كوپىردەن سەكىرگەن اتىراۋلىقتى قۇتقارماق بولىپ قايتىس بولعان پوليسيا قىزمەتكەرى وتباسىنىڭ جالعىز اسىراۋشىسى بولعان دەپ حابارلايدى Qamshy.kz اقپارات اگەنتتىگى tengrinews.kz سايتىنا سىلتەمە جاساي وتىرىپ.
پوليسيا قىمەتكەرى شالقار اقىمعالييەۆ بار بولعانى 24 جاستا بولعان. IIMء-نىڭ حابارلاۋى بويىنشا شالقار كوپبالالى وتباسىنان شىققان جانە ۇيلەنبەگەن. وتباسىندا جالعىز جۇمىس ىستەيتىن دە شالقار ەكەن. ەگەر بۇل جاعداي ورىن الماعاندا، شالقار ءساۋىر ايىندا 25 جاسقا تولار ەدى. ول وسى سالادا 5جىل قىزمەت اتقارعان.
"21 ناۋرىز كۇنى ساعات 21:52-دە پوليسياعا ورتالىق كوپىردە ءبىر ادامنىڭ سۋعا سەكىرمەك بولعانىن حابارلادى. اتىراۋ قالاسىنىڭ پوليسيا قىزمەتكەرلەرى دەرەۋ وقيعا ورنىنا جەتكەن. سولاردىڭ ىشىندە شالقار اقىمعالييەۆ تە بولدى. ول قىزدى قۇتقارماق بولعاندى مۇزدى سۋعا باتىپ، قايتىس بولدى. " - دەيدى ىشكى ىستەر مينيسترلىگىنىڭ رەسمي وكىلى نۇرديلدا وراز.
«جاعالاۋدا روليكپەن سەرۋەندەگەننەن كەيىن دەمالىپ وتىرعاندا سۋيسيدكە توسىننان كۋا بولدىق. مەن بىردەن پوليسياعا حابارلادىم. ساناۋلى سەكۋندتار ىشىندە وقيعا ورنىنا جەتكەن پوليسيا قىزمەتكەرلەرىنىڭ ءبىرى باتىپ بارا جاتقان ادامعا تەز ءجۇزىپ باردى. سۋ مۇزداي، وعان قوسا قاتتى اعىس قىزدى قالاي اعىزىپ بارا جاتقانى دا كورىنىپ تۇردى. ءبىراق، پوليسيا قىزمەتكەرى ءوز ءومىرىن تاۋەكەلگە تىگىپ، باتقان ادامدى قۇتقارۋعا تالپىنىسىن توقتاتقان جوق»، دەيدى وقيعا كۋاگەرى رايىمبەك ساربالين.
شالقارعا كومەككە وزىمەن بىرگە بورەنەنى الىپ سۋعا تۇسكەن پوليسيا كىشى لەيتەنانتى رۇستەمبەك سۇندەتوۆ ۇمتىلعان. «سۋعا باتقان ادامعا جەتكەن كەزىمدە شالقار اعىسقا توتەپ بەرە الماي باتىپ كەتتى. ايەلدى قۇتقارۋ ماڭىزدى بولدى. ونىڭ ۇستىنە ايەل «ول مەن ءۇشىن ءولدى» دەپ ايقايلاپ، ەستى شىعاردى»، دەپ ەسكە الادى رۇستەمبەك سۇندەتوۆ.
اجالدان قۇتقارىلعان باتىس قازاقستان وبلىسىنىڭ تۋماسى جەدەل جاردەم كولىگىمەن وبلىستىق اۋرۋحاناسىنىڭ رەانيماسيا بولىمشەسىنە جەتكىزىلگەن. ال رۇستەمبەكتىڭ ارىپتەسىن ءوز بەتىنشە ىزدەۋى ەش ناتيجە بەرمەدى. 3 گرادۋس مۇزداي سۋدا ءسىڭىرى تارتىلعان 30 جاستاعى كىشى لەيتەنانت سۇندەتوۆ جاعاعا ءوزى ءجۇزىپ جەتكەن. «00-50-دە شالقار اقىمعالييەۆتىڭ مۇردەسى وقيعا ورنىنان تومەن جاقتان تابىلىپ، جاعاعا شىعارىلدى.
ۇسىنعان: فاريزا جومارت قىزى
