بۇگىندە قىتايعا قاتىستى قانداي دەرەك ەستىسەك تە، وڭايشىلىقپەن تاڭدانا قويمايتىن حالگە جەتتىك. الايدا، جەرگىلىكتى HAP/Quirky China News/REX اتتى قىتايدىڭ اقپاراتتىق سايتىنىڭ تىلشىلەرى «الەمدەگى ەڭ قاتتى جالعىزسىرايتىن» وقۋشى تۋرالى فوتو-رەپورتاج جاساعان ەكەن. 2 ميلليارد حالقى بار، تىعىزدىعى جوعارى جۇڭگو ءۇشىن بۇل شىنىمەن دە تاڭعالاتىن دەرەك. Qamshy.kz اقپارات اگەنتتىگى بىرنەشە جىل بۇرىن جاريالانسا دا، الەۋمەتتىك جەلىدە ءالى كۇنگە حالىقتىڭ تاڭدانىسىن تۋدىراتىن فوتو-رەپورتاجدان سۋرەتتەر ۇسىنادى.

العاشقىدا مەكتەپ پارتاسىندا بار زەيىنىن تاقتاداعى جازۋعا اۋدارعان حۋ يانگ كادىمگى مەكتەپ وقۋشىسى سياقتى كورىنەدى. دەگەنمەن، ول - قىتايدىڭ فۋسزيان پروۆينسياسىنداعى شاعىن اۋىلدىڭ باستاۋىش مەكتەبىندەگى جالعىز عانا وقۋشىسى. 2005 جىلى مەكتەپ اشىلعاندا 24 سىنىپ بولعان. ءۇش قاباتتى وقۋ ورنى بۇگىندە تەك ءبىر وقۋشىنى وقىتىپ جاتىر. ال حۋ ەكى مۇعالىمنەن ساباق الادى. ميللياردتاعان حالقى بار جۇڭگو ءۇشىن مۇنداي جايت ادام سەنگىسىز سياقتى.

مەكتەپ وقۋشىسىنىڭ سانىن ەسكەرسەك، مۇعالىمدەردىڭ جەتىسپەۋشىلىگى تۋىندامايدى. بارلىق پاندەر بويىنشا تەك ەكى ءمۇعالىم ساباق بەرەدى. ساباق كۇندەلىكتى باسقا مەكتەپتەر سياقتى ارنايى كەستەمەن وتەدى.

2010 جىلى مەكتەپتە 80 وقۋشى بولعان. ەكى جىلدان كەيىن تەك 17 بالا قالادى. سوڭعى جىلدارى بۇل مەكتەپتە جالعىز يانگ وقىپ ءجۇر. «ءبىر عانا وقۋشىمىز بولسا دا، ساباقتى ءبىلىم مينيسترلىگىنىڭ جوسپارىنا ساي كۇندەلىكتى وتكىزەمىز. وقۋ ۇلگەرىمى جاقسى. الداعى ۋاقىتتا باسقا بالالار سياقتى تولىققاندى مەكتەپكە بارادى دەپ ويلايمىز»،-دەيدى ۇستازى چەنگ چيسيونگ. وقۋشىلار مەكتەپتى تاستاپ كەتكەن، نە بولماسا اتا-انالارىنىڭ جۇمىسىنا بايلانىستى باسقا جاقا كوشىپ كەتكەن. حۋ يانگتىڭ الدىندا ونىڭ اپكەسى دە مەكتەپتەن كەتكەن.

فۋسزيان پروۆينسياسى قىتايدىڭ وڭتۇستىك-باتىسىندا، تاۋلى ايماقتا ورنالاسقان. 35 ميلليون حالقى بار. الايدا، سوڭعى جىلدارى كوپتەگەن تۇرعىندار باسقا قالالارعا تابىس تابۋ ماقساتىندا كوشىپ كەتكەن. 

ۇسىنعان: بالجان حالىق