اقتوبە وبلىسىندا "ورامال داۋىنا" بايلانىستى بالالارى مەكتەپكە بارماي وتىرعان ەكى اتا-اناعا 12625 تەڭگەدەن (بەس ايلىق ەسەپتىك كورسەتكىش نەمەسە اەك) ايىپپۇل سالىندى. ولاردىڭ بالالارى اقتوبە قالاسىنداعى №8 جانە №60 مەكتەپتە وقيدى دەپ جازادى Qamshy.kz اقپارات اگەنتتىگى ازاتتىقتىڭ دەرەگىن نەگىزگە الىپ.  بۇل تۋرالى اقتوبە وبلىسىنىڭ ءبىلىم سالاسىنداعى باقىلاۋ دەپارتامەنتىنىڭ ءبولىم باسشىسى جانار مۇحامبەتالينا ايتتى.

— تاعى ەكى اتا-اناعا بەس اەك-كە تەڭ ايىپپۇل سالىندى. ولار اكىمشىلىك قۇقىق بۇزۋشىلىق كودەكسىنىڭ 409-بابىنىڭ 2-تارماعىندا كورسەتىلگەن ("اتا-انالاردىڭ نەمەسە وزگە دە زاڭدى وكىلدەردىڭ ءبىلىم بەرۋ زاڭناماسىندا كوزدەلگەن مىندەتتەردى ورىنداماۋى نەمەسە تيىسىنشە ورىنداماۋى") تالاپتى بۇزدى دەپ ايىپتالىپ وتىر، - دەيدى جانار مۇحامبەتالينا.

اقتوبە وبلىستىق ءبىلىم باسقارماسىنىڭ دەرەگىنشە، ءقازىر وبلىس اۋماعىندا "مەكتەپ فورماسىن بۇزعاندىقتان" ساباققا قاتىسا الماي وتىرعان 10 بالا بار. ولار ەكى توقسان بويى ساباققا كەلمەگەن. ءبىلىم دەپارتامەنتى بۇل بالالاردىڭ اتا-انالارىمەن ءتۇرلى ءتۇسىندىرۋ جۇمىستارىن بىلتىردان جۇرگىزىپ كەلەدى.

اقتوبە وبلىسىنىڭ ءبىلىم سالاسىنداعى باقىلاۋ دەپارتامەنتى 2018 جىلى "ورامال داۋىنا" وراي جالپى سانى 33 اتا-اناعا ايىپپۇل سالعان. بيىل بۇل ساناتقا تاعى ەكى اتا قوسىلدى. اكىمشىلىك شارا قولدانىلعانداردىڭ سەگىزى — اقتوبەدەگى №31 مەكتەپتىڭ اتا-انالارى.

№31 مەكتەپتىڭ بۇرىنعى ديرەكتورى ساۋلە بايماعامبەتوۆا "ورامال داۋىنان ابدەن قاجىپ، قىزمەتىنەن كەتۋگە ءماجبۇر بولعانىن" ايتادى. ساۋلە بايماعامبەتوۆا ءقازىر ءوزى باسقارعان مەكتەپتە فيزيكا پانىنەن ساباق بەرىپ ءجۇر. بۇل مەكتەپتىڭ ورامال تارتاتىن التى وقۋشىسى قىركۇيەكتەن بەرى مەكتەپكە كەلمەگەن.

بۇعان دەيىن اقتوبە قالالىق سوتى ورامال داۋىنا بايلانىستى قالاداعى ونداعان مەكتەپ ديرەكتورىنىڭ ۇستىنەن اتا-انالار تۇسىرگەن شاعىمىن قاناعاتتاندىرماعان. اتا-انالار ورامال تارتاتىن قىزدارىن مەكتەپكە كىرگىزبەگەن مەكتەپ ديرەكتورىنىڭ ىس-ارەكەتىن زاڭسىز دەپ تانۋدى سۇراعان.