قازاق بوكسشىسى سادريددين احمەدوۆ 27 قاڭتار كۇنى مونرەال قالاسىندا كاسىپقوي بوكستان جاستار اراسىندا الەم چەمپيونى اتانۋ ءۇشىن ايقاسقا تۇسەدى.

سادريددين 20 جاسىندا كاسىپقوي بوكسقا بەت بۇردى. ول  كانادانىڭ «Eye  of tye Tiger» پروۋموتەرلىك كومپانياسىمەن كەلىسىمگە كەلىپ، 2018 جىلى التى جەكپە-جەكتى نوكاۋتپەن ۇتىپ ۇلگەردى. ءسادريدديننىڭ كەلەسى قارسىلاسى – 22 جاستاعى مەكسيكالىق ابراحام حۋارەس (12-1، 4 كو). بۇل ەكەۋى WBC ۆەرسياسى بويىنشا 10 راۋندتىق ايقاستا جاستار اراسىنداعى الەم چەمپيونى اتاعىن ساراپقا سالادى.

سادريددين 10 جاسىنان استانالىق تاجىريبەلى باپكەر ماۋلەت ءمۇستافيننىڭ قول استىندا تەر توكتى. ءسادريدديننىڭ اكەسى ءامىرحان استاناعا وتباسىمەن جەتىسايدان كوشىپ كەلگەن ەكەن.  اڭگىمە بارىسىندا ماۋلەت اعامىزدان «ءسادريدديننىڭ ۇلتى كىم؟» دەپ سۇرادىق. «قازاق، - دەدى ماكەڭ كۇلىپ.- ماعان بۇل سۇراقتى قويۋشىلار از بولعان جوق. ءسادريدديندى ون جىلداي باپتاي ءجۇرىپ، تالاي قۇجات تولتىردىم. اكەسى مەن شەشەسىنىڭ پاسپورتىندا «قازاق» دەپ جازىلعان. سادريدديننەن كىسىلەر «قاي ۇلتسىڭ؟» دەپ سۇراسا، «ناعىز قازاقپىن!» دەپ جاۋاپ بەرەدى. قازاقشاعا اعىپ تۇر».

ق ر ەڭبەك سىڭىرگەن جاتتىقتىرۋشىسى ماۋلەت مۇستافين مەن شاكىرتى سادريددين احمەدوۆ

سادريددين 2011 جىلى كىشى جاسوسپىرىمدەر اراسىندا قازاقستان بىرىنشىلىگىن 36 كەلى سالماقتا ۇتسا، 2015 جىلى 64 كەلىدە رەسپۋبليكانىڭ جاستار چەمپيوناتىندا ۇزدىك شىقتى. ءتورت جىلدا 28 كەلىگە اۋىرلاعان. ياعني، جىلىنا ورتا ەسەپپەن 6،5 كەلىدەن قوسىپ وتىرعان ەكەن. بۇل دەگەنىڭىز ماۋلەت باپكەرگە قوسىمشا بەينەت دەگەن ءسوز. دەنە اۋىرلاعان سايىن بوكسشىنى جاڭا سالماققا بەيىمدەۋ كەرەك. قارسىلاسىڭ ۇنەمى وزگەرىپ تۇرادى. سالماقپەن بىرگە قولدىڭ كۇشىن، سوققىنىڭ تەگەۋرىنىن، ۇرىس ءتاسىلىن جەتىلدىرىپ وتىرماساڭ، جانە بولمايدى. جاڭا سالماققا پسيحولوگيالىق جاعىنان بەيىمدەلۋ، جاڭا قارسىلاستاردى زەرتتەۋ دە وڭاي شارۋا ەمەس. بۇل جىلدارى ماۋلەت باپكەر تىنىمسىز ىزدەنىس ۇستىندە بولدى. «سادريدديننەن ءۇمىت كۇتىپ، تۇزدە كوپ ءجۇردىم. جارىستان كەلە سالا ۇيدە شامالى ۋاقىت تىزە بۇگىپ، جاتتىعۋ جيىنىنا اسىعامىز. ونى شىڭداۋ ءۇشىن كۇندىز-تۇنى ىزدەنۋگە تۋرا كەلدى. ەڭبەكقور، قايراتتى بالا اۋەسقوي بوكستا ەكپىندەپ-اق كەلە جاتىر ەدى. 2017 جىلى اكەسى ءامىرحان ەكەۋى كاسىپقوي بوكسقا اۋىسامىز، دەدى. قالاي قارسى بولاسىڭ؟ ءامىرحان وتباسىمەن استانادا پاتەر جالداپ تۇرادى. ءتورت بالاسى بار. جاعدايلارىن كورىپ،ءبىلىپ جۇرگەن سوڭ بالانىڭ باعىن بايلامايىن دەدىم».

اي، شىركىن، قازاق باپكەرلەرى-اي! سەندەردىڭ كەڭ پەيىلدەرىڭە، تاباندى تىرلىكتەرىڭە، ادام ءتانتى بولار توزىمدەرىڭە، قارا جەردەي سابىرلى مىنەزدەرىڭە اللا رازى بولسىن! شاكىرتتەرىن كۋپەگە مىنگىزىپ، وزدەرى پلاسكارد ۆاگوندا، نە تامبۋردا جۇرسە دە قاباعىن شىتپايتىن اقيىق باۋىرلارىم سول! ءوز بالاسىنا قاراۋعا ۋاقىت تاپپاي ءجۇرىپ، كىسى بالاسى دەسە، اۋزىنداعىسىن جىرىپ بەرەتىن اڭقىلداعان ازاماتتار-اي! سادريددين ماۋلەت اعاسىنىڭ باپتاۋىمەن 2016 جىلى جاستار اراسىندا الەم چەمپيوناتىندا توپ جاردى. 2017 جىلى ەرەسەكتەر رينگىنە قادام باسىپ، «مىقتىمىن!» دەپ جۇرگەن تالاي بوكسشىنى ەرىكسىز تۇقىرتقانى بار. جالپى، ءيىسى مۇسىلمان جۇرتى ۇستازدىڭ قادىرىنە جەتە بىلگەن. سپورتتى باياعىدا دوعارسا دا، ۇستازدارىن الاقانىنا سالىپ جۇرگەن تەكتى جىگىتتەر قازاقتا از ەمەس.  ءيا، سادريددين كانادادا اتوي سالىپ جاتسا، ەلدە ماۋلەت ۇستازى تاقىمىن قىسىپ وتىرادى.

ماۋلەت باپكەر مىڭداعان جانكۇيەرمەن بىرگە ءسادريدديننىڭ ابراحام حۋارەسپەن جەكپە-جەگىن تاعاتسىزدانا توسىپ ءجۇر. تارازىنىڭ ءبىر باسىندا بۇكىل الاش جۇرتىنىڭ نامىسى تۇرعانىن ەستەن شىعارما، سادريددين باۋىر!

قىدىربەك رىسبەك