جاپونيانىڭ سايتاما قالاسىندا ءوتىپ جاتقان مانەرلەپ سىرعاناۋدان الەم چەمپيوناتىندا ەليزابەت تۇرسىنبايەۆا كۇمىس مەدال جەڭىپ الدى دەپ حابارلايدى Qamshy.kz اقپارات اگەنتتىگى Olympic.kz سايتىنا سىلتەمە جاساپ.

سپورتشى قىسقا باعدارلامانى ءساتتى ورىندادى. جاپوندىق كاوري ساكاموتو مەن رەسەيلىك الينا زاگيتوۆاعا جول بەرىپ، ءوز مانسابىندا العاش رەت كۇمىسكە قول جەتكىزىپ وتىر. 

ەليزابەتتىڭ بۇل جەڭىسى قازاقستان ءۇشىن تاريحي جەڭىس. سەبەبى، بۇرىن-سوڭدى مانەرلەپ سىرعاناۋدا قازاق قىزدارىمىزدان ەشبىرى مۇنداي جەتىستىككە جەتكەن جوق.

ەركىن باعدارلامادا تۇرسىنبايەۆا تورتتىك سالحوۆتى ورىندادى. بۇل مانەرلەپ سىرعاناۋ سپورتىنداعى تاريحي ساتتەردىڭ ءبىرى. سەبەبى، بۇعان دەيىن اتالمىش قيىن ەلەمەنتتى ايەلدەر اراسىندا ەشكىم ورىنداي الماعان.

تورەشىلەر بۇل ورىنداۋدى 148.80 بالعا باعالادى. قوس باعدارلاما قورىتىندىسى بويىنشا ەليزابەت تۇرسىنبايەۆا كۇمىس جۇلدگە قول جەتكىزدى. جالپى ۇپاي سانى 224.76 بولدى.

ەليزابەت تۇرسىنبايەۆا الەم چەمپيوناتىنىڭ تۇعىرىنا كوتەرىلگەن العاشقى قازاقستاندىق ايەل بولىپ تاريح بەتتەرىنە جازىلدى.

رەسەيلىك الينا زاگيتوۆا 237.50 ۇپايمەن جەڭىسكە جەتسە، قولا جۇلدە 223.80 ۇپايمەن ەۆگەنيا مەدۆەديەۆاعا بۇيىرىپتى.

ۇسىنعان: ماقپال سەمباي