حالىقارالىق وليمپيادا كوميتەتىنىڭ پرەزيدەنتى قازاقتىڭ باس جاسار بالاسىنا اق باتاسىن بەردى، دەپ جازادى Qamshy.kz اقپارات اگەنتتىگى Abctv.kz سايتىنا سىلتەمە جاساپ.

شۆەيساريادا ءوتىپ جاتقان حالىقارالىق سپورت باسىلىمدارى قاۋىمداستىعىنىڭ (AIPS) 82ء-ىنشى كونگرەسىندە قىزىقتى وقيعا بولدى. لوزانناعا AIPS Sports Media Awards بايگەسىنىڭ جەڭىمپازدارىن ماراپاتتاۋعا كەلگەن حوك پرەزيدەنتى توماس باح قازاقتىڭ بەس جاسار بالاسىمەن «سەمسەرلەستى»...

2014 جىلى قازان ايىندا حالىقارالىق وليمپيادا كوميتەتىنىڭ پرەزيدەنتى توماس باح رەسمي ساپارمەن الماتىعا كەلگەن بولاتىن. سوندا قازاقستان سپورت باسىلىمدارى قاۋىمداستىعىنىڭ پرەزيدەنتى ءىلياس وماروۆ ءبىر جاستان اسقان ۇلى ءالتايىردى ەرتىپ بارىپ، قازاقى داستۇرمەن تۇساۋىن باحقا كەستىرگەن ەدى.

ءقازىر ءىلياس وماروۆ وسلودا تۇرادى. جۇمىس بارىسىمەن نورۆەگياعا اۋىسقان. توماس باحتىڭ AIPS كونگرەسىنە كەلەتىنىن ەستىپ، ءالتايىردى تاعى ەرتىپ باردى. سەبەبى ۇلى سەمسەرلەۋ سپورتىنا قاتىسادى. ال توماس باح – ءجاي عانا باسشى ەمەس، بۇرىنعى سپورتشى. سپورتتىڭ وسى تۇرىنەن 1976 جىلعى مونرەال وليمپياداسىنىڭ چەمپيونى. 1977 جىلعى الەم چەمپيونى.

توماس باح قازاق بالاسىنىڭ تۇساۋىن كەسكەنىن ۇمىتپاپتى. جىميا كۇلىپ، ەسىنە الدى. ءارى قولىنا راپيرا ۇستاپ، سەمسەرلەسۋ سپورتىمەن اينالىسىپ جۇرگەن ءالتايىرعا اق باتاسىن بەردى. ءتىپتى سەمسەرلەسۋ سپورتىنىڭ تەرميندەرىن ايتىپ، ءالتايىردىڭ ءار ءتۇرلى ادىستەردى ورىنداۋىن ءوتىندى...

ءوزى ونىڭ راپيراسىن دەنەسىنە تيگىزبەي، جالتارىپ وتىردى. «سىرى كەتسە دە، سىنى كەتپەگەن» قاس شەبەر ەكەندىگىن كورسەتتى. سودان سوڭ ءالتايىرعا يگى تىلەكتەرىن ايتىپ، ارقاسىنان قاقتى. ال ءىلياس حالىقارالىق وليمپيادا كوميتەتى پرەزيدەنتىنىڭ يىعىنا قازاقتىڭ ويۋلى شاپانىن جاۋىپ، سىي-قۇرمەت كورسەتتى. 

حالىقارالىق وليمپيادا كوميتەتىنىڭ پرەزيدەنتى توماس باحتان باتا العان قازاق بالاسى كىشكەنتاي بولسا دا، وزىنە ۇلكەن سەنىم ارتىلعاندىعىن سەزەتىن سياقتى. حوك پرەزيدەنتىنىڭ اق باتاسى ونىڭ تانىمال سپورتشى بولۋىنا ىقپال ەتىپ، باعىن اشسا، نۇر ۇستىنە نۇر ەمەس پە؟ سەمسەرلەسۋ سپورتىنان قازاقتان دا وليمپيادا چەمپيونى شىعۋىنا تىلەكتەسپىز... 

مارۋان ءتۇسىپ