تۇرمىسى تومەن وتباسىلاردىڭ كىرىسىن تەكسەرۋ كەزىندە جاردەماقىنىڭ 4 ءتۇرى ەسەپتەلمەيدى. بۇل تۋرالى پرەزيدەنت تاپسىرما بەرگەن دەپ حابارلايدى Qamshy.kz اقپارات اگەنتتىگى sputniknews.kz سايتىنا سىلتەمە جاساپ. 

"پرەزيدەنتتىڭ تاپسىرماسىمەن وسى ماسەلە قارالىپ جاتىر. جاردەماقىنىڭ 4 ءتۇرى ەسەپتەلمەۋى مۇمكىن. ولار – كوپبالالى وتباسىلارعا، "التىن" جانە "كۇمىس القا" يەگەرلەرىنە بەرىلەتىن مەملەكەتتىك جاردەماقى جانە مۇگەدەك بالاعا قاراستىرىلعان تولەم. سونداي-اق شاركىرتاقى دا كىرىسكە جاتپايتىن بولادى"، - دەپ ءتۇسىندىردى  ەڭبەك جانە حالىقتى الەۋمەتتىك قورعاۋ ءمينيسترىنىڭ ورىنباسارى سۆەتلانا جاقىپوۆا. 

ساۋىردەن باستاپ 832 مىڭ كوپبالالى جانە تۇرمىسى تومەن ازاماتتارعا بەرىلەتىن جاردەماقى ءۇشىن بيىل بيۋدجەتتەن 94 ميلليارد تەڭگە قاراستىرىلعان. تولەمدى كۇنكورىسى قيىن وتباسىلار الادى.

ۆيسە-مينيستر جۇرت مەملەكەتتىك جاردەماقىعا يەك ارتىپ، ماسىلدىققا جول بەرمەيدى دەپ سانايدى. دەگەنمەن، ولاي بولسا، جۇمىسقا قابىلەتتى ازاماتتىڭ وتباسى اتاۋلى الەۋمەتتىك كومەك الا المايدى. ولار ۇسىنىلعان جۇمىستان ءبىرىنشى رەت باس تارتسا، تولەمنىڭ 50 پايىزىنان، ال ەكىنشى رەت جاردەماقىدان مۇلدە قاعىلادى. ءبىراق، ءار بالاعا بەرىلەتىن جاردەماقى تولەنە بەرەدى.    

"ەگەر جالعىزباستى انا 4 بالانى ءوزى باعىپ وتىرسا، بالالارى 20 789 تەڭگەدەن الادى. ءوزى بالاعا كۇتىم جاساپ وتىر عوي، ول اناعا دا 20 789 تەڭگە تولەنەدى. جالعىزباستى انا ءبىر بالامەن وتىرسا، ەكەۋىنە دە 20 789 تەڭگەدەن تولەنەدى"، - دەيدى ۆيسە-مينيستر.

ۇسىنعان: ماقپال سەمباي