استانا ءبىلىم سالاسىندا ينۆەستيسيالىق جوباعا قول قويىلعان قازاقستاندىق العاشقى قالا بولدى. بيزنەسمەندەر جوبانى 100% قارجىلاندىرۋعا قامتاماسىز ەتەدى، ال قالالىق بيلىك قۇرىلىس سالۋ ءۇشىن جەر ۋچاسكەسىن زاتتاي گرانت تۇرىندە ۇسىنادى، دەپ حابارلايدى Qamshy.kz اقپارات اگەنتتىگى استانا قالاسى اكىمدىگىنىڭ باسپا ءسوز قىزمەتىنە سىلتەمە جاساپ.
بۇگىن اكىمدىكتە قالا اكىمى باقىت سۇلتانوۆ، ءبىلىم جانە عىلىم ءمينيسترى كۇلاش شامشيدينوۆا جانە ءباا قازاقستانداعى توتەنشە جانە وكىلەتتى ەلشىسى موحامماد احماد الدجابەرانىڭ قاتىسۋىمەن ءبىلىم بەرۋ سالاسىنداعى جوبالاردى دامىتۋ ماسەلەلەرى بويىنشا دوڭگەلەك ۇستەل ءوتتى. ءىس-شاراعا سىرتقى ىستەر مينيسترلىگىنىڭ ينۆەستيسيالار جونىندەگى كوميتەتىنىڭ، استانا قالاسى اكىمدىگىنىڭ، ««ASTANA INVEST قيدو»ج ش س، قازاقستاندىق جانە شەتەلدىك كومپانيالاردىڭ وكىلدەرى قاتىستى.
ءىس-شارا اياسىندا SABIS حالىقارالىق مەكتەبىن سالۋعا قول جەتكىزىلدى. ءبىلىم سالاسىنداعى بۇل ينۆەستيسيا اياسىندا 1 مىڭ ورىندىق مەكتەپ پەن 250 ورىنعا ارنالعان مەكتەپكە دەيىنگى ءبىلىم وشاعى اشىلادى. SABIS حالىقارالىق مەكتەپتەر جەلىسى الەم بويىنشا 20 ەلدە بار. جاڭا حالىقارالىق مەكتەپتىڭ قۇرىلىسى قالاداعى مەكتەپتەر جۇكتەمەسىن ازايتىپ، جاڭادان 200 جۇمىس ورنىنىڭ اشىلۋىنا مۇمكىندىك بەرمەك.
«قالانىڭ قارقىندى ءوسىپ جاتقانىن ەسكەرسەك، جاڭا وقۋ ورىندارىن اشۋ وتە ماڭىزدى. ءبىز الداعى بەس جىلدا 120 مىڭ وقۋ ورنىن اشۋدى جوسپارلاپ وتىرمىز. بۇل - قازىرگىدەن ەكى ەسە ارتىق كورسەتكىش. سونىڭ ىشىندە شەتەلدىك جانە ەلىمىزدىڭ ينۆەستورلارى ەسەبىنەن 20 مىڭ ورىندىق جەكەمەنشىك مەكتەپ اشۋدى جوسپارلاپ وتىرمىز. جەكە ينۆەستورلاردىڭ ەسەبىنەن وسىنداي جوبالاردىڭ جۇزەگە اساتىنىنا ءبىز قۋانىشتىمىز»، - دەدى باقىت سۇلتانوۆ.
اكىم ايتىپ وتكەندەي، ءبىلىم ساپاسىن كوتەرۋ ماقساتىندا ەلباسىنىڭ باستاماسىمەن كەيبىر ايماقتاردا سونىڭ ىشىندە، استانادا جان باسىنا شاققانداعى قارجىلاندىرۋدى ەنگىزۋ ارقىلى مەكتەپتەردى دامىتۋ جونىندە قوسىمشا شارالار جۇزەگە اسىرىلدى. جان باسىنا شاققانداعى قارجىلاندىرۋ جۇيەسىندە ءبىلىم بەرۋ سالاسىنا جەكە بيزنەستى تارتۋعا مۇمكىندىك قاراستىرىلعان.
«بۇل - استانا مەن SABIS ءۇشىن تاريحي ءسات. ءبىز استاناعا ءوزىمىزدىڭ 130 جىلدىق تاجىريبەمىزبەن جانە سىزدەردىڭ «2050» ستراتەگيالارىڭىزدىڭ ءبىر بولشەگى بولىپ كەلەمىز»، - دەدى «SABIS Group» ۆيسە-پرەزيدەنتى ۆيكتور سااد. سونداي-اق، دوڭگەلەك ۇستەل اياسىندا وتاندىق بەس ينۆەستورمەن استانادا 17،4 ملرد تەڭگەدەن استام ينۆەستيسيا كولەمىندە جاڭا جەكەمەنشىك مەكتەپتەر قۇرىلىسى بويىنشا كەلىسىم جاسالدى.
ايتا كەتەيىك، استانا - قازاقستاندا بالالاردى مەكتەپكە دەيىنگى بىلىممەن قامتۋ ماقساتىندا جەكەمەنشىك بالاباقشا سالۋ بويىنشا مەملەكەتتىك تاپسىرىستى ەنگىزگەن العاشقى قالا. ەلوردا اكىمدىگى ءبىلىم بەرۋ سالاسىن ءارى قاراي دامىتۋدى جوسپارلاپ وتىر. بۇل شارالار جەكە ينۆەستيسيا تارتۋ ارقىلى جۇزەگە اسىرىلماق.
استانا قالاسى اكىمىنىڭ ورىنباسارى ماليكا بەكتۇروۆانىڭ ايتۋىنشا، SABIS مەكتەپ قۇرىلىسىنىڭ ءبىرىنشى كەزەڭىن قارجىلاندىرۋدىڭ ءوزى 15،5 ميلليون دوللاردى قۇرىپ وتىر. «بۇل - ءجۇز پايىز جەكە ينۆەستيسيا. ءبىزدىڭ تاراپتان قۇرىلىس سالۋ ءۇشىن جەر ۋچاسكەسى زاتتاي گرانت تۇرىندە ۇسىنىلدى، ياعني ينۆەستيسيالىق كەلىسىمشارت اياسىندا تەگىن. بۇل - ەلىمىز بويىنشا ءبىلىم سالاسىندا مەكتەپ سالۋعا ارنالعان زاتتاي گرانت ۇسىنىلعان العاشقى كەلىسىمشارت. قۇرىلىس وسى جىلى باستالىپ، 2022 جىلى تولىق اياقتالادى»، - دەدى ماليكا بەكتۇروۆا.
بۇگىن قول قويىلعان قۇجاتتار نەگىزىندە سالىناتىن وزگە دە جەكەمەنشىك مەكتەپتەر 100% جەكە ينۆەستورلار ەسەبىنەن جۇزەگە اسىرىلاتىن جوبا بولىپ تابىلادى. ماليكا بەكتۇروۆانىڭ ايتۋىنشا، جەكەمەنشىك مەكتەپتەر جان باسىنا شاققانداعى قارجىلاندىرۋ جۇيەسى ارقىلى جارتىلاي نەمەسە تولىعىمەن مەملەكەتتىك تاپسىرىسپەن جۇمىس جاساۋى مۇمكىن. «مەكتەپكە كەلگەن ءار وقۋشى اۆتوماتتى تۇردە مەملەكەت تاراپىنان قارجىلاندىرىلادى. ءقازىر سالىنىپ جاتقان جەكەمەنشىك مەكتەپتەر وسى جۇيەگە قىزىعۋشىلىق تانىتاتىنى ءسوزسىز. كەي مەكتەپتەر جارتىلاي اقىلى، ال كەيبىرى تولىعىمەن تەگىن بولادى. ول مەكتەپتىڭ ءبىلىم ساپاسىنا جانە سالىنعان قارجىنى قايتارۋدىڭ جولىنا بايلانىستى. ءبىز اقىلى مەكتەپتەرگە دە جانە مەملەكەتتىك تاپسىرىسپەن جۇمىس جاساعىسى كەلەتىن مەكتەپتەرگە دە مۇمكىندىك بەرەمىز. ءقازىر ەكى مەكتەپكە دە سۇرانىس بار»، - دەدى م. بەكتۇروۆا.
ۇسىنعان: ماقپال سەمباي
