قازاقستان ۇكىمەتى شەكاراداعى وتكىزۋ پۋنكتەرىن جاڭعىرتۋعا قىتايدان 2 ميلليارد يۋان (100 ميلليارد تەڭگە) قارىز الۋدى جوسپارلاپ وتىر، دەپ حابارلايدى Qamshy.kz اقپارات اگەنتتىگى Sputnik قازاقستانعا سىلتەمە جاساپ.  

بۇگىن ءماجىلىستىڭ جالپى وتىرىسىندا قىتايدىڭ ەكسيمبانكىنەن قارىز الۋ بويىنشا كەلىسىمدى راتيفيكاسيالاۋ زاڭ جوباسى قارالدى. پرەمەر-مينيستردىڭ ءبىرىنشى ورىنباسارى – قارجى ءمينيسترى ءاليحان سمايىلوۆتىڭ ايتۋىنشا، قارىزدىڭ جالپى سوماسى 2 ميلليارد 65 ميلليون يۋان، ياعني تەڭگەگە شاققاندا 100 ميلليارد تەڭگەگە جۋىق.

كەلىسىمگە سايكەس، جۇڭگو بانكى جەڭىلدىكتى كرەديتتى جىلدىق ستاۆكاسى 2 پروسەنتپەن 20 جىلعا بەرەدى. بۇل اقشاعا جۇڭگو، وزبەكستان جانە تۇرىكمەنستانمەن اراداعى شەكارادا ورنالاسقان 10 وتكىزۋ بەكەتىن، ونىڭ ىشىندە 9 اۆتوكولىك جانە 1 تەمىرجول پۋنكتىن جاڭعىرتۋ كوزدەلىپ وتىر.

"وتكىزۋ پۋنكتەرى قۇلاعالى تۇرعان جوق. ءقازىر ءبىزدىڭ كەدەندىك وتكىزۋ پۋنكتتەرى تاۋلىگىنە 450 كولىك قانا وتكىزۋگە قابىلەتتى. ءبىز وسى قابىلەتتىلىكتى 5400  اۆتوكولىككە دەيىن جەتكىزۋدى جوسپارلاپ وتىرمىز. بۇل دەگەنىمىز بيۋدجەتكە قوسىمشا سالىق، ەكىنشىدەن، قازاقستاننىڭ ترانزيتتىك حاب رەتىندە الەۋەتىن ۇلعايتادى"، - دەدى سمايىلوۆ ءماجىلىس كۋلۋارىندا.

مينيستر جۇڭگو الدىندا بۇدان بولەك مەملەكەتتىك قارىز جوق ەكەنىن اتاپ ءوتتى. تەك قارجى مينيسترلىگىنىڭ بەرىلگەن كەپىلدىكتەرى بار.

"مەملەكەت تاراپىنان قىتايدان كرەديت الىنعان جوق. ءبىراق قارجى مينيسترلىگى بەرگەن كەپىلدىكتەر بار، ياعني ميلليارد 200 ميلليون دوللار شاماسىندا. بۇل قىتايدىڭ ەكسيمبانكىنەن جانە قىتايدىڭ مەملەكەتتىك دامۋ بانكىنەن اۆتوجول جوبالارىن ىسكە اسىرۋعا تارتىلعان كرەديتتەرمەن بايلانىستى"، - دەدى ول.

ءماجىلىس دەپۋتاتتارى قازاقستان ۇكىمەتى مەن جۇڭگو ۇكىمەتى اراسىنداعى قحر  جەڭىلدىكتى كرەديت بەرۋ تۋرالى نەگىزدەمەلىك كەلىسىمدى راتيفيكاسيالاۋ تۋرالى زاڭ جوباسىن ماقۇلدادى.

ۇسىنعان: نازەركە لابيحان