استانانىڭ اتاۋى نۇرسۇلتان بولىپ رەسمي وزگەرتۋگە شەشىم قابىلداندى دەپ جازادى Qamshy.kz اقپارات اگەنتتىگى. ق ر پارلامەنتى پالاتالارىنىڭ بىرلەسكەن وتىرىسىندا استانانىڭ اتاۋىن نۇرسۇلتان قالاسىنا وزگەرتۋ تۋرالى زاڭ جوباسى ەكى وقىلىمدا قابىلداندى. 

"سەناتتاعى 43 دەپۋتاتتىڭ 43ء-ى كەلىستى. ماجىلىستەگى 103 دەپۋتاتتىڭ - 103ء-ى كەلىستى. وسىلايشا، قۇرمەتتى ارىپتەستەر، تاريحي شەشىم قابىلداندى"، - دەدى ءماجىلىس ءتوراعاسى نۇرلان نىعماتۋلين پالاتا وتىرىسىندا.

«مەملەكەت باسشىسى كونستيتۋسيانىڭ 91-بابىنىڭ 1-تارماعىنا سايكەس، پارلامەنتتىڭ قاراۋىنا «ق ر كونستيتۋسياسىنا وزگەرىستەر ەنگىزۋ تۋرالى» قازاقستان رەسپۋبليكاسى زاڭىنىڭ جوباسىن ەنگىزدى. بۇل جوبا رەسپۋبليكا استاناسىنىڭ اتاۋىن استانا قالاسىنان نۇرسۇلتان قالاسىنا وزگەرتۋدى كوزدەيدى. «ق ر كونستيتۋسياسىنا سايكەس، ۇكىمەت اتا زاڭىمىزعا استانانىڭ اتاۋىن وزگەرتۋ تۋرالى تۇزەتۋ ەنگىزۋ ءۇشىن رەسپۋبليكالىق رەفەرەندۋم وتكىزۋ جونىندە ق ر پرەزيدەنتىنە ۇسىنىس جاسادى. پرەزيدەنت بۇل ۇسىنىستى رەفەرەندۋمعا شىعارماي، پارلامەنتتىڭ قاراۋىنا جىبەرۋ تۋرالى شەشىم قابىلدادى. بۇل ماسەلە بويىنشا كونستيتۋسيالىق كەڭەس ءوزىنىڭ وڭ قورىتىندىسىن دا بەردى»، - دەدى پارلامەنت ءماجىلىسىنىڭ ءتوراعاسى نۇرلان نىعماتۋلين.

ەسكە سالساق، بۇگىن پارلامەنت ۇيىندە حالىققا انت بەرگەن قاسىم-جومارت توقايەۆ پرەزيدەنت رەتىندە العاشقى مالىمدەمەسىن جاسادى. ەلباسى نۇسرۇلتان نازاربايەۆقا العىس ايتا وتىرىپ، ءوز ۇسىنىستارىن ايتتى. سولاردىڭ العاشقىسى استانا قالاسى مەن قازاقستاننىڭ ورتالىق كوشەلەرىنىڭ اتاۋىن نۇرسۇلتان نازاربايەۆ ەتىپ وزگەرتۋ.

ۇسىنعان: اسەل بولات قىزى