بۇركىتشى ايشولپان نۇرعايىپ قىزى نۇرسۇلتان نازاربايەۆقا ارماندارى جايلى ايتىپ بەردى. بۇل تۋرالى جاس بۇركىتشى استانا قالاسىندا ءوتىپ جاتقان «جاستار جىلى» فورۋمىندا ايتتى.

«قۇرمەتتى نۇرسۇلتان نازاربايەۆ، مەن سىزبەن كەزدەسۋدى قاتتى ارماندايتىنمىن، ارمانىم ورىندالدى.  پرەزيدەنتپەن كۇندە كەزدەسىپ جاتقان جوقپىن عوي، سول سەبەپتى ازداپ قوبالجىپ تۇرمىن. مەن قازاقستاندا، ءوز وتانىندا تۇرمايتىن 5 ميلليون قازاقتىڭ ءبىرىمىن. موڭعوليادا تۋىپ، ءوستىم. الايدا تۋعان ولكەم، اتامەكەنىم – قازاقستان ەكەنىن ەش ۋاقىتتا ۇمىتقان ەمەسپىن. مەن ءقازىر «نۇر وردا» حالىقارالىق مەكتەبىندە ءبىلىم الۋدامىن. مەن جايلى تۇسىرىلگەن بەينەروليكتى الەمنىڭ 33 مەملەكەتى تاماشالادى. فيلم ارقىلى الەم قازاقتىڭ ءسالت-داستۇرىن تانىدى»، - دەدى ايشولپان.

سونىمەن قاتار بۇركىتشى قىز ەلباسىن بايان-ولگەيگە شاقىردى.

«بۇركىتتى قولىما العاش رەت 8 جاسىمدا الدىم. بۇركىتتى باسقارۋ ءۇشىن ەرلىك كەرەك. 13 جاسىمدا بۇركىتشىلەر بايقاۋىندا ءبىرىنشى ورىنعا يە بولدىم، رەكورد جاڭارتتىم. ارمانىم – استانا مەن قازاقستاننىڭ وزگە دە قالالارىندا بۇركىتشىلەر مەكتەبىن اشىپ، بالالاردى ۇيرەتكىم كەلەدى. وسى جىلدى «جاستار جىلى» دەپ اتاعانىڭىزعا راقمەت. ءسىزدى بايان-ولگەيگە قوناق بولۋعا شاقىرامىز. داستارحانىمىزدان ءدام تاتىپ كەتىڭىز، الىستاعى اعايىننىڭ رۋحى ءبىر جاساپ قالسىن»، - دەدى جاس بۇركىتشى ءسوز سوڭىندا.

ايتا كەتەيىك، 2016 جىلى موڭعوليادا تۇراتىن قازاق قىزى ايشولپان نۇرعايىپ قىزى تۋرالى «بۇركىتشى قىز» اتتى رەجيسسەر وتتو بەللدىڭ دەرەكتى ءفيلمى شىققان بولاتىن. العاش رەت 2014 جىلى اعىلشىننىڭ Daily Mail باسىلىمى «قازاقتىڭ سالت-داستۇرىندەگى اسىل قۇندىلىقتاردىڭ ءبىرى — قۇسبەگىلىك ونەرىن يگەرگەن ون ءۇش جاسار جالعىز قىز» اتتى ايشولپان جايلى ماقالا جاريالاپ، ونى بۇكىل الەمگە تانىمال ەتتى. قانداسىمىز 2018 جىلى قازاقستانعا ارنايى شاقىرۋمەن كەلىپ، «ءبىلىم-يننوۆاسيا» حقق بەرگەن گرانتپەن «نۇر وردا» مەكتەپ ليسەيىندە ءبىلىم الىپ جاتىر.