كەشەنى سالىنعان.

فان سياننان: «بۇل ءبىز ءۇشىن جاقسى جاڭالىق. ءبىز دە گازدى بوسقا جاعۋعا مۇددەلى ەمەسپىز. بۇل وتە جاقسى ۇسىنىس»،-دەپ جاۋاپ بەردى.

جالپى، Sinopec Group كومپانياسىنىڭ ورتالىق ازياداعى وكىلدىگىنىڭ باس ديرەكتورى اعىمداعى جىلدىڭ قورىتىندىسى بويىنشا كومىرسۋتەك شيكىزاتىن ءوندىرۋ جوسپارى تولىق كولەمدە ورىندالاتىنىنا، سونداي-اق، جۇمىسشىلاردىڭ ەڭبەكاقىلارىن كوتەرۋ جانە اقتوبە وبلىسىندا بولات

قۇبىرلار، الماز قاشاۋلار مەن مۇناي جابدىعىن وندىرەتىن زاۋىت سالۋ ماسەلەلەرى قارالاتىنىنا ۋادە بەردى.