2019 جىلدىڭ 19 ناۋرىزىندا، نۇرسۇلتان ءابىش ۇلى نازاربايەۆ ءوزىنىڭ ەل پرەزيدەنتى وكىلەتتىگىن توقتاتىپ، ءوز ەركىمەن اتا زاڭىمىز بويىنشا سەنات ءتوراعاسىنا ۋاقىتشا بەرۋى جايىندا ايتقانىن تەلەديداردان تىڭداعانىمدا، قاتتى تولعانىسقا تۇسكەنىمدى جاسىرا المايمىن. جاقىندا عانا «نۇر وتان» پارتياسىنىڭ XVءىىى سەزىندە دەلاگات بولىپ قاتىسقاندا، ءوز كوزىممەن كورگەن، ءوز قۇلاعىممەن ەستىگەن ەلباسى بەينەسى كوز الدىما كەلىپ، ەرەكشە تولقۋ كۇيىن كەشتىم. ءبىر مەن ەمەس، بۇكىل سەزد دەلاگاتتارى پارتيا ءتوراعاسىنىڭ نۇرلى كەلبەتىنەن لوگيكالىق قۋاتتى، يدەيالىق جارقىن مۇراتتى، نىق دايەكتەلگەن سەنىمدىلىك، سەزىمىن كەشكەن ەدىك. ارينە، بۇل مەنىڭ كوڭىل-كۇيىم. تاريح ءبىر ورىندا تۇرمايدى، قوعام قاجەتىنە قاراي وزگەرىپ، جاڭارىپ وتىراتىن قۇبىلىس بىزگە دە ءتان دەگەن ويمەن وزىم-وزىمە كەلگەنىمدى جاسىرا المايمىن.

ەلىمىز تاۋەلسىزدىك الىپ، باسىمىزعا باقىت قۇسى قونعان كەزدە ەل پرەزيدەنتى بولىپ سايلانعان نۇرسۇلتان ءابىش ۇلى نازاربايەۆتىڭ رەسپۋبليكامىزدى دۇرىس جولعا سالاتىنىنا وعان ءبىراۋىزدان داۋىس بەرىپ قولداعان حالىق قاتارىندا يمانداي سەنگەن مۇعالىمدەر قاۋىمىمەن بىرگە مەن دە سەندىم. سەنىمىمىز اقتالدى دا. ەلباسى قازاق ەلىن الەمدەگى وركەنيەتتى ەلدەردىڭ، قازاق حالقىنىڭ الەمدەگى وزىق ءبىلىمدى، وزىق عىلىمدى بولاتىنىنا قازاقستاندىقتاردى سەندىردى، ءوزى ۇسىنعان «قازاقستان – 2030» ستراتەگيالىق باعدارلامانىڭ ورىندالۋىن باسقارىپ، «قازاقستان – 2050» باعدارلاماسىنىڭ جۇزەگە اسۋىن قامتاماسىز ەتەتىن جولداردى ناقتى انىقتاپ بەردى. تۇڭعىش پرەزيدەنتىمىز الەمدە دارالانىپ تانىلدى، الەم ساياساتكەرلەرىنىڭ ىشىندەگى وزىعى دارەجەسىندە ەكەنىن حالقى باعالاپ، تورتكۇل دۇنيە مويىندادى.

حالىق ءۇشىن ەڭ ۇلكەن باقىت-بيلىكتىڭ مىقتىلىعى، دانالىعى ەكەنى جالپىعا ايان. ەلباسىمىز ىشكى ساياساتتى دا، سىرتقى ساياساتتى دا ىشكى جاعدايمەن جانە حالىقارالىق تىنىسپەن شەبەر ۇيلەستىرىپ، مەملەكەتىمىزدىڭ نەگىزىن قالاپ، ونى نىعايتىپ، الەمدەگى دامىعان 30 ەلدىڭ ءبىرى بولۋىنا كوسەمدىك باسشىلىق ەتتى. كەڭەستى ەل كەمىمەس دەپ، بۇعان حالقىمەن بىرگە قول جەتكىزىپ، وسى سىندارلى كەزەڭدە پرەزيدەنتتىك بيلىك ۇتىمدىلىعىنىڭ ۇلگىسىن كورسەتتى. شەرحان مۇرتازانىڭ: «ەلباسى-بىرەۋ، حالقى-تىرەۋ» دەگەنى – ءوزى كۋا بولعان ءىس. قاشانداعى جۇيەلى جوندىلىكتى بىلەتىن حالقىمىز: «ەسىم حاننىڭ ەسكى جولى، قاسىم حاننىڭ قاسقا جولى» دەپ، الاش جۇرتىنا جول-جوبا سالىپ بەرگەن كەمەڭگەرلىككە ادال كوزبەن قاراعان داستۇرىنەن اينىماي، اتا زاڭىمىز، اسا ماڭىزدى تاريحي باعدارلامالار،

جولداۋلار ت.ب. باعىتتاردى ءادىل دە جوعارى باعالاپ، ورىنداپ جاتقانى – تاريحي اقيقات. جاقسىلىققا سەندىرۋ ءۇشىن شىن جاقسىلىق جاساۋدى باستاۋ ابزال دەگەن – وسى! جاقسىلىقتار تەك جاقسىلىقتان عانا تۋىندايدى.

ەل بولام دەسەڭ الدىمەن ءوزىڭدى، ودان سوڭ بەسىگىڭدى تۇزە دەگەن الدىڭعى بۋىن ويشىلدارىمىزدىڭ وسيەتتەرىنىڭ جانە ۇلت مۇراتتارىنىڭ جالعاسى رەتىندە «مادەني مۇرا»، «رۋحاني جاڭعىرۋ»، «ۇلى دالانىڭ جەتى قىرى» سياقتى باستامالارىمەن ەلباسى ۇلت بەسىگىنىڭ ۇلتتىق مازمۇنىندا ءومىر ءسۇرىپ، ءوسىپ – ونۋىنە جول اشتى.

مەملەكەتتىك دانالىقتى باعالاۋعا دا دانالىق كەرەك-اق. وسى ورايدا وقىرماندار سۇيىسپەنشىلىگىنە بولىنگەن، ادامي باقىتتىڭ جارشىسى اتانعان جازۋشى ءازىلحان نۇرشايىقوۆتىڭ ءسوزى ويعا ورالادى. «ەل باسقارۋ – ەڭ ۇلكەن ونەر. ول ەكىنىڭ ءبىرىنىڭ، ەگىزدىڭ سىڭارىنىڭ قولىنان كەلە بەرمەيدى. بويىنا حالىقتىق كوپ قاسيەتتەر جيناقتالعان ادامنىڭ عانا قولىنان كەلەدى. ول شىنشىل، العىر، كوسەم، ايتقىش، ۇيىمداستىرعىش، بولجاعىش، سەزگىش، سەرگەك بولا ءبىلۋ كەرەك. ۇشقىر ويى يگىلىكتى ىستەرمەن ۇشتاسىپ جاتۋى ءجون. حالىقتى باسقارۋ ءۇشىن حالىقتىڭ ويىنداعى بارلىق ونەر، بىلىك، پاراسات كوسەمىنىڭ كوكىرەگىندە كۇمبىرلەپ تۇرۋى كەرەك. مىندەت – ماقساتىن تىڭعىلىقتى ىسپەن تياناقتايدى. وسى جانە باسقا حالىقتىق قاسيەتەردىڭ ءبارى قازىرگى پرەزيدەنتىمىزدىڭ باسىندا بار. ونى حالىقپەن قابىستىرىپ وتىرعان دا وسى قاسيەتتەر»، – دەگەن ەدى.

ەلباسىنىڭ بۇل باسشىلىق ەرەكشە قاسيەتتەرى ءبىلىم بەرۋ سالاسىندا دا رەفورمالىق ىستەردە كورىنىس تاپتى. تاۋەلسىز ەل ءۇشىن وتاندىق ءتول وقۋلىقتاردى دايىنداپ ەنگىزۋ، قابىلەت – دارىنى جوعارى بالالار ءۇشىن نازاربايەۆ زياتكەرلىك مەكتەپتەرى مەن نازاربايەۆ ۋنيۆەرسيتەتىن ۇيىمداستىرۋ، «بولاشاق» باعدارلاماسى بويىنشا مىڭداعان جاستارىمىزدىڭ شەتەلدەردە ەڭ وزىق ۋنيۆەرسيتەتتەردە ءبىلىم مەن تاجىريبە الىپ، ەل يگىلىگىنە قىزمەت ەتىپ جاتقانى، ءبىلىم مازمۇنىن جانە وقىتۋ تەحنولوگيالارى تۇبەگەيلى جاڭعىرتىپ، ءۇش ءتىلدى مەڭگەرۋىنە جاعداي جاساپ وتىرعانى، مەكتەپ پەن بالاباقشالار ءۇشىن مىڭداعان جاڭا عيماراتتار تۇرعىزعانى، تۇپتەپ كەلگەندە سىني ويلاي الاتىن، باسەكەگە قابىلەتتى، كوممۋنيكاتيۆتىك داعدىلاردى قالىپتاسقان كرەاتيۆتى تۇلعا دايىنداۋ ماقساتىن جۇزەگە اسىرىپ وتىرعانى ت.ب.س.سس جەڭىستى دە جەمىستى جاڭالىقتار گاللەرەياسى قوعام دامۋىنا ەرەكشە سەرپىن بەرۋدە.

ماعان ەلباسى، ۇلت كوشباسشىسى نۇرسۇلتان ءابىش ۇلى نازاربايەۆتىڭ ءوز قولىنان «قازاقستاننىڭ ەڭبەك ەرى» جانە التىن جۇلدىز بەن «وتان» وردەنى ماراپاتتارىن ەلىمىزدە ءبىرىنشى بولىپ الۋ باقىتى بۇيىرعان ەدى. سودان ءبىراز جىل وتكەن سوڭ، استانادا مەملەكەتتىك ءماندى ءبىر ۇلكەن جيىنعا شاقىرىلعانداردىڭ ءبىرى رەتىندە كوپ ىشىندە تۇرعانىمدا، ەلباسى ارنايى نازار ءبولىپ، «وليمپيادا جەڭىمپازدارىن شىعارىپ جاتىرسىز با؟» دەگەن سالەمىنە يە بولدىم. پرەزيدەنتىمىزدىڭ جاس ۇرپاق تاربيەسىن ءارقاشان ەستە ۇستايتىنىنا كوز جەتكىزگەن ەدىم.

ال بۇگىندەرى حالىققا الەۋمەتتىك قولداۋ مەن كومەكتى كۇشەيتۋگە ۇكىمەتكە ارنايى تاپسىرما بەرىپ، ونىڭ ورىندالۋىنا تىكەلەي ءوز باقىلاۋىنا العانى دا بەلگىلى. بۇل پرەزيدەنتتىڭ حالقىمەن ءبىرتۇتاستىعىن تاعى دا ايعاقتاي ءتۇسىپ وتىر.

كورنەكتى مەملەكەت قايتاركەرى ومىربەك بايگەلدىنىڭ مىنا تومەندە كەلتىرىلگەن پىكىرىن ءوز باسىم كۇنى بۇگىندەرى دە اسا وزەكتىلىكتى دەپ سانايمىن:

«نازاربايەۆتىڭ ەل تاريحىندا الار ورنىن ءالى تولىق ءتۇسىنىپ بولعانىمىز جوق دەر ەدىم. نۇرسۇلتان ءابىشۇلىن ارداقتاۋ، قورعاۋ، ساقتاۋ-ەلدىگىمىزدى ارداقتاۋ، قورعاۋ، ساقتاۋ. نازاربايەۆتىڭ ەلدى باسقارۋىنا قاي جاعىنان دا جاعداي جاساۋ ارقىلى ءبىز قازاقستاننىڭ كەمەل كەلەشەگىنە، بەرىك بولاشاعىنا جاعداي جاسايمىز، ءارقايسىمىزدىڭ ەڭسەلى ەرتەڭىمىزگە نەگىز قالايمىز» (بايگەلدى ءو. مارتەبە// «ەگەمەن قازاقستان» 2009 جىل، 6 شىلدە).

مەملەكەتتىڭ ىشكى، سىرتقى ساياساتىن ساراپتاپ، ۇرىسقا ۇرىندىرماي، سوعىسقا سوقتىقتىرماي، حالىقتى بەيبىت وركەندەتۋ جولىمەن العا باسىپ كەلە جاتقان قۇرمەتتى پرەزيدەنتىمىز نۇرسۇلتان ءابىش ۇلى امان بولسىن! – دەيمىن.

جاريالانعان ۇندەۋدە ايتىلعانداي، ەلباسىنىڭ ءوز باستاماشىلدىعىمەن جوبالانىپ جوسپارلانعان مەملەكەتتىك باعدارلامالاردىڭ ورىندالۋ جەڭىسى مەن جەمىسىن حالقىمەن بىرگە كورۋىنە تىلەكتەسپىن!

اياگۇل تورە قىزى ميرازوۆا

قازاقستاننىڭ ەڭبەك ەرى،

«التىن جۇلدىز»، «وتان» وردەندەرىنىڭ يەگەرى

قازاقستانعا ەڭبەگى سىڭگەن قىزمەتكەر،

الماتى قالاسىنىڭ،

جامبىل وبلىسىنىڭ،

جۋالى اۋدانىنىڭ

قۇرمەتتى ازاماتى