ۆەنەسۋەلانىڭ ۇلتتىق اسسامبلەيا باسشىسى حۋان گۋايدو ءوزىن ۋاقىتشا پرەزيدەنت قىزمەتىن اتقارۋشى رەتىندە تانىستىرىپ، بۇكىل جۇرتشىلىقتىڭ كوزىنشە انت قابىلدادى. اقش پرەزيدەنتى دونالد ترامپ، ءوز كەزەگىندە، گۋايدونى ەلدىڭ باسشىسى رەتىندە مويىندايتىنىن ايتتى. بۇل جايىندا Qamshy.kz اقپارات اگەنتتىگى جەرگىلىكتى باق-تىڭ دەرەكتەرىنە سۇيەنە وتىرىپ جازادى.

ۆەنەسۋەلا حالقى بىرنەشە جىلدان بەرى قازىرگى پرەزيدەنت نيكولاس مادۋرونىڭ وتستاۆكا كەتۋىن تالاپ ەتىپ جۇرگەنى بەلگىلى. ال بىرەر كۇن بۇرىن كاراكاس حالقى كوشەگە شىعىپ، ميتينگ ۇيىمداستىردى. قاراشا حالىق مادۋروعا قارسى شىعىپ، گۋايدونى قولدايتىنىن ءبىلدىردى.

گۋايدو حالىقتىڭ الدىندا وڭ قولىن جۇرەگىنە قويىپ: «بيلىكتى تارتىپ الۋعا شەكتەۋ قويۋعا، وتپەلى ۇكىمەتتى قالىپتاستىرۋعا جانە سايلاۋدى ءادىل وتكىزۋگە انت بەرەمىن» - دەدى.

جوعارىدا اتاپ وتكەنىمىزدەي، دونالد ترامپ وپپوزيسيا ليدەرى گۋايدونى رەسمي تۇردە ۆەنەسۋەلا پرەزيدەنتى رەتىندە مويىندايتىنىن ايتقان.

«ۆەنەسۋەلا حالقى باتىل قادام جاساپ، مادۋروعا جانە ونىڭ جۇيەسىنە قارسى شىعىپ، بوستاندىق پەن ادىلدىكتى، ءبارىنىڭ زاڭدى تۇردە شەشىلۋىن تالاپ ەتىپ وتىر»، - دەيدى ترامپ.

ءوز سوزىندە ول مادۋرونى "زاڭسىز وتىرعان پرەزيدەنت" دەپ اتاپ، ال ەلدەگى پارلامەنت – ۆەنەسۋەلا حالقىنىڭ تاڭداۋى بويىنشا سايلانعان جالعىز زاڭدى ورگان ەكەندىگىن ايتىپ ءوتتى.

سولتۇستىك كورەيا مەن وڭتۇستىك افريكا ەلدەرىن بىرىكتىرىپ وتىرعان امەريكالىق مەملەكەتتىك ۇيىمدار دا گۋايدونى پرەزيدەنت ەرتىندە مويىندايتىنىن مالىمدەدى.

«گۋايدونى ۋاقىتشا پرەزيدەنت قىزمەتىن اتقارۋشى لاۋازىمىمەن قۇتتىقتايمىز. ءبىز ءسىزدى تولىقتاي قولدايمىز جانە ەلدە دەموكراتيانى قالىپتاستىرادى دەپ سەنەمىز»، - دەپ جازادى ۇيىمنىڭ باس حاتشىسى لۋيس الماگرو ءوزىنىڭ الەۋمەتتىك جەلىدەگى پاراقشاسىندا.

ايتا كەتەيىك، قاڭتار ايىندا ەكىنشى رەت پرەزيدەنت تاعىنا وتىرعان نيكولاس مادۋرو سارسەنبى كۇنى اقش-پەن ديپلوماتيالىق قارىم-قاتىناستى ءۇزىپ، امەريكالىق ديپلوماتتارعا ەلدەن كەتۋگە 72 ساعات ۋاقىت بەردى.

«مەن اقش-پەن ديپلوماتيالىق جانە ساياسي قارىم-قاتىناستى ۇزۋگە شەشىم قابىلدادىم. اقش-تىڭ يمپەرياليستىك ۇكىمەتى ۆەنەسۋەلادا توڭكەرىس جاساپ، قۋىرشاق ۇكىمەتتى قۇرۋدى باسشىلىققا الدى. دونالد ترامپتىڭ ۆەنەسۋەلاعا قارسى جۇرگىزىپ وتىرعان ساياساتى ەلدى ءبولىپ تاستاۋ، ونىڭ دەموكراتيالىق ينستيتۋتتارىن جويىپ، ۇكىمەتتى كونستيتۋسيالىق ەمەس قۇرالدارمەن باسىپ-جانشۋ»، - دەيدى مادۋرو.

ونىڭ ايتۋىنشا، اقش بيلىگىنىڭ قولداۋى ارقاسىندا وپپوزيسيونەرلەر مەملەكەتتىك توڭكەرىس جاساۋعا تىرىسقان. سونداي-اق، مادۋرو قولىنان كەلگەنشە ەلدىڭ تاۋەلسىزدىگىن ساقتاپ قالاتىنىن جەتكىزدى.

«ءبىز تاۋەلسىز ەلمىز جانە وزگە ەلدەرمەن ديپلوماتيالىق قارىم-قاتىناسىمىزدى ۇزبەيمىز. سونىمەن قاتار، ءبىز كونستيتۋسيالىق ءتارتىپتى قالپىنا كەلتىرۋگە مىندەتتىمىز»، - دەپ ايتىپ ءوتتى مادۋرو.

ۆەنەسۋەلا پرەزيدەنتى امەريكالىق ديپلوماتتارعا: «كوزدەرىڭدى قۇرتىڭدار! ۆەنەسۋەلانى جايىنا قالدىرىڭدار. مۇنداعى ادامداردىڭ دا نامىسى بار!» - دەپ ولارعا  72 ساعاتتا ەلدەن كەتۋگە ۋاقىت بەردى.

ۆەنەسۋەلانىڭ جوعارعى سوتى ەلدەگى وپووزيسيالىق پارلامەنتكە قارسى قىلمىستىق ءىس قوزعاپ، الدىن الا تەرگەۋ باستاعانىن مالىمدەدى.

ەلدە وسىمەن ءۇشىنشى كۇن ميتينگ جالعاسۋدا. بەلگىلى بولعانىنداي، قارسىلىق اكسياسىنىڭ سالدارىنان 16-عا جۋىق ادام قازا تاپقان، ونىڭ ىشىندە 16 جاستاعى جەتكىنشەك تە بار ەكەن. جەرگىلىكتى باق-تىڭ حابارلاۋىنشا، جاپپاي قارسىلىق  شارالارى وزگە قالالاردا دا جالعاسىن تاپپاق.

دايىنداعان: نازەركە لابيحان