جىل سايىن تەڭىز دەڭگەيى كوتەرىلىپ، الەمگە ايگىلى قالالار مەن تەڭدەسسىز تۋريستىك ورىنداردى سۋ باسۋ ءقاۋىپى ارتىپ كەلەدى. كەيبىر قالالار ءقازىردىڭ وزىندە قارقىندى تۇردە سۋ استىنا كەتىپ جاتىر. ەگەر ارالعا بارۋدى ارمانداپ، كورگىڭىز كەپ جۇرگەن قالالار بولسا، ۋاقىت سوزباي ساياحاتقا شىققانىڭىز ءجون. عالىمداردىڭ ايتۋىنشا، كەيبىر قالالار جاقىن ونجىلدىقتا جەر بەتىنەن جويىلۋى مۇمكىن. Qamshy.kz اقپارات اگەنتتىگى زەرتتەۋشىلەردىڭ پىكىرلەرىنە سۇيەنە وتىرىپ، "سۋعا باتىپ بارا جاتقان" قالالار تۋرالى دەرەكتەر ۇسىنادى.

مالديۆ – 1000-نان استام شاعىن ارالداردان قۇرالعان تابيعاتتىڭ تەڭدەسسىز سىيى. سوڭعى جىلدارى وسىناۋ تانىمال تۋريستىك ورىنعا ينۆەستورلار قارجى سالۋدى ازايتقان. سەبەبى، ساراپشىلاردىڭ بولجامىنا سايكەس مالديۆ ارالدارى جىل سايىن بىرنەشە سانتيمەترگە سۋ استىنا باتىپ بارادى. بۇگىنگى تاڭدا مالديۆ ارالدارىنا جىل سايىن مىڭداعان توننا قۇم توگىلۋدە. ولاي بولماعان جاعدايدا الداعى 30 جىلدىڭ ىشىندە اۋماعى 90 مىڭ شارشى شاقىرىمدى قۇرايتىن مالديۆ ارالدارى تولىعىمەن سۋ استىندا قالۋى مۇمكىن.

2012 جىلدان بەرى "سۋ قالاسى" اتانعان ۆەنەسيادا سۋ دەڭگەيى كوتەرىلىپ كەلەدى. ءتىپتى، كوشەلەرگە كوپىرلەر مەن ۋاقىتشا سۋاستى جولدارى دا سالىنعان. جىلىنا 5 ميلليمەترگە سۋعا باتىپ بارا جاتقان ۆەنەسيا ءۇشىن جىل سايىن تۋريستەردىڭ كوبەيۋى دە كەرى اسەر ەتۋدە. ءبىر جىلدا بۇل قالانى كورۋگە الەمنەن 10 ميلليونعا جۋىق تۋريست كەلەدى ەكەن. ادام سانىنىڭ ارتۋى سالدارىنان سۋ دەڭگەيى ەكى ەسە كوتەرىلىپ كەتۋى مۇمكىن.

گوللانديانىڭ استاناسى امستەردام قالاسىنىڭ ورتا عاسىردا سالىنعان عيماراتتارىنىڭ تومەنگى قاباتتارى سۋ استىنا باتىپ بارادى. نيدەرلاندىنىڭ ەڭ تانىمال قالاسىندا سۋ دەڭگەيى جىل سايىن 8 ميلليمەترگە كوتەرىلۋدە. كانالى كوپ قالانىڭ كەي ايماقتارى الداعى 10 جىلدىقتا تولىعىمەن سۋ استىندا قالۋى مۇمكىن دەگەن بولجامدار ايتىلۋدا.

مانحەتتەن قالاسى تەڭىز دەڭگەيىنەن نەبارى – 4،5 مەترگە عانا بيىك ورنالاسقان. عالىمدار تەك 2021 جىلدىڭ وزىندە تەڭىز دەڭگەيى 20 سانتيمەترگە كوتەرىلەدى دەپ دابىل قاعۋدا. حالىق سانىنىڭ كوپتىگى مەن ورنالاسۋ تىعىزدىعى، الپاۋىت عيماراتتار سانىنىڭ ارتۋى مانحەتتەندى تابيعي اپات الدىندا شاراسىز جاعدايعا قالدىرۋى ابدەن مۇمكىن.

عالىمداردىڭ بانگكوك تۋرالى بولجامى دا دابىل قاعارلىقتاي. 2030 جىلعا قاراي تايلاندتىڭ تانىمال قالاسى سۋ استىنا كەتۋى مۇمكىن. تولاسسىز جاۋاتىن جاڭبىرلى ماۋسىمنىڭ سالدارىنان بولەك، تەڭىز دەڭگەيىنىڭ كوتەرىلۋىنە قالاداعى قوناقۇيلەر مەن ۇلكەن عيماراتتاردىڭ كوبەيۋى دە اسەر ەتۋدە.

بانگكوك "سۋعا باتىپ بارا جاتقان" ازياداعى جالعىز مەگاپوليست قالا ەمەس. ونىڭ قاسىنا شانحاي شاھارى دا قوسىلدى. ول جىل سايىن قارقىندى تۇردە 10 سانتيمەترگە سۋ استىنا شوگىپ بارادى. جاھاندىق جىلىنۋ مەن اتموسفەرانىڭ لاستانۋى الەمدىك ماڭىزى بار قالالار مەن تانىمال تۋريستىك ورىنداردىڭ جەر بەتىنەن جويىلۋىنا ىقپال ەتۋدە.