كەزەكتەن تىس پرەزيدەنت سايلاۋىنىڭ ۋاقىتى جاريالانعالى بەرى حالىقتىڭ پىكىرى سان تاراپقا ءبولىندى. ءارقايسىسىنىڭ ءوز ءۋاجى بار.
اسىرەسە، «تاسماعامبەتوۆ سايلاۋعا تۇسە الادى ما؟» دەگەن سۇراق حالىقتىڭ باسىم بولىگىنىڭ ساناسىنا تىنىم بەرمەۋدە. ءتۇرلى لاۋازىمدى قىزمەتتەردى اتقارا ءجۇرىپ، ەلدىڭ سۇيىكتىسىنە اينالعان يمانعالي نۇرعالي ۇلى قازىرگى ۋاقىتتا قازاقستان رەسپۋبليكاسىنىڭ رەسەيدەگى توتەنشە جانە وكىلەتتى ەلشىسى جاۋاپكەرشىلىگىندە.
28-ساۋىرگە دەيىن قابىلداناتىن ۇمىتكەرلەر اراسىندا تاسماعامبەتوۆتىڭ توبە كورسەتۋى جۇمباق كۇيدە قالىپ وتىر.
زاڭ نە دەيدى؟
ەل اراسىندا «ەلشىگە سايلاۋعا قاتىسۋعا رۇقسات جوق» دەگەن قاۋەسەت جەلدەي ەسىپ ءجۇر. راسىندا سولاي ما؟
"سايلاۋ تۋرالى" كونستيتۋسيالىق زاڭعا سايكەس، مىنا ادامدار پرەزيدەنتتىككە كانديدات بولا المايدى:
- زاڭدا بەلگىلەنگەن تارتىپپەن وتەلمەگەن نەمەسە الىنباعان سوتتىلىعى بار ادام؛
- سوت سىبايلاس جەمقورلىق قىلمىسىن جانە سىبايلاس جەمقورلىق زاڭ بۇزۋشىلىعىن جاساعانى ءۇشىن كىناسىن زاڭدا بەلگىلەنگەن تارتىپپەن تانىعان ادام؛
- سوتتىڭ ارەكەتكە قابىلەتسىز دەپ تانىعان، سونداي-اق سوت ۇكىمى بويىنشا باس بوستاندىعىنان ايىرۋ ورىندارىندا وتىرعان ازاماتتاردىڭ سايلانۋعا قۇقىعى جوق.
سونداي-اق، مەملەكەت باسقارۋدان ءۇمىتتى ادامعا قويىلاتىن كەلەسىدەي تالاپتارى جانە بار:
"تۋمىسىنان قازاقستان ازاماتى، قىرىق جاسقا تولماعان، مەملەكەتتىك ءتىلدى مەڭگەرگەن، قازاقستاندا سوڭعى ون بەس جىلدا تۇراتىن جانە جوعارى ءبىلىمى بار رەسپۋبليكا ازاماتى سايلاۋعا تۇسە الادى. كونستيتۋسيالىق زاڭدا پرەزيدەنتتىككە كانديداتقا قوسىمشا تالاپتار قويىلۋى مۇمكىن. بۇعان قوسا، پرەزيدەنت بولىپ سايلانۋ ءۇشىن ازاماتتىڭ مەملەكەتتىك قىزمەتتە نەمەسە سايلانبالى مەملەكەتتىك لاۋازىمداردا كەمىندە 5 جىل جۇمىس تاجىريبەسى بولۋى، سونداي-اق بەلسەندى سايلاۋ قۇقىعى بولۋى ءتيىس".
ورتالىق سايلاۋ كوميتەتى نە دەيدى؟
اتالمىش ورگان مۇشەسى قوعامدىق بىرلەستىكتەر اتىنان ۇسىنىلعان كەز-كەلگەن كانديداتۋرا مۇقيات قارالاتىنىن ايتتى.
سونداي-اق، ورتالىق سايلاۋ كوميتەتىنىڭ مۇشەسى زاۋرەش بايمولدينا يمانعالي نۇرعالي ۇلىنىڭ سايلاۋعا ءتۇسۋ مۇمكىندىگى تۋرالى قويىلعان سۇراققا تىكەلەي جاۋاپ بەرمەي، ونىڭ مەملەكەتتىك قىزمەتكەر ەكەنىن، ەگەر ۇسىنىلىپ جاتسا ءسوزسىز تەكسەرىلەتىنىن ايتىپ ءوتتى.
"كانديداتتىڭ قۇجاتتارىن كورمەي جاتىپ، ناقتى جاۋاپ بەرە المايمىن. ورتالىق سايلاۋ كوميسسياسى القالىق جيىندا ۇمىتكەردىڭ تالاپتارعا سايكەستىگىن قاراپ، شەشىم شىعارادى"، - دەدى ول.
ءسوزىن ودان ءارى جالعاعان وسك مۇشەسى ۋاعىندا پرەزيدەنتتىك سايلاۋعا ديپلوماتيالىق قىزمەت اتقارعان عاني قاسىموۆتىڭ دا ۇمىتكەر بولعانىن تىلگە تيەك ەتىپ، وزگەشە ەمەۋرىن تانىتقانداي بولدى.
«تويدىڭ بولعانىنان «بولادىسى» قىزىق».
بارلىق ۇمىتكەرلەردىڭ ەسىم-سويى الداعى ەكى جەتى ىشىندە جاريالانباق. قىزىقتىڭ «كوكەسى»، انە، سوندا باستالادى.
