كاسىپقوي بوكستا ءتورت رەت قانا ايقاسقا تۇسكەن جانىبەك ءالىمحان ۇلى ءوزىنىڭ ينستاگرامداعى پاراقشاسىندا دۇنيە ءجۇزى بويىنشا ورتا سالماقتاعى ەڭ مىقتى ءۇش بوكسشىعا سەس كورسەتتى. ەندى جانىبەك باۋىردىڭ سوزىنە نازار سالايىق: «قالايسىڭدار، چەمپيوندار؟ ۇتىلىپ قالماڭدار. جاقىندا ءارقايسىڭنان ءوز بەلبەۋىمدى الامىن. ءقازىر سەندەر مەنى تەك ينستاگرامنان عانا كورىپ وتىرسىڭدار. جاقىندا رينگتە بەتپە-بەت جۇزدەسەمىز. سەندەرگە قازاق بوكس ءستيلىن كورسەتەمىن. ول جەكپە-جەك ومىرلەرىڭدەگى ەستەن كەتپەس جەكپە-جەك بولادى، سەنىڭدەر». جانىبەك جۇدىرىعىن بىلەپ وتىرعان ساڭلاقتار ءتۇرلى ۆەرسيالار بويىنشا دۇنيە ءجۇزىنىڭ چەمپيوندارى: ساۋل الۆارەس، دەنيەل دجەيكوبس، دەمەتريۋس اندرادە.

     مەكسيكالىق ساۋل الۆارەس بىلتىر گەنناديي گولوۆكيندى جەڭگەن سۇراپىل بوكسشى. WBA، WBA، WBO ۆەرسيالارى بويىنشا دۇنيە ءجۇزىنىڭ بىرنەشە دۇركىن چەمپيونى. جاسى 28-دە. 2013 جىلى فلويد مەيۆەزەرمەن قولعاپ تۇيىستىرگەن ساۋلدىڭ بوكس الەمىندەگى بەدەلى وتە جوعارى. ساۋل الۆارەستىڭ كاسىپقوي بوكسقا دەن قويعانىنا 13 جىلدان استى.ساۋل جاقىندا DAZN ونلاين-ستريمينگ كومپانياسىمەن 5 جىلعا 365  ملن.  دوللارلىق كەلىسىم جاسادى. بۇل الەمدىك سپورت تاريحىنداعى ەڭ ولجالى ساۋدا دەيدى بىلەتىندەر. وسىنداي سويقان بوكسشىنى جەكپە-جەككە شاقىرىپ وتىرعان ءبىزدىڭ جانىبەك  جۇرەك  جۇتقان باتىردىڭ ناعىز ءوزى-اۋ.

    ال امەريكالىق  دەنيەل دجەيكوبس 29 قارسىلاسىن نوكاۋتقا تۇسىرگەن دۇلەيدىڭ ءوزى. دەنيەل اۋەسقوي بوكستا 144 رەت شارشىعا ءتۇسىپ، ابدەن ىسىلىپ بارىپ كاسىپقوي بوكستىڭ تابالدىرىعىن اتتادى. IBF، WBA ۆەرسيالارى بويىنشا بىرنەشە رەت الەم چەمپيونى. جاقىندا 32-گە تولادى.  ول 2017 جىلى گەنناديي گولوۆكيننەن ۇپاي ايىرماسىمەن ۇتىلدى. ءبىراق باسەكە سوڭىنان قازىلار شەشىمىمەن كەلىسپەي، ەكى ۇپاي ارتىقشىلىعىمەن گولوۆكيندى ۇتتىم دەپ مالىمدەدى. دەنيەل ورتا سالماقتاعى ەڭ ءبىر سوققىسى ءزىلباتپان بوكسشىنىڭ ءبىرى.

     امەريكالىق  دەمەتريۋس اندرادە اۋەسقوي بوكستان 2007 جىلعى الەم چەمپيونى. كاسىپقوي رينگتە ون جىل بويى جان بالاسىنان جەڭىلىپ كورگەن جوق.  27 ايقاستىڭ   17-سىندە قارسىلاستارىن ەسەڭگىرەتىپ ۇتىپتى. دەمەتريۋس اندرادە  الداعى اقپاننىڭ سوڭىندا 31-گە تولادى. WBA،WBO ۆەرسيالارى بويىنشا دۇنيە ءجۇزىنىڭ بىرنەشە مارتە چەمپيونى.

   ءبىزدىڭ باتىر وسىنداي جىگىتتەرمەن جۇدىرىقتاسۋعا اسىعىپ ءجۇر ەكەن. قۇپتايمىز. تىلەكتەسپىز. بوكس دۇنيەسىندە  مۇحاممەد  ءالي، مايك تايسون، فلويد مەيۆەزەر، مەنني پاكياو دەڭگەيىندە ءبىر قازاقتىڭ اتوي سالعانىن ءبىز دە ارمان قىلامىز. ءبىراق بۇل جالعاندا ادام بالاسىنىڭ نىعمەتى اللانىڭ قولىندا ەكەنىن ءبىر ءسات ەستەن شىعارۋعا بولمايدى. جانىبەكتىڭ قاسىندا بەرىك سۇلتان سەكىلدى يماندى، تاربيەلى ازامات بار. سوندىقتان جاراتقان يە ءالى ءناسىپ ەتە قويماعان بەلبەۋدى «الامىن» دەگەننەن گورى، جانىبەكتىڭ: «بۇيىرتسا، الامىن» دەگەنى دۇرىس بولار ەدى. ويتكەنى، ءبىز ءالسىز پەندەمىز. ءبىر مينۋتتان كەيىن باسىمىزدا قانداي جاعداي بولاتىنى بىزگە بەلگىسىز.

    «مەنىڭ سالماعىمنىڭ چەمپيوندارى عوي. بۇيىرتسا، كوپ كۇتتىرمەيمىن. ءوزىمنىڭ دە كوپ كۇتكىم كەلمەيدى. لوماچەنكودان قازاق بوكسشىلارىنىڭ ەش جەرى كەم ەمەس. ءبىز دە قىسقا ۋاقىتتا چەمپيوندارمەن جۇدىرىقتاسا الامىز. بۇيىرتسا، از قالدى! ەڭ باستىسى، سەنىم جانە تىنباي جاتتىعۋ قاجەت!» ءيا، جانىبەك وسىلاي دەيدى. اللا تاعالا سەنى تىل-كوزدەن، كولدەنەڭ قىرسىقتان ساقتاسىن، جانىبەك باۋىر! بۇكىل الاش جۇرتى تىلەۋلەسىڭ ەكەنىن ءبىر ءسات ەسىڭنەن شىعارما!

    ەستەرىڭىزگە سالا كەتەيىك، جانىبەك ءالىمحان ۇلى 25 جاستا. اۋەسقوي بوكستان 2013 جىلعى الەم جانە ازيا چەمپيونى. 2014 جىلعى ازيا ويىندارىنىڭ جەڭىمپازى. جانىبەك ءقازىر الەمگە ايگىلى بوكس باپكەرى، امەريكالىق دجەيمس ماكگيرتتىڭ قول استىندا جاتتىعىپ ءجۇر. ماكگيرت 15-تەن اسا دۇنيە ءجۇزى چەمپيونىن باپتاۋعا اتسالىسقان وتە بىلىكتى مامان.

قىدىربەك رىسبەك