«ءتىلبۇزار»، «ءسوزبۇزار» دەگەندەر بولۋشى ەدى، ەندى بۇعان «ءانبۇزار» دەگەندى قوسىڭىز. ەكراننان تۇسپەيتىن انشىلەرىمىزدىڭ «يننوۆاسياسىمەن» حالىق اندەرى دە، حالىق كومپوزيتورلارىنىڭ اندەرى دە، قازاقستان كومپوزيتورلارىنىڭ اندەرى دە اياۋسىز «كۇزەلىپ»، «تۇزەلىپ» جاتىر. بالا كۇنگى تىڭداپ جۇرگەن ءانىمىزدى تانىماي قالدىق، دۇرىسى تاپپاي قالدىق. ءوڭى دە، ءسوزى دە وزگەرگەن. بىرتە-بىرتە «مۋتانتتانىپ»، وزگە ءبىر تۋىندىلارعا اينالۋدا. ءشامشى، اسەت، ءابلاحات، نۇرعيسالار عايىپتان ءتىرىلىپ كەلسە، ءوز اندەرىن وزدەرى تانىماس ەدى. قوسىلا شىرقايىن دەسەڭ، نە تۇتىعاسىڭ، نە قاقالىپ-شاشالاسىڭ. ءتىلىڭ كەكەشتەنىپ، باسقا اۋەنگە اۋىسىپ بارا جاتقانىڭدى سەزەسىڭ. بۇعان كىم كىنالى؟ ءانشى مە، ءان وڭدەۋشى مە؟ «كاسىپقوي جۇلدىزدار» كوبەيگەن سايىن تانىمال اندەرىمىزدىڭ ءتۇپنۇسقاسىنان اۋىتقىپ، رەمەيك-اندەرگە ۇلاسىپ بارا جاتقانى جاسىرىن ەمەس. كۇندە ەستىپ جۇرگەن ءانىڭ –قىڭقىل-سىڭقىل. نۇرجان ايتپاقشى، حالاۋ-لالاۋ-ليلاۋ، گيگوك-كيگوك، شيق-پيق، تارس-تۇرس... ىڭىرسىعان، اھىلەپ-ۋھىلەگەن، دەپرەسسياعا ۇشىراعان، جىلاپ-سىقتاعان بىردەڭە. ايتساڭ «مەليزم عوي، ءقازىر مودا، ءاننىڭ اجارىن اشادى» دەيدى انشىلەر. اجارىن اشقانىن قايدام، كەرىسىنشە، بازارىن قاشىرىپ تۇرعان سياقتى...
ءار ونەر تۋىندىسىنىڭ ءوز ءتۇپنۇسقاسى بولماۋشى ما ەدى؟ ماسەلەن، «مونا ليزانى» قالاي وزگەرتپەكسىڭ؟ «اباي جولىنا» تۇزەتۋ جاساي الاسىڭ با؟ شەكسپيردى ءقايتىپ كۇزەمەكسىڭ؟ بىلە-بىلسە، ءار تۋىندى ءتۇپنۇسقاسى – اۆتوردىڭ ۇزاق جىلعى شىعارماشىلىق ىزدەنىسىنىڭ ناتيجەسى ەمەس پە؟ ماسەلەن، دجوكوندانىڭ قولىنا گۇل نە سوتكا ۇستاتىپ، كارتينانى جاڭاشا سيپاتتا قايتا رەستاۆراسيالاي المايسىڭ عوي؟ ءان دە سولاي بولۋى ءتيىس! ول تاكتىمەن تۇگەندەلىپ، نوتامەن شەگەندەلەدى. ال نوتا – ءاننىڭ دۇرىس ايتىلۋىنا، اۋەنىنىڭ بۇزىلماۋىنا نەگىز بولادى.
ءان بۇزۋ ءۇردىسىنىڭ كەڭ ەتەك الىپ بارا جاتقانى سونشالىق، كەيىنگى جاس كومپوزيتورلار دا، انشىلەرگە وسىنداي ستيلدەگى اندەر ۇنايدى ەكەن-اۋ دەپ، نە بۋىنى، نە بۋناعى كەلىسپەگەن «جارىمجان» اندەردى شىعارۋعا كوشتى. مۇنداي اندەرگە ءسوز جازىپ جۇرگەن اقىنداردى ايايسىڭ. ماسەلەن، جاستار ەرەكشە ءسۇيىپ تىڭدايتىن ايقىن تولەپبەرگەننىڭ رەپەرتۋارىنداعى «جۇرەگىم اق» انىنەن مىسال كەلتىرەيىك (قالام تۇرتپەي بەرىپ وتىرمىز):
اشىق ەسىكتى قاقپاشى
جۇرەك قاعىسىن تىڭداشى
بارىڭدى بەرىپ وزىڭە كەرەگىندى الشى.
كوزىڭدەگى تامشىڭ الدامشى
سەزىمىڭ راس ءبىراق
سەنىڭ جۇرەگىڭ مەنىكىنەن اق
كۇن ءتۇن دەمەي
ۋاقىت ۇنەمدەمەي
ۇنەمى ۇندەمەي
الىستاسىڭ ساعان قاراي جول ىزدەيمىن
ميىمنىڭ دامىنەن اۋىز تي
قانىمدى قاينات ەسىگىمدى تي
[قايىرماسى]
جۇرەگىم اق، اق، اق
ەسىگىن قاق، قاق، قاق
كىر ىشىنە جاپ، جاپ، جاپ، love you janym
جۇرەگىم اق، اق، اق
ەسىگىن قاق، قاق، قاق
كىر ىشىنە جاپ، جاپ، جاپ، love you janym
نە ءتۇسىندىڭىز؟ بالكىم، كۇنى-تۇنى قۇلاقتارىن قۇلاقسازبەن تىعىنداپ، شەتەل اۋەندەرىن تىڭداپ جۇرگەن جاستار ۇعىپ قالار...
ءاننىڭ دۇرىس اۋەنى تەك داستارحان باسىندا، ەل اۋىزىندا عانا ايتىلاتىن سياقتى. شىن ونەردەن سۋسىنداپ، قۇلاق قۇرىشىن قاندىرۋ ءۇشىن، كونسەرتكە بيلەت الىپ اۋرە بولماي-اق، الدەبىر ءۇيدىڭ تەرەزەسىنەن توگىلىپ جاتقان اندەرگە قۇلاق ءتۇرىپ، ءلاززات الاتىن زامان كەلە جاتىر-اۋ...
بەكجىگىت سەردالى
پىكىر قالدىرۋ