ادامنىڭ جاسىنا جاس قوسىلعان سايىن ۋاقىت نەگە ۇشقان قۇستاي زىمىراپ وتە شىعادى؟ اقش-تاعى ديۋكا ۋنيۆەرسيتەتىنىڭ عالىمدارى بۇل سۇراققا جاۋاپ ىزدەپ كوردى.

ولاردىڭ تۇجىرىمى بويىنشا قارتايعان ادامعا ۋاقىتتىڭ جىلدام ءوتىپ جاتقانداي كورىنۋىنە ادام ميىنىڭ توزۋى سەبەپ بولسا كەرەك. ناقتىراق ايتقاندا، قارت ادام جاستارعا قاراعاندا اقپاراتتى از قورىتادى. بۇل جايىندا Naked Science اقپارات كوزى ءمالىم ەتتى.

«ادامدار جاس كەزىندە ءوزىن قارتايمايتىنداي سەزىنىپ، ماڭگى وسىلاي تۇرا بەرەتىندەي كورەدى. ونىڭ ءمانى ولاردىڭ باستان كەشىرگەندەرىنىڭ سونشالىقتى ءماندى نەمەسە تەرەڭ بولعانىندا ەمەس، بار-جوعى سول كەزدەگى اقپاراتتاردىڭ بارىنشا شاپشاڭ قورىتىلاتىندىعىندا جاتىر»،- دەپ ايتىلعان European Review مەرزىمدى باسىلىمىندا جاريالانعان ادريان بەجاننىڭ ماقالاسىندا.

ونىڭ سوزىنە قاراعاندا، ادام ميى جۇيكە مەن نەيرونداردان تۇرادى. ءوزىنىڭ دامۋ كەزەڭى بولادى. ەلەكترلى دابىل ۇزاق پروسەستەن ءوتىپ، سەنسورلىق مالىمەتتەردى كودتايدى. ادام دەنەسى دە ءوسىپ، جۇيكەنى ۇزارتادى. ول ءوز كەزەگىندە اقپاراتتى ميعا وڭدەۋگە جونەلتەدى. جۇيكە تالشىعى ەلەكتردى جاقسى وتكىزەتىندىكتەن ونىڭ دا كەمشىلىگى جوق ەمەس: قوسىمششا اق زات اقپاراتتاردى جەتكىزۋگە بوگەت جاسايدى.

ادام دەنەسىنىڭ توزۋى دا اقپاراتتى قابىلداۋدا قيىندىق تۋدىرادى. ادام قارتايعان سايىن نەيروندى ارنالار دەگرەداسياعا ۇشىرايدى. بۇل ءوز كەزەگىندە اقپاراتتاردى قورىتۋ مۇمكىندىگىن كەمىتەدى. عالىمدار بۇدان بولەك، ەرەسەك ادامدارعا قاراعاندا، بالالار كوز قاراشىعىن ءجيى قوزعالتادى.

بالالاردىڭ بويىنداعى كۇش-جىگەر ارتىپ تۇرعاننان ەمەس، جاس مي جاڭا اقپاراتتاردى تەز قابىلدايدى، تەز قورىتادى، ناتيجە شىعارادى. قارتتار توڭىرەگىندەگىلەرگە نازار سالمايتىنى اينالاسىنداعىلاردىڭ تاڭسىق كورىنبەۋىندە جاتىر. بۇل ۋاقىتتىڭ جىلدام ءوتىپ جاتقانداي كورىنۋىنە الىپ كەلمەك.

ۇسىنعان: گۇلىم جاقان