اقتوبەگە كەلگەن ۇكىمەت توبى كومەك سۇراماس بۇرىن ۇسىنعان جۇمىسقا بارىپ، جۇمىس ىستەۋگە كەڭەس بەردى. سەبەبى، جۇمىس ىستەمەيتىن ادامنىڭ وتباسى اتاۋلى الەۋمەتتىك كومەك تە الا المايدى، دەپ حابارلايدى Qamshy.kz اقپارات اگەنتتىگى  قازاقپارات سايتىنا سىلتەمە جاساپ. 

ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ كومەك سۇراپ، ءۇي الۋ كەزىندە قيىندىق كورگەن وتباسىلاردىڭ جايىن جەكە-جەكە قاراۋعا ۋادە ەتتى.

دەگەنمەن جۇمىس ىستەپ، ەڭبەك ەتۋدەن قاشاتىن ادامداردىڭ بار ەكەنىن جاسىرمادى.

«تاڭنىڭ اتىسى، كۇننىڭ باتىسى جۇمىس ىستەپ، وتباسىن اسىراۋ كەرەك. ءوزىم الماتىدا پاتەر جالداپ تۇرىپ، قارجى مينيسترلىگىندە جۇمىس ىستەدىم. ساعات 18:00-دەن كەيىن جۇك تاسۋشى بولدىم. كوبى سولاي جۇمىس ىستەدى. سوندىقتان جولداستارىڭىزدى جۇمىسقا جىبەرۋ كەرەك. اۋىردى، دەنساۋلىعى جوق دەپ قيىن جۇمىستان قاشا بەرسە، ۇيىندە جاتا بەرەدى»، - دەدى بەردىبەك ساپاربايەۆ.

ق ر پرەمەر-مينيسترىنىڭ ورىنباسارى گۇلشارا ءابدىقالىقوۆا الەۋمەتتىك اتاۋلى كومەك الۋ ءۇشىن كەز كەلگەن جۇمىسقا ورنالاسۋعا كەڭەس بەردى. سەبەبى، كەم دەگەندە 40 مىڭ تەڭگە ەڭبەكاقى السا، بالالارعا جاردەماقى الۋ مۇمكىندىگى قاراستىرىلعان.

«قاي ايماققا بارسام دا، الدىمنان جالعىزباستى انالار شىعادى. قوعامعا نە بولعان؟ ەركەكتەر قورقاق بولىپ كەتكەن بە؟ پروبلەمانىڭ ءبارىن ايەلدەرگە ءۇيىپ قويعان با؟ سونى تۇسىنبەدىم»، - دەدى گۇلشارا ءابدىقالىقوۆا.

ەسكە سالساق، ۇكىمەتتىڭ جۇمىس توبى اقتوبەگە كەلىپ، جاستارمەن، كوپبالالى انالارمەن كەزدەسۋ وتكىزدى. جيىن كەزىندە اقتوبەلىك كوپبالالى، مۇقتاج وتباسىنىڭ انالارى تۇرعىن ءۇي، جۇمىسپەن قامتۋ ماسەلەسىن قوزعادى. «ەڭ ۇلكەنى - باسپانا ماسەلەسى. ەلىمىزدە 340 مىڭ كوپبالالى وتباسى بار بولسا، ونىڭ 28 مىڭنان استامى باسپانا كەزەگىندە تۇر. اقتوبە وبلىسىنا تۇرعىن ءۇي سالۋعا 2،7 ميلليارد تەڭگە بولىنەدى. جىلىنا 323 پاتەر، 7 جىلدا 2153 پاتەر سالىنادى دەپ جوسپارلانعان»، - دەدى ق ر يندۋستريا جانە ينفراقۇرىلىمدىق دامۋ مينيسترلىگى قۇرىلىس جانە تۇرعىن ۇي-كوممۋنالدىق شارۋاشىلىق ىستەرى كوميتەتىنىڭ ءتوراعاسى مارحابات جايىمبەتوۆ. 

ۇسىنعان: ماقپال سەمباي