بۇل جازبانى جازۋىما تۇرتكى بولعان سەبەپ، كەيدە دەمالىس كۇندەرى ۇيدە جۇمىس ىستەۋگە تۋرا كەلەدى.

ۇيدە جۇمىس ىستەۋدىڭ ءوز ماشاقاتى بار. كەزىندە بۇنداي پروبلەما مەكتەپ، ۋنيۆەرسيتەت ەمتيحانىنا دايىندالار كەزدە دە بولعان. قاراڭىزشى: ءۇي تاپ-تازا، بارلىق ءۇي شارۋالارى تىندىرىلعان، ءتۇس اۋىپ كەتكەن، ءبىراق ىستەيتىن جۇمىسىڭىز ءالى باستالعان جوق.

نەگە ۇيدە جۇمىس ىستەۋ قيىن؟ سەبەبى، ءتارتىپ كەرەك جانە ءوز-وزىڭىزدى جەڭە ءبىلۋ كەرەكسىز. ادەتتە، ۇيدە بارلىق نارسەمەن شۇعىلدانۋعا بولادى، تەك جۇمىس ىستەۋ قيىننىڭ-قيىنى. ءبىز ارينە تولىق كەڭسە اتموسفەراسىن ۇيدە ورناتا الماسپىز، دەگەنمەن، بەلگىلى ءبىر بەلەستەردى باعىندىرىپ كورمەكپىز.

1. جۇمىس ورنىڭىزدى ىڭعايلاستىرىپ الىڭىز.

ۇيدە جۇمىس ىستەۋ كەزىندە ەڭ كەرەتى نارسە - جۇمىس اتموسفەراسى. كينولاردا كورگەن بولارسىز، ءۇي يەسىنىڭ ءوز جۇمىس بولمەسى بار. وندايدى ومىردە دە كورگەنمىن، تانىسىمنىڭ اكەسىندە جەكە ۇيىندە جۇمىس بولمەسى بار ەدى. ءىشى اناۋ-مىناۋ ديرەكتور كابينەتىنەن كەم ەمەس. جەكە بولمە بولماسا دا، جۇمىس ىستەۋ ورنىن تاعايىنداۋ دا جوقتان جاقسى. جۇمىس ورنىڭىز الاڭداداتىن تەلەديدار سياقتى دۇنيەلەردەن الشاق بولعانى دۇرىس.

2. ىڭعايلى جۇمىس ۋاقىتىن پايدالانىپ قالىڭىز.

جۇمىس ۋاقىتىن باعالاڭىز. كليەنت نەمەسە جۇمىس بەرۋشى جۇمىس ۋاقىتىڭىزدى تاعايىنداماسا، ونى ءوزىڭىز تاعايىنداپ الىڭىز. كەيبىر ادامدار كۇندىز، كەي ادامدار تۇندە جۇمىس ىستەگەندى ۇناتادى.

3. ۇيدەگى درەسس-كود

پيجاما - عاجاپ كيىم. ءبىراق، تۇستەن كەيىن ارىپتەستەرىڭىزبەن تەلەفون ارقىلى ۇيىقتاپ شىققان كيىمىڭىزبەن سويلەسىپ وتىرعان ءبىرتۇرلى بولار. سوندىقتان، ۇيدە كوستيۋممەن جۇرمەسەڭىز دە، جۇمىس ىستەيتىن كەزدە ۇيدەگىدەن باسقاشا كيىم كيىپ جۇرسەڭىز، مىندەتتى تۇردە جۇمىس ناتيجەسىنە جاقسى اسەر ەتەدى.

4. توڭازىتقىشتىڭ ءىشىن رەتكە كەلتىرىڭىز

ارينە، ەگەر ۇيدەگى توڭىزىتقىشتى اشا بەرۋ ادەتىڭىز بولسا، وندا دۇرىسىراعى جاقىن ماڭايدان ارزانىراق كەڭسە الىڭىز نەمەسە كوۆوركينگ ورتالىققا بارىڭىز. نەمەسە، ۇيدەگى توڭازىتقىشتان الىپ جەيتىن تاماقتاردىڭ ورنىنا جەمىس-جيدەك جەڭىز. جەمىس-جيدەك جۇمىسقا دەگەن قابىلەتىڭىزدى جوعالتپايدى جانە قاجەت ەنەرگيا بەرەدى.

5. كوبىرەك سۋ ءىشىڭىز. 

ءوزىم بۇرىننان وسى ءتاسىلدى پايدالانامىن. سۋ تابەتتى ازايتىپ، جۇمىسقا دەگەن قابىلەتتى جوعارىلاتادى. مي جۇمىسى دا كوپ ەنەرگيانى قاجەت ەتەدى، سوندىقتان سۋ پايدالى.

6. ءۇي ەرەجەسى.

ۇيدە جالعىز بولساڭىز، وندا جاقسى. ەگەر جالعىز بولماساڭىز، ەرەجە كەرەك. جۇبايىڭىز جۇمىس ىستەپ وتىرعانىڭىزدى ءتۇسىنۋى كەرەك. سوندىقتان، كەلىسىپ الىڭىزدار. بۇل اسىرەسە جۇبايىڭىز بالامەن دەمالىستا وتىرعان بولسا، ەرەجە مىندەتتە تۇردە كەرەك جانە بولەك جۇمىس بولمەسى قاجەت بولادى. سەبەبى بالانىڭ جىلاعان داۋىسى ءسىزدى الاڭداتادى.

7. باسقا الەممەن بايلانىستى ءۇزىڭىز.

الەۋمەتتىك جەلى، تەلەفون شۇقىلاۋ سياقتى قاجەتسىز ادەتتەرىڭىزدى قىسقارتىڭىز. ەگەر بۇلارسىز وتىرا الماساڭىز، ارنايى ۋاقىت ءبولىڭىز، باسقا ۋاقىتتا جۇمىسىڭىزدى ىستەڭىز.

8. بلوكپەن جۇمىس ىستەڭىز.

كۇندى ۋاقىتقا ءبولىپ، ءار ۋاقىتتا تىندىراتىن شارۋالاردى بەلگىلەڭىز جانە سول كەستەنى ساقتاڭىز. بۇل جوسپارلاۋدى الدىن الا كەلەسى كۇندەرگە دە ىستەسەڭىز بولادى.

9. جاتىعۋ جاساڭىز.

تاڭەرتەڭ جۇمىس ريتمىنە كىرۋ قيىن با؟ وندا تاڭدى جۇگىرۋمەن باستاڭىز. سوندا جۇمىسقا تەزىرەك ەنىپ، كۇنى بويى ءوزىڭىزدى جاقسى سەزىنەتىن بولاسىز. تاڭەرتەڭ جۇگىرۋگە شاماڭىز جەتپەسە، كۇندىز بەلگىلى ءبىر ۋاقىت سايىن 5-10 مينۋت ءۇزىلىس جاساپ، جاتتىعۋ جاساپ ميىڭىزدى تىنىقتىرىڭىز. فيزيكالىق جاتتىعۋلار جاساڭىز.

10. جۇمىسىڭىزدى جاقسى كورىڭىز

جۇمىس ونىمدىلىگى، ناتيجەڭىزدىڭ بارلىعى ءوز جۇمىسىڭىزدى قانشالىقتى جاقسى كورەسىز، سوعان بايلانىستى. سوندىقتان، جاقسى كورەتىن جۇمىسپەن اينالىسىڭىز. بۇل بارلىعىنان دا ماڭىزدى.

دەرەككوز: Forbes چەحيا رەسپۋبليكاسى جانە Microsoft كورپوراسياسىنىڭ قولداۋىمەن جازىلعان جازبادان الىندى

ۇسىنعان: ماقپال سەمباي