الەمدەگى ەڭ ۇلكەن ۇشاق العاش رەت اۋە جولىنا كوتەرىلدى دەپ حابارلايدى Qamshy.kz اقپارات اگەنتتىگى BBC اگەنتتىگىنە سىلتەمە جاساپ.

التى قوزعالتقىشى، ەكى فيۋزەلياجى بار الىپ ۇشاق اقش-تىڭ كاليفورنيا شتاتىنداعى موحاۆە شولىندە  سىناق رەتىندە العاش رەت ۇشىرىلدى.

بۇل - الەمدەگى ەڭ ۇلكەن ۇشاق. ۇشاقتىڭ قۇرىلىسىنا توقتالاتىن بولساق، Microsoft كومپانياسىن قۇرۋشىلاردىڭ ءبىرى ۇشاقتى سوناۋ 2011 جىلى وربيتاعا جەر سەرىكتەرىن جەتكىزەتىن ۇشاق رەتىندە ويلاپ تاپقان ەكەن. Stratolaunch Systems Model 351 ۇشاعىنىڭ قاناتىنىڭ ۇزىندىعى، شامامەن، 117 مەتر، اۋە كەمەسىنىڭ ۇزىندىعى 53 مەتر، بيىكتىگى - 15 مەتر. ەڭ جوعارى ۇشۋ سالماعى 590 توننا شاماسىندا، ۇشاقتىڭ تازا ءوز سالماعى - 226 توننا.

Stratolaunch وربيتاعا عارىش اپپپاراتارىن جەتكىزۋگە ارنالعان. تاسىعىش زىمىران ەكى فيۋزەلياج اراسىنداعى ورىنعا بەكىتىلەدى. بۇعان دەيىن اۋەگە كوتەرىلگەن الەمنىڭ ەڭ اۋىر ۇشاعى ان-225 «مريا» بولاتىن. ول 200 توننا جۇك الىپ ۇشۋعا مۇمكىندىگى بولدى. ۇشاق 1988 جىلى 21 جەلتوقساندا العاش رەت اۋەگە كوتەرىلدى. Stratolaunch ۇشاعى موحاۆە شولىندە قۇراستىرىلدى. 2017 جىلى مامىر ايىندا ۇشاقتى جەردە سىناۋ ءۇشىن العاش رەت انگاردان شىعاردى. ەكى جارىم ساعاتقا سوزىلعان العاشقى ۇشۋ بارىسىندا، الىپ ۇشاق ساعاتىنا 304 شاقىرىم جىلدامدىقپەن بەس شاقىرىم بيىكتىككە كوتەرىلدى. .

ۇسىنعان: ماقپال سەمباي